مطلوب من السيد كريم منير اعتذار رسمى

**ahmed1981** · 14-02-2011 12:16 AM

سأزيد على مشاركتي السابقة أمر آخر لم أدركه من قبل حتى لا أكون ظالماً لأحد:

ردي الأول:

المشاركة الأصلية كتبت بواسطة ahmed1981

لكاتب الموضوع
أولاً:
عندما تكتب موضوع وتطلب الإعتذار عن أمر ما من شخص
لابد أن تكون دقيقاً جداً في كتابتك لما تطلب الإعتذار عليه
بمعنى أن الكلام المرسل والمعنى لا يصلح
لابد أن تعرض إقتباس من الكلام الذي تطلب الإعتذار عنه موضحاً رابطاً له
ثانياً:
الرأي الحر كما هو مكفول لك مكفول لغيرك
الإعتذار يكون عن إساءة وليس عن خلاف في الرأي
فإذا كان هناك من أساء إليك فاطلب منه الإعتذار
أما إذا كنت تطلب ممن خالفوك في الرأي أن يعتذروا عن رأيهم
فهنا يكون مطلوب منك أنت شخصياً الإعتذار هن هذا الخطأ الواضح في ثقافة الحوار وحرية الرأي

الإضافة التي أود إضافتها:
أنه بالفعل أنا شخصياً أحسست بنفس الضيق الذي أحس به كاتب الموضوع ولكن بسبب آخر.
السبب هو الإجبار على قراءة الموضوع والذى أراه في قرارة نفسي إجبار على قراءة رأي شخصي حتى لو سمي بيان إداري.
فالحقيقة أن الإجبار على قراءة موضوع يكون في أمور أخرى لا علاقة لها بالآراء.
ورغم إحساسي بالغضب من ذلك التصرف وهو ما أتفق فيه مع كاتب الموضوع ومع الأستاذ طارق إلا أنني لم أجد أن من حقي أن أطلب الإعتذار عن ذلك الخطأ الذي رأيته أنا شخصياً خطأ ولكن لا أفرض رأيي بتخطيئه على كاتب ذلك الموضوع فلذلك لم أشتك منه.

وهذا ليس معناه إختلافي أو إتفاقي مع الرأي الذي عرض بذلك الموضوع الإجباري فهذا ليس المشكلة
بل المشكلة كانت الإجبار

وبتلك الإضافة تكتمل شهادتي

**hon** · 14-02-2011 12:48 AM

المشاركة الأصلية كتبت بواسطة karim_monir

بغض النظر عن غلطاتك الاملائيه واللغوية والتي جعلتني اخمن نصف الجمل
وحجم الخط الصغير جدا والذى اتعب عيناي
الا اني وبكل بساطة هاقولك ان واضح انك غير متابع جيد للمنتدى اطلاقا
ولم تكن تعرف ان المنتدى كان له شركاء ولم ينفصل الشركاء عن المنتدى وتئول ملكيته لي سوى شهر اغسطس المنصرم وتم الاعلان عن ذلك خلال مقابلة رمضان الماضيه
ومنذ ذلك الحين ولاسباب اعلانية واداريه بحتة تم وضع اللقب تحت اسمي
وتم وضع اللقب تحت اسم استاذ نادر مدير المنتدى(لماذا لم تسئله هو الاخر عن سبب وضع اللقب ولا ما اذاش نفسيتك )
وكلا اللقبين امرين اداريين لا يعنياك بشيئا

اما عن حذف بعض المشاركات او التدخل بتعديلها فتقدر تقدم طلب في الاقتراحات ويرد عليك فيها مدير المنتدى
او الشكاوي لو لك شكوى محددة وترد عليك لجنة فض المنازعات

اما كونك تكتب كلام مرسل مرة اخرى وبعد عشرات الردود اللي تفضل الاخوة مشكورين وردو عليك ولم تعيها فده مالوش عندي رد سوى التجاهل حفاظا على وقتي

اما عن اتهامك لي بوضع مواضيع بهاك اجبار
فلازم تعرف ان دي توجيهات ادارية للاعضاء بدلا من ارسال الاف الميلات لمن يدخل المنتدى او لاء
فالتوجيه الاجباري بيكون للعضو المشارك فقط
مش عايز تقرا تقدر تكون زائر فقط بدون حق الرد ولا تطبيق اي عقوبة في حالة الخطأ

اخيرا وليس اخرا
من حقك تطلب الاعتذار عن وجهة نظرك
ومن حق رئيس مجلس الادارة يعمل اللي هو شايفه صح فهو المسئول الاول عن المنتدى
فاحب ابلغك ان طلبك للاعتذار
مرفوض
شكلا وموضوعا

شكرا جزيلا على الاسلوب الممتع من حضرتك فى التهكم على وعلى كتاباتى وأحب أعرفك انى كان عندى من الشجاعة الكافية لأطالب بالأعتزار ولكن واضح انى كنت غلطان لان الديموقراطية الحقيقية ضعيفة جدا فى منتداك بس قبل مامشى أحب أفكرك بشوية حاجات
-أننى من سنة ونص تقريبا كتبت فى منتداك رسالة الى الرئيس محمد حسنى مبارك والموضوع أختفى فى اقل من يوم
-انى اخدت وقفين قبل كدا دفاعا عن سياسة منتداك فى وقف المهندس سمير عياد والاستاذ محمد ممدوح
قصدى أقولك انك مش بتكلم واحد تافه ولا واحد ركب الموجة وغير جلدة أحنا يا محترم من الناس الى حلفت الشهادة فى التحرير ولبسنا اكفانا وعاهدنا ربنا اننا منسكتش عن غلط نشوفة عشان كدا كتبت الموضوع واوعى تفتكر انك منتصر وانا المهزوم عشان مشيت من منتداك بالعكس انا قلت كل الى انا عاوزة وكونك تعاليت على مطالبى أو زى مبتقول وقتك ثمين دا أكدلى وجهه نظرى
-بقول لكل الاخوة والاصدقاء الى كلمتهم وتحاورت معاهم قرابه سنتين هم عمرى فى المنتدى انى كنت سعيد جدا بيهم وتشرفت فى معرفتهم وان شاء الله نلقاكم على خير
-أغادر وانا مرفوع الرأس ولم يعد لى مكان فى المنتدى الذى لم يحترمنى صاحبه
والسلام عليكم ورحمه الله وبركاته للجميع

**dr-mohamed** · 14-02-2011 01:03 AM

استني بس شوية اهدا شوية

المشاركة الأصلية كتبت بواسطة hon

-انى اخدت وقفين قبل كدا دفاعا عن سياسة منتداك فى وقف المهندس سمير عياد والاستاذ محمد ممدوح

وقف الاستاذ محمد ممدوح انا فاكره كويس جدا لانى انا اللى كنت مقدم شكوي فيه وليس ضده هو كشخص لاني ويعلم الله احترمه جدا لكن كان السبب انى تم ايقافي اسبوع لكلمة قلتها مخالفة لقوانين المنتدي وحين عدت وجدت اخي محمد ممدوح كاتب نفس الكلمة فقدمت شكوي انه يجب معاملة الجميع بسواسية وفق قوانين المنتدي فتم ايقافه اسبوع والكثير من الاعضاء هاجموا الادارة على ايقافه وتم ايقافهم وقابلت اخي محمد ممدوح وكانت اول مرة اقابله وحكيت له الموضوع وضحكنا وقال انه صح انه اتوقف لان الكلمة مخالفة للقوانين والقوانين تطبق على الكل وما زلنا نمزح على هذا الموقف
اما المهندس سمير عياد فحضرتك شفت كم الاهانات اللى وجهها لاعضاء هنا ثم ختمها في موقع اخر بوصف جميع من في المنتدي هنا ومنهم انت وانا بالطبع بالفاظ لا استطيع وصفها

قصدى أقولك انك مش بتكلم واحد تافه ولا واحد ركب الموجة وغير جلدة

ومين قال ان حضرتك تافه او بتركب الموجة او غيرت جلدك
انا زي ما قلت في موضوع تاني لما بدخل في حوار مع شخص براجع مشاركاته الاول وانت ولا ازكيك على الله من الناس المحترمة ومن اول يوم للثورة ومشاركاتك تشهد بذلك وكذلك كريم لكن للاسف هو لا يقول ما يفعله لهذا يعتقد البعض انه ضد الثورة او لم يكن مؤيدا لها من اليوم الاول ويسئل في ذلك من ذهب له اخونا كريم بالبطاطين ايام الثورة الحقيقية بالبطاطين للشهداء والمصايبن في المستشفيات ومن يعلم علم اليقين بخروجه في ايام الثورة
يعني انتم الاتنين من الناس المحترمة التى لم تغير رايها او كلمتها

-بقول لكل الاخوة والاصدقاء الى كلمتهم وتحاورت معاهم قرابه سنتين هم عمرى فى المنتدى انى كنت سعيد جدا بيهم وتشرفت فى معرفتهم وان شاء الله نلقاكم على خير

وانا واحد من الناس سعدت بمحادثتك وتزيد سعادتي حين تبقي معنا ليشارك كل منا بالراي في كيفية البناء في المرحلة الاهم والاصعب فما فات هو البداية وليس النهاية

-أغادر وانا مرفوع الرأس ولم يعد لى مكان فى المنتدى الذى لم يحترمنى صاحبه
والسلام عليكم ورحمه الله وبركاته للجميع

وهل رفض كريم الاعتذار يعني انه لا يحترمك انت لك راي وهو له راي فليحترم كل منا راي الاخر وحريته في التعبير ما دمنا جميعا نطالب بالحرية
اما موضوع الشهادة فكل من خرج من يوم 25 كان يعلم انه يضحي بوقته او جهده او ماله او صحته وربما حياته وكل له على قدر مبتغاه من الخروج وان كان هناك من خرج ليقال انه بطل اقول له انك بطل وكفاك ان الناس قالت عنك هذا ومن خرج لاجل وطنه اقول له وطنك يذكر لك جميلك ومن خرج لوجه الله فثوابه عند الله
جعل الله ثوابنا جميعا عند الله

**ahmad--ezzat** · 14-02-2011 01:10 AM

لا حول ولا قوه الا بالله

ياجماعه هو فى ايه

الاستاذ hon بصراحه انت مكبر الموضوع اوى يعنى متزعلش منى...اعتذار ايه بس كبر مخك

هو الراجل قال ايه يعنى عشان يعتذر...فى ايه يعنى الموضوع مش مستاهل وبصراحه كل واحد حر فى رايه

بصراحه انا شايف ان التفكير بقى غريب اوى

**zyadahmed** · 14-02-2011 01:25 AM

كلمة حق اللى حصل فى المنتدى فى ايام الثورة زى اللى حصل فى كل بيت ومحل عمل وقهوة وشارع فى مصر اختلاف وجهات النظر حول الاصلح للبلد الكل تقريبا اتفق على كره مبارك مع اختلاف وجهات النظر حول الحلول للخروج من الازمة

وجهة نظر ترى لا نتركها للمجهول والضياع بعد رحيل الرئيس واللى نعرفه احسن من اللى ما نعرفهوش ونقضى الكام شهر دول معاه و نترك ميدان التحرير وعايزين نحس بالامان تانى ونرجع اشغالنا ولهم الحق فى وجهة نظرهم من وجهة نظرهم هما

وجهة نظر اخرى ترى الاستمرار حتى النهاية وان الشعب اراد الحياة ولابد ان يستجيب القدر وان الخسائر آنية لحظية قريبة يمكن تجاوزها مع الزمن ومش هاتكون زى اللى اتنهب ايام مبارك

وانا كنت بادافع باستماتة عن وجهة النظر الثانية وان نستمر للنهاية

الى هنا متفقين وده الف باء الديموقرطية لكن ما حدث فى المنتدى كان غريب ويستحق وقفة للمراجعة وليس للمحاسبة للعتاب وليس للاعتذار فكل واحد حر فى وجهة نظره الخاصة لكن دون تجريح فى الثوار اللى فى التحرير ووصفهم باوصاف لا تعبر عن كل الواقع الموجود فى هذا المكان العزيز على قلوبنا كلنا خصوصا وقت الازمة ......الكلام الاخير موجه للاستاذ كريم منير مع فائف الاحترام والتقدير

**FunnyMickey** · 14-02-2011 01:33 AM

انا ساكت بقالي كتير وبتفرج بس
عاوز اقول حاجه لكل واحد شايف نفسه معترض علي سياسه المنتدي

هوا دلوقتي مش فيه فرق بين واحد أسس المنتدي وواحد عضو في المنتدي ؟
واحنا متفقين من الاول ان اللي مميز نايل موتورز عن المنتديات الاخري انه فيه اداره حازمه تطبق القوانين علي الكل بلا استثناء

حفهمك حاجه علي موضوع رئيس مجلس اداره المنتدي ده كريم كان شرحه قبل كده لعضو بردو سأل نفس السؤال
دلوقتي فيه ناس بتكن غريبه عن المنتدي
جهات اعلانيه وجهات تمويل عاوزين يعملوا اعلانات او توكيلات عربيات عاوزه تقدم خدماتها لنايل موتورز عشان من الاخر كده تكسب جمهور لشراكاتها
والناس دي مش اعضاء ولكن شركات

فدول حيخشوا يتكلموا مع مين
وحيعرفوا منين الجهه الاداريه اللي يتكلموا معاها
عشان كده كان لازم صفه اداريه كريم يضيفها
وبعدين اما كريم يقول كلام عادي بيقول بشخصي لا بصفتي
واما يقول كلام اداري بيقول بصفتي لا بشخصي

ثانيا
المنتدي بتاعنا من اكبر المنتديات بتاعت السيارات في العالم العربي
بمعني اخر كان عليه العين من جهات امنيه عليا

ممكن ببساطه لو كريم ميفرقش معاه المنتدي
ياخدها بعنتريه بقي
واللي يتكلم يتكلم
وساعتها اما المنتدي يتوقف ويتقفل زي صفحات كتير اتقفلت لدواعي امنيه
منبقاش نعيط بقي

طب ليه نضطر لكده يعني
ده منتدي عربيات
ليه بننسي
ثوره وقلنا ماشي
ولو مكنش فيه اجتماعي مكناش حنتكلم هنا اصلا
ليه نضر كريم
هوا اللي في الواجهه قدام الجهات الامنيه دي
اقسم بالله انا بقول ان لو كان حصل لا قدر الله والثوره دي فشلت واحنا عمالين نتكلم كده لكان كريم تاني يوم محتجز في امن الدوله واحتمال يعتقل بسببنا
بسبب ايه
منتدي عربيات
احنا كبرنا المنتدي وخلينا ليه صوت
وهوا قال ان فيه جهه امنيه قالتله خفوا شويه
معني كده انه فيه حد متابعنا
احنا مش موقع صغير

يبقي لما يطلع قرار اداري ان لو حد غلط في حد لسه في الرئاسه ويشتم فيه ولا كأنه موجود حيتوقف
يبقي لازم يعمل هاك اجبار
عشان الناس كلها تعرف التحذير
عشان منلاقيش ناس عماله تقول انا اتوقفت ليه
وانا اكاد اجزم ان فيه ناس فعلا شتمت وغلطت
وبردو الاداره موقفتهاش
تقديرا منهم للموقف السائد

ارجو تقدير الامور والتفريق بين كون كريم عضو في منتدي نايل موتورز
وبين انه صاحب المنتدي

تاني حاجه بقي عاوز اقولها

بالله عليك هوا لو مكنش فيه دميوقراطيه في المنتدي بمعناها الحقيقي
كان حيسيبك تتكلم وتقول وتعيد وتتهمه باتهامات من وجهه نظره انها باطله
مكان ريح نفسه ووقفك وخلاص
حيتكلم معاك ليه
ويناقش ويقول ويتضايق
ماهو بيتكلم كعضو زينا اهو
فين بقي رئيس مجلس الاداره دلوقتي

شوف اي رئيس مراجيح اما واحد تحت ايده بس بيعلي صوته بيعمل فيه ايه
يبقي منجيش نقول بقي اجبرني ومش اجبرني

الموضوع كاتجاه لسياسه المنتدي شئ
ورأي كريم الشخصي حاجه تانيه
لازم يحط في اعتباره ان كيان المنتدي ميتهدش ولا يضيع اللي عمله كله في يوم وليله
وبين انه شخص عادي بينزل ويعبر ويثور في الشارع

فانا اعتقد ان مفيش حد مدين بالاعتذار ولا رسمي ولا دولي لحد
انتا قلت رأيك وكريم قال رأيه وكل واحد حر
انما متجبرش حد يااما تعتذر يااما حمشي من المنتدي

ارجو ان تتقبل الكلام بصدر رحب واحنا كلنا هنا اخوات في الله
المنتدي لا ليه جانب ربحي ولا نيله
الراجل بيدفع من جيبه عشان احنا نتخدم وناخد خصومات
كمان بنتنطط عليه
:)

**mahmoud19** · 14-02-2011 01:34 AM

المشاركة الأصلية كتبت بواسطة egyzizo

`يا أخى منين قاطعت المنتدى ومنين بتقرا وبتكتب فيه النهارده ..
زمن النفاق قد ولى كما تقول ، فياريت تثبت على موقفك وبلاد الله واسعة وكذلك المنتديات.

اشكرك شكر عميـــــــــــق على التنويه على انى منافق وعلى تنويهك انى غير مرغوب فيا فى المنتدى هنا
بس انا عوز اقول لك ان انا مقولتش انى هقاطع المنتدى ,انا قولت قاطعت
وعلشان اوضح اكتر(قاطعت)فعل ماضى وهى الفتره الى كنا بنطالب فيها بإسقاط النظام والحمد لله اسقطناه فبالتالى انا الوحيد الى اقرر وارفض تماما تدخلك فى انك تحددلى انى ادخل على المنتدى او مدخلش
وأنا موجهتش أهانه لشخص بعينه فعاوز انوه أن الى بياخد اى كلام على صدره أكيد هو شايف ان هو كان عنده غلط ما
وبرضو الى على راسه بطحه ........
وشكراااااااااااااااااا

**mahmoud19** · 14-02-2011 01:40 AM

المشاركة الأصلية كتبت بواسطة dr-mohamed

حضرتك قررت تقاطع المنتدي رايك الشخصي وانت حر فيه طبعا
اما وصف المنتدي بانه زي التليفزيون المصري او المحور فمرفوض تماما فلم يكن هنا من يخدم النظام او يدعو له او يسانده بالعكس كثيرا ما امتلا المنتدي بالهجوم على اعمدة النظام السابق وسياساته وقت ما كان هناك نظام
وكما ان زمن النفاق انتهي فزمن ادعاء الرجولة والبطولات بدا

يعنى انا مثلا اطلع انافقك واقولك ان المنتدى كان ماشى فى المسار الصحيح ومقولكش على الى فى قلبى واكلمك بكل صراحه!؟
وقد يكون كلامك صح وانا شفت جزء ما

**mahmoud19** · 14-02-2011 01:43 AM

المشاركة الأصلية كتبت بواسطة otefa

لو حضرتك لسه مش شايف الصورة بوضوح ممكن تسمع البيان الأخير هاتعرف أن تنحي مبارك أو بقاءه الي نهاية فترته ليس جوهريا(المكسب كان في الوقت ورجوع الحياة لطبيعتها الأنتاجية في أقصر وقت) ......... في الحالتين القوات المسلحة وعدت بتنفيذ المطالب الأصلاحية
ونصبر شوية وندعي أن الدنيا تمشي زي ماكلنا عايزين على كل المستويات في 6 شهور القادمة

مش فاهم ايه علاقت كلامك بكلامى!؟