الأيام دي الكلام كتر عن حل جهاز مباحث أمن الدولة. المعارضين لحل هذا الجهاز بيقولوا انه جهاز أمن قومي وان كل الدول المتقدمة فيها جهاز استخباراتي داخلي. فعلا، بس جهاز امن الدولة صلاحياته أكبر بكتير من أجهزة الأمن الداخلي الموجودة في أي دولة متقدمة. باختصار، جهاز امن الدولة في مصر بيتحكم في الحياة السياسية في مصر و المجتمع المدني.

ده ردي لبعض الأخوة الأعضاء المعارضين لحل جهاز أمن الدولة.


اقتباس المشاركة الأصلية كتبت بواسطة م.احمد زكريا مشاهدة المشاركة
في ظل الديمقراطية الغحنا متعشمين نعيشها

ارفض كل اراء الكاتبة واسلوبها وافكارها وتكهناتها وحتى مطالبها

لما أمريكا تلغي الـ fbi نبقى نحل امن الدولة

لما يكون حكومة عمرها 6 شهور ومش عاجباها امال لما تكون حكومة بجد هاتعمل ايه

مش هاكتب حاجة تاني ..... بس خلاص
حضرتك عارف ايه اختصاصات جهاز مباحث أمن الدولة وايه اختصاصات الـ fbi؟

الـ fbi بتحقق في الجرائم الجنائية على المستوى الفيدرالي أو جريمة محلية كبيرة زي سرقة بنك ... مش أكتر. يعني لو عمليات قتل متكررة في أكتر من ولاية، الـ fbi هو اللي يحقق فيها مش البوليس المحلي.

أما أمن الدولة في مصر مهمتها حماية النظام وليست حماية الأمن القومي. يعني معظم شغل أمن الدولة سياسي ... لا هو جنائي ولا أمني.

أمن الدولة لها مكاتب متخصصة لمراقبة والتحكم في النقابات و الأحزاب و الجامعات ووسائل الاعلام وجمعيات المجتمع المدني.

يعني لو دكتور في الجامعة توجهاته معارضة عمره ما هيبقى وكيل الكلية. وبالطبع عمره ما هيكون عميد أو رئيس جامعة.
يعني لو قيادي عمالي له توجهات يسارية مايدخلش اللجنة النقابية للعاملين في مؤسسته. يعني اتحاد عمال مصر على سبيل المثال كله تحت سيطرة أمن الدولة.
يعني جمعيات حقوق الانسان والجمعيات الخيرية تحت مراقبة أمن الدولة.
يعني وسائل الاعلام متراقبة بأمن الدولة.
يعني أي واحد يتوظف في أي وظيفة حكومية لازم موافقة أمن الدولة. مع ان الصحيفة الجنائية كفاية انها تثبت انه ملوش سوابق.
تفتكر مين كان بيتصل باستاذ كريم منير يحذره لما الأعضاء يزودوا الكلام في السياسة هنا في المنتدى؟ ظابط في أمن الدولة.

حضرتك شوفت الفيديو بتاع خالد صلاح رئيس تحرير اليوم السابع؟ دي مكالمة سكايب متسجلة ما بينه وبين ابن ممدوح اسماعيل. مين اللي مسجل المكالمة دي؟ أمن الدولة.

مال ده كله بالأمن القومي؟
أمن الدولة مطلوب تقليص صلاحيتها للارهاب والمخدرات والجرائم الكبرى وبس.

مش مطلوب حل الجهاز بالكامل، المطلوب الغاء اختصاصاته السياسية وقصر اختصاصاته على الأمن القومي.