السلام عليكم جميعا
طبعا يمكن الرد دلوقتى مش هيبقى ليه أى لازمة لأن الموضوع اتعمل من حوالى سنة وطبعا فى السنة دى حاجات كتير اتغيرت (الكثير للأحسن وللأسف فالبعض للأسوأ)
وطبعا لقيت 19 صفحة ردود ودة بصراحة كتير جدا انى أقراهم , أنا بصراحة ما قريتش غير أخر صفحة وأول صفحة .
بصراحة العنوان لفت نظرى بشدة وكمان أسلوب حضرتك جميل جدا ومقال أكثر بكثير من رائع
لكن اسمح لى احكى شوية عما يجول فى ذهنى .
من ناحية انا مقتنع بكلام حضرتك وفاهم انت عايز تقول ايه , بس من ناحية تانية أنا عارف كمية الرواسب الرهيبة الموجودة جوة المواطن المصرى ناحية الداخلية
وعايزتعرف انى مش بتكلم عن حضرتك لأن أنا واثق 100 % ان حضرتك انسان قمة فى الاحترام وفعلا الواحد يتمنى ان وزارة الداخلية كلها تبقى ناس زى حضرتك .
مش برضة الداخلية اللى قالوا فى الاسكندرية عن المواطنين(هما فاكرين نفسهم حاجة دا احنا اسيادهم )؟؟
مش برضه الداخلية اللى ضربوا خالد سعيد عشان نشر فيديو توزيع (الداخليه برضه ) لايراد الحشيش والمخدرات جوة القسم ؟؟؟
مش برضة الداخلية اللى فتحت السجون عشان المسجونين تهرب ويخوفوا المعتصمين فى التحرير بأنهم يجيبوا عناصر نسائية من الشرطة يتصلوا بالتليفزيون على انهم مدنيين ويصوتوا ويقولوا الحقونا ؟؟
مش الداخلية برضوا اللى مش عايزة تطلع تراخيص سلاح للمدنيين بحجة أن لو حصل مظاهرات تانى مايبقاش عندهم خسائر (مع ان السلاح المرخص دة صاحبة يتجاب من قفاة لو عمل حاجة) وسايبين المواطنين يواجهوا ناس بأسلحة الى بدون اى فرصه يدافعوا عن نفسهم برفض اصدار تراخيص سلاح ؟؟؟
أتمنى ان حضرتك تتفهم أسباب وجود غضاضة بين الناس وبين الداخليه
أنا متأكد 100 % ان كل الخلافات دى هتروح (والحمد لله ممكن ملاحظة انها تقريبا خلصت ) على أساس من الثقة المتبادلة وان الداخلية تشوف شغلها على اساس انها فى خدمة الشعب مش خدمة النظام .
أعتذر للاطاله وتقبل تحياتى