الموضوع: الاستغلال والانتهازية في أسوأ صورها

المشاركة الأصلية كتبت بواسطة ahmed4000

مقدرتش افهم رد حضرتك يا دكتور هل هو تاييد ولا سخرية
بس انا دارس اقتصاد وعملى فى الاقتصاد
واللى الناس مش قادرة تفهمه ان الفلوس كرقم مجرد لا يعنى شئ
المهم قدرة الفلوس على انها تجيب ايه..يعنى قدراتها الشرائية
وبالتالى انا مستعد بكرة ابقى رئيس الحكومة واخلى الحد الادنى مليون جنيه بس فى نفس الوقت اتوماتيك حتلاقى الاسعار زادت بدون اى تدخل ولا احتكار ولا جشع ولا غيره تخليلك المليون جنيه لا يشتروا سلع تساوى 300 جنيه

اى زيادة فى السيولة فى اى دولة يقابلها مباشرة ارتفاع فى الاسعار

اومال البنوك المركزية فى العالم كلها بترفع سعر الفايدة ليه اول متلاقى التضخم زاد..علشان تسحب فلوس من الناس وتقلل الشراء والطلب وبالتالى الاسعار متزيدش..

يبقى لو خليت الحد الادنى 1200 جنيه حتلاقى كيلو اللحمة اوتماتيك بقى ب600 جنيه ولا الحكومة ولا جن الازرق يقدر ينزله وساعتها حضرتك لو بتاخد 5 الاف جنيه حيبقوا بيشتروا 8 كيلو لحمة يعنى كانك بتقبض 400 جنيه باسعار دلوقتى

تهايك عن كل المصانع اللى حتلاقى نفسها بتدفع 1200 لعامل انتاجه ميزيدش عن 600 جنيه تعمل ايه؟ ببساطة ترفع اسعار السلعة وتخليك انت تدفع مرتب العامل

او الحل الاسهل ورغم انه اتقال فى الحكومة القديمة والناس كلت الراجل ساعتها لكنها حقيقة..المصانع حتستورد عمال من الصين وبنجلاديش...وده بيحصل اصلا دلوقتى...ومع السلامة للعامل المضصرى ابو 1200 جنيه

يبقى لا الفقير حيكسب ولا الغنى حيكسب

اومال ايه الحل...الناس الفقيرة تفضل تطحن؟

لا طبعا ليهم حلول وهو زيادة الدعم ليهم (وليهم هما بس) مش لكل الشعب وبالتالى يبقى انا بساعدهم انى اديهم السلعة بسعر اقل لكن ماثرتش على بقية الشعب ولا زودت الاسعار


يجماعة الحكومة وحشة بس مش معنى كده كلها حاجة بتعمل غلط...والشعب عنده حق بس مش معناها كل حاجة بيطلبها صح