الموضوع: تجربة قياده اكسيل 96

العربية اكسيل 1500 سى سى موديل 96

العربية من بره:
العربية من بره كبيرة جدا بالذات من قدام والصاج طبعا كلنيكس معدل والسقف ضعيف اوى مش عارف ليه (العربية فابريقة) والاكصدامات ضعيفة لكنها ثابته وشكلها كويس من قدام وورا والابواب فى القفل صوتها مش مريح والعربية كتصمبم مش انسيابية ولا واخده كيرفات تحسسك بالشياكة بس تحس انها عربية كويس ومتكسفش تخرج بيها لاى مكان والشنطة كبيرة جدااااا وحوض الموتو محتوياته مبعثرة بس تقدر تميز كل حاجة بسهولة جدا من اول نظرة وثباتها كويس لحد 110

العربية من جوه:
لما تركبها هتحس بالوسع بس لو رجليك طويلة زيي مش هترتاح بصورة كبيرة مع العلم ان الدركسيون قابل للتعديل ودى حاجة ممتازة والكنبة ورا واسعة ومريحة وطبعا شكل التابلوه مش لطيف اطلاقا والانوار التابلوه من جوه واضحة اوى وكل شىء بيبان فى التابلوه والتكييف بتاعها كويس بس مش ممتاز والازاز الكهربا مكانه جنب الفتيس وانا مريحنى جدا المكان ده ده غير ان فيه زرارين للازاز مخصصين للى قاعد ورا مابين الكرسيين القدامنيين والمراية الخارجية طبعا كارثة الاكسيل المعروفة انها مبتتحركش ومبتتقفلش (عندى الاتنين اتكسروا من الركنة تحت البيت بسبب خبط الناس لايديهم فيها وهم ماشيين جنبها) بس تقدر تعدل المراية عن طريق يد صغيرة كده ورا المراية والفتيس معقول مش وحش بتحس بنقلاته والعربية صوتها متوسط فى بداية التشغيل مش هادىء ودواسة البنزين ممتازة اوى تخليك عايز تجرى ومتحسش بالسرعات بتاعتك وانت ماشى بيها والفرامل مش قوية وبتزحف العربية على الارض مسافة كبيرة والدبرياج كويس بس مش ممتاز والباور ممتاز والاضاءة من جوه ضعيفة للمبة اللى فى السقف بس السقف عالى وبعيد عن الراس والكرسى قابل للتعديل ومكان الكاسيت تحت اوى فى اخر التابلوه ودى ميزة انه مش متشاف بسهوله وتقفيل الابواب عادى ومفيش سماعة فى الابواب زى باقى العربيات وفتح الشنطة والتانك من الداخل واريال كهربا والعزل الداخلى حلو جدا لما تقفل الازاز كله

قطع الغيار:
قطع غيارها رخيصة عند كل الناس واى ميكانيكى يشتغل فيها بسهولة
امثلة لاسعار قطع غيار من مده قريبة جدا
فلتر بنزين اصلى كورى 15
فلتر زيت اصلى كورى 15
سير كاتينة ايطالى 40
سير دينامو 10 سير تكييف 10
فانوس اشارة مصرى 20
فانوس اشارة تايوانى 25

عيوبها البارزة عموما:
واطية جدا ولازم تاخد المطبات على سرعة 4 تحت الصفر
ضعف الصاج جداااااا
ارتفاع استهلاك البنزين الى حدا ما
حجمها الكبير جدااا من الكبوت
المرايات الغير قابلة للطى

مميزاتها البارزة عموما:
قطع غيارها الرخيصة جدااا
تقبل بنزين 80 بدون مشاكل مع تغيير الفلتر كل مده
ممتازة جدا بالنسبة للسعر
بتتباع هوا وعليها طلب كتير
عائلية جدااا

تقييم عام:
ممتازة وعملية جدااا لمن يبحث عن سيارة عائلية واستخدام شخصى بسعر كويس وبنزين 80 وتكييف وباور وقياده مريحة وبها كل الكماليات وقطع غيار رخيصة جداااااااا وسهولة شغل الميكانيكا فيها وعدم الخسارة عند البيع ولن تندم عند شرائها مطلقا بس تكون بحالة نضيفة ومش متهانة