الي كل الشمتانين او الناقمين علي ظابط الشرطه. انا عارف ان معظمهم افتري كتير لكن حط نفسك مكان الظابط وراكب عربيتك ومعاك مراتك او بنتك وسواق المكروباص زنق عليك او خبطك ولما عاتبته او زعقت معاه شتمك ومسح بكرامتك الارض وحاول يعتدي عليك.. رد فعلك هيكون ايه؟؟ مش هتمسك فيه ولا هتسيبه يضربك؟ ولو طلع سلاح وحاول يضربك بيه وانت معاك سلاح هتدافع عن نفسك وتقتله ولا هتسيبه يقتلك؟؟ اذا كان القانون ما بيعاقبش علي القتل في حالة الدفاع عن النفس..
للاسف سواقين المكروباص10% محترمين وعايزين ياكلو عيش و 90% منهم بلطجيه وتجار مخدرات ومسجلين خطر ومعظمهم سايق وهو مبرشم وممكن يقتل علشان 5 جنيه..
احنا طالبنا بمعامله محترمه من الشرطه للشعب (للمحترم والشريف من الشعب) لان الشرطه كانت بتبلطج علي الكل ( الشريف والسوابق) وقصاد كده المطلوب مننا نحافظ علي هيبتهم علشان يقدروا يحمونا لكن واضح اننا ما عندناش وسط اما نسيبهم يفتروا او نكسرهم ونخليهم زي قلتهم .عاملين زي البغبغنات بنطالب ونردد من غير ما نفكر اللي احنا بنطالب بيه ده هيفدنا ولا يضرنا.. كلنا دلوقت بنطالب بتقليص صلاحيتهم وتكتيف ايديهم (علي الكل الشريف والبلطجي) وفي الاخر نطالبهم بحمايتنا!! هيحمونا ازاي وهم مش قادرين يحموا نفسهم؟؟؟ بعد ما كانت الشرطه بتبلطج علينا وفنفس الوقت بتحمينا بنسبة 10% من البلطجيه بقت البلطجيه بتبلطج علينا وعلي الشرطه ومفيش حد بيحمينا منهم!!!!!
لو كل واحد فكر ان البلطجي ده ممكن يوقفه هو ومراته او بنته في الشارع ويهددهم بالسلاح ويخطفها ويعتدي عليها هيعرف قيمة هيبة الشرطه ونعمة خوف البلطجيه منهم.. خوفهم اللي احنا بدون وعي بنساعدهم علي كسره والتخلص منه..
البلطجي الاول كان بيخاف وهو بيخطف واحده علشان يعتدي عليها احسن حد من الشرطه يشوفه ويقبض عليه وكان بيخطف في الاماكن المقطوعه وكانت الناس بتتجنب المشي في الاماكن ده. انما دلوقتي ولو استمر الوضع ده هيعملوا كده في عز الظهر وفي الاماكن العامه والمزدحمه ومش هيخاف من حد والشرطي اللي احنا بنتفنن في زله وكسره ( لصالح البلطجي والحرامي والسوابق) هيخاف يتصدي لهم علشان ما يتقتلش وهيقول لو قتلني محدش هينفعني...

ربنا يلطف بينا ويرحمنا جميعا ..