الموضوع: عايز اجيب رادياتير جديد ... هل من نصيحه

المشاركة الأصلية كتبت بواسطة Adham

بص روح الحرفيين عند واحد محترف امين و مضمون و يعرف ربنا مش بتاع اشتغالات اسمة خال البطيء

حوة حايظبطلك الردياتير لو بيسرب او مسدود حايصلحه تمام و لو مش نافع و محتاج تغيير حايقولك و يتصرفلك في غيرة غالبا

و بالنسبة لموضوع المروحه حضرتك ماينفعش انك تخللي المروحه شغالة على طول من غير ترموستات (دة بالنسبة للمروحه الكهرباء اما بالنسبة للمروحه اللي بتشتغل عالموتور دي بتبقى في المواتير اللي بالطول على كردان و دي بتسشتغل بكلاتش بيخليها تشتغل و تفصل و اعتقد ان عربيتك مش من النوع دة و انما موتور عرضي على كبالن مافيهوش مروحه عالطنبورة بتاعه الموتور بكلاتش)

المهم ان المروحه الكهرباء اولا حاتتحرق لو حضرتك مشغلها على طول
موتورها حايضعف و يخللي مش بتلف بسرعه كافية لعمل تيار هواء يبرد السيارة و بعدين حاتتحرق- لازم تشغلها بترومستات لأنها لا تتحمل التشغيل المتواصل

ثانيا ان المروحه الشغالة على طول مش حاتخللي الموتور يوصل لحرارة التشغيل المثلى في الجر البارد او العادي او في طريق مفتوح و بالتالي حاتلاقي العربية بتقطع و بتنتش و بتاكل بنزين و تبطل منك الصبح بعد ماتحتاج وقت لتسخينها
ودة بالضبط اللي بيحصل كمان عند الغاء ثرموستات الكوعه اللي كل ميكانيكية بلدنا الفتكين الفتايين بيلغوة

لازم ثرموستات مروحه و ثرموستات كوعه يبقى شغال

و بالنسبة لتغيير ردياتير السيارة حضرتك ابعد عن الفتاوي و هات ردياتير السيارة الاصلي لأنة بيبقى معمول و محسوب حجمة و كمية المياة جواة على احتياج تبريد موتور السيارة و قوة الطلمبة و لو حد افتى و جابلك ردياتير كبير عن الاصلي و عدد مواسيرة زيادة و غيرة مش شرط انك تلاقي العربية مرتاحه وممكن تلاقيها بتسخن نتيجة ان كمية المياة كتير جوة الردياتي و قوة الطلمبة بتاعه الموتور مش معمول حساب الحجم دة و بالتالي سريان المياة من الردياتير للموتور و كذلك دوران المياة داخل الردياتير اقل من ان يسمح بتبريدة غير انة مش وضع سليم و يعيب العربية لو حبيت تبيعها

هات ردياتير العربية نفسة من حيث الحجم و من حيث الخامة يعني لو الاصلي الومنيوم يبقى هات ردياتير الومنيوم و لو نحاس هات نحاس و بنفس عدد المواسير و الابعاد

و ممكن تجيب سربنتينة درياتير جديدة فقط و تركبها عالعلب الاصلية اللي عندك

فية مصنع اسمة الشيخ في شبرا بيعمل كل انواع السربنتينات النحاس بمختلف ابعادها جديدة و بتتركب عالعلب الاصلية بتاعه الردياتير لو كان سليمة ومش متآكلة

تحياتي و ربنا يوفقك,

الف شكر يا باشا ربنا يكرمك ... اسف والله لسه شايف ردك حالا

انا كنت نازل دلوقتي أغير الردياتير فعلا ...

أول حاجه أخذت بنصيحة الاخوه ورحت الزقازيقي في شارع احمد سعيد ونضف الردياتير الاصلي بتاعي تنضيفه محترمه وقالي انه كويس وماتغيروش .

لاحظت بعدها ان مشكلة الحرارة زي ماهي ... سألت الكهربائي والميكانيكي قالولي العربية مافيهاش حاجه اكيد الردياتير عايز يتغير والميكانيكي نصحني فعلا بالردياتير النحاس الالماني .

الحقيقة بعد كلام حضرتك انا مش عارف دلوقتي ايه الحل ؟ عموما هروح لخالد البطيء اللي بتقول عليه واخد رأيه بس يا ريت العنوان بالتفصيل .

بالنسبة لموضوع المروحه انا عندي الماتور بالطول على كردان والمروحه شغاله بكلاتش بس شغاله على طول مابتفصلش وكمان ثرموستات الكوعه مفصول من زمان ... انا مع حضرتك ان ده عيب في الشتا بس ادينا في الصيف وانا دايخ مع الحرارة دي .

بجد عاايز نصيحه يا جماعه ... ده حتى التكيف صلحته ومش قادر اشغله عشان الحرارة معاه بتزيد اكتر ( هي كده كده بتزيد بس معاه بتزيد اكتر )