الموضوع: عاجل للأهمية (أنا ضابط الشرطه)

---مع كامل احترامي واقتناعي الكامل ان التعميم غلط وفي كدة وفي كدة. بس خلوني فكر بصوت عالي:

1)-واحد جايب 92 حد اجبره انه يدفن نفسه ويدخل شرطة ويتساوي باللي جايب 60%.

2)-انه هيصحي الساعة 6 الصبح لمدة اربع سنين ( هو اللي اختار بمزاجه) ومش هو لوحده اللي بيصحي الصبح يعني . الطفل بيصحي برده عشان يروح مدرسته.

3)-هيتعامل مع ناس مش ولا بد ( حد قاله انه هيتعامل مع اكابر واكثر البشر اخلاقا بعد مايتخرج من شرطة).

4)-انه هيقبض 500 جنيه مع انه تعبه يستاهل اضعاف اضعاف هذا المبلغ ( هو اتفاجيء يعني بالمرتب ده ولا داخل وعارف كويس الظروف المادية للوظيفة اللي اختارها بمحض ارادته ).

5)-انه هيلف طول الليل فالشوارع وفي عز البرد ( حد قاله انه هيتخرج يشتغل مدير امن وهيعد علي مكتب فالتكييف ).

في نهاية كلامي واسف للاطالة بس انا عندي قناعة تااااااامة ان اللي بيقدم لكلية شرطة 3 اصناف:

1)-شباب عايز يضمن شغل بعد التخرج مباشرا فبيقدم لشرطة وكليات عسكرية والصنف في رايي غالبا بيكون محترم لانه داخلها بعد تعب ومجهود.

2)-ابناء الاثرياء .وبيدفعو الاف عشان يدخلو ولادهم شرطة. وبيكونو مش مستنيين ال 500 بتوع اول كل شهر بس محتاجين السلطة اللي تحمي الثراء.

3)-ناس داخلة وعارفة كويس ان الطريق الوحيد للفلوس باستخدام نفوذ هذه المهنة هي الطرق الغير قانونية ( اللي مفروض هما اللي بيحاربوها ).

وفالاخر: الشعب متجناش عالشرطة او علي ظباط الشرطة. بالعكس الشرطة هي اللي تجنت عالشعب وذلته سنين وسنين. ولو كان فيهم محترم فبدل مايلوم الشعب يلوم نفسه انه دخل نفسه وسط ناس اتاخد بذنبها. فاقل مايفعله هو استقالته مادام مش في ايده تغيير الفكر( انهم الاسياد والشعب عبيد).

تحياتي واسف للاطالة.

المشاركة الأصلية كتبت بواسطة تامر.محمد

برغم اتفاقي معاك في كل كلمة الا ان فعلا فيه اقلية محترمة فيهم

و نقطة المرتب القليل حقيقية , و عن نفسي شايف انها سبب فساد كبير في البلد
امين الشرطة اللي مرتبه قليل بيفرض اتاوة على سواق المكروباص عشان يعيش
سواق المكروباص بيغلي الاجرة عالزباين عشان يعوض الاتاوة
سواق المكروباص بيستهبل في السواقة و امين الشرطة بيحميه (عشان السبوبة)
مخالفات راحت عالبلد
الناس بتدفع اجرة اكتر
بيركبوا مع سواقين متهورين و قلالات الادب (محميين)
سواقين العربيات بيشتكوا من قلة ادب سواقين المكروباص
و اضرار تاني كتير بسبب بس قلة مرتبات امناء الشرطة

لكن ارجع و اقول , مش هما لوحدهم

المرتب القليل مش علي الناس بتوع الشرطة بس ياتامر بيه ( ظباط وامناء ) ده علي كل الشعب. لكن بتظهر اوي عندهم بسبب احتكاكم بالشعب في كل صغيرة وكبيرة من اول مايتولد ( استخراج شهادة ميلاد ) لحد مايموت ( شهادة الوفاة وتصريح الدفن ).

فهي ده بقي المشكلة انهم بيستخدمو سلطتهم في الحصول علي فلوس تعوض مرتبهم القليل. ولما تكلم حد فيهم يقولك احنا مظلومين فالمرتبات. فنمشي بمبدء اللي استغلال النفوذ بقي وكل واحد وعلي اد نفوذه وفالحالة ده مش هنقدر نقضي علي اي سلبيات في مصر

-المدرس يدي دروس خصوصية ويدبح اولياء الامور لانه عذره ان مرتبه قليل.
-اولياء الامور تسرق بقي عشان تعرف تعلم ولادها.
-اولياء الامور اللي شغالين في مراكز قيادية يدبحو الشعب بقي ويطلبو اكراميات ورشاوي عشان يعرفو يصرفو علي ولادهم لان مرتباتهم مش مكفية اكل وشرب ولبس وتعليم ودروس

ده مثال بس في حاجة واحدة قيس علي كدة بقي في كل حاجة.

فالمقصود من كلامي في المشاركة الاولي واسف للاطالة: ان مش مقبول خاااااااااااااااالص ان اي حد يلتمس لنفسه اعذار ويصور نفسه ضحية بسبب ظروف شغله ( وكمان لما يكون هو اللي اختارها بنفسه يبقي لا يملك ولا يصح ان يلتمس ااااااااااااااي عذر).

- لو اتنين مرتبهم 500 واحد ظابط شرطة والتاني متخرج من هندسة مثلا ومش لاقي شغل وبالعافية لقي شغل مدرس اي مادة علمية تفتكر مين فيهم اللي تلتمسله عذر ؟؟؟؟؟؟