مساعدة من أصحاب السوزوكي والديهاتسو

**w_elfaham** · 06-04-2008 10:11 PM

السلام عليكم ورحمة الله وبركاته
أنا سعيدة جداً لانضمامي لهذا المنتدى وحقيقي استفدت كتير جداً من أرائكم عن السيارات المختلفة بس بصراحة أنا محتاسة جداً بقيت مش عارفه أي حاجة
أنا محتارة بين سوزوكي ماروتي ، سوزوكي ألتو ، سيريون
مع العلم أن هذه أول سيارة أقتنيها فأنا حديثة العهد بالقيادة وأريد سيارة تتوافر فيها الجودة العالية وسعر قطع غيار منخفضة وتكون متسعة من الداخل وشكلها صغير خارجياً وتكون سلسة في القيادة
فهل من مساعد؟؟؟؟؟؟؟؟؟؟؟؟؟؟

**m10_10** · 06-04-2008 10:45 PM

لا مجال للمقارنه يا اختي العزيزة...

الماروتي 800 سي سي والالتو منها 800 ومنها 1100 سي سي والسيريون منها 1300 ومنها 1500 سي سي...

انا مش عارف تفاصيل دقيقه عن الماروتي والالتو غير اني ركبتهم ومساحتهم الداخليه لا تقارن بالسيريون..

ماجربتش اسوقهم ولا اعرف ادائهم - السيريون بسوقها دلوقتي وماشاء الله حاجه كدة من الاخر...

نصيحتي بكثرة الاستخارة ومحاوله ركوب العربيات كلها والمقارنه بينهم وتشوفي ايه اللي مرتحاله...

**w_elfaham** · 06-04-2008 10:53 PM

أولاً شكراً على استجابة حضرتك السريعة
ثانياً 1500 سي سي ايه بس يا فندم حضرتك فهمتني غلط دي ب 90000 ألف رايح فين حضرتك بس
بصراحة أنا كنت معجبة بيها بس واحد زميلي في الشغل قاللي السريون قطع غيارها غالية جدا ومتعبة في اعادة البيع بتاعها اذا فكرت أبيعها

**m10_10** · 06-04-2008 11:07 PM

اولا انا عارف والله... بس اصلا المقارنه غريبه بين ال3 عربيات واحده في التلاتينات وواحدة في الاربعينات وواحدة في السبعينات...

وكمان انا بقول العربيه فيها وفيها...زي ماقلت الالتو فيها 800 وفيها 1100...

ثانيا لو قارنا اسعار قطع الغيار بين التلاته طبعا السيريون اغلي ...
انما لو قارنا صح هاتبقي مقارنه بين السيريون وبين عربيات تانيه في نفس الفئه الموتوريه والسعرية وهتلاقي ان السيريون قطع غيار معقوله جدا بل من ارخص القطع ...

كفايا انها عربيه ياباني مش محطوط فيها مسمار خارج اليابان...

وحته اعادة البيع مابحبش اتكلم عليها لان السوق المصري عايز العربيه اللي كل الناس بتركبها وانا مش بحب احكم كدة..
انا افضل ادرس احتياجاتي في العربيه وانهي عربيه توفرهالي علي حسب امكانياتي..

انما ممكن تكون الماروتي والالتو هم الانسب لاحتياجاتك فبالتالي يكونو احسن من السيريون...

**NaderNabil** · 06-04-2008 11:23 PM

يا ريت الأول قبل تحديد نوع العربية تحددي ايه المبلغ المتاح....هي العربيات كلها كويسة جدا بس كل واحدة في فئتها السعرية....

**w_elfaham** · 06-04-2008 11:59 PM

شوف يا سيدي أسباب الحيرة
بالنسبة للماروتي فكل العالم بتنصحني بيها بس أنا شايفه انها ضيقة من جوه ومش حتنفع اي حاجة

الألتو ميزتها انها سوزوكي ياباني وشكلها جميل وابقى ما بعدتش عن السوزوكي

الدايهاتسو باحبها كشركة محترمة ونظراً لأن لي صديقة تعرضت لحادثة ولولا صاج السيارة كانت زمانها ..............

أما بالنسبة للميزانية فحدود السيريزن هي أخر حاجة يعني ده حائط الصد بتاعي

**NaderNabil** · 07-04-2008 12:37 AM

يبقي لأكيد السيريون:)

طالما الفلوس الحمدلله متوفرة ...اذا لا داعي لشراء سيارات صغيرة جدا ذات موتور صغير لا تحتمل الأحمال الثقيلة و التكييف...

الماروتي و الألتو كويسين في فئة التلاتين و الأربعين ألف لكن مايبقاش معايا أكتر منهم و أجيبهم برده:)

**SEATLOVER** · 07-04-2008 02:05 AM

ً اهلاً بيكى معانا فى المنتدى
انا قريت موضوعك كويس
حل حضرتك هو الاتى
جديد - الالتو 800 كاملة
مستعمل - بيكانتو 2006
ولو عايزة رآيى يبقى بيكانتو

**hazem_khidr** · 08-04-2008 08:24 AM

اهلا بيكي في المنتدي:)
بالنسبه للعربيات اللي بتختاري منهم يبقي السيريون احسنهم بلتاكيد.
ممكن توسعي دايره اختياراتك و تضيفي البونتو كلاسيك كمان مع السريون
بس السريون احسنلك و حتركبي عربيه محترمه فعلا و مناسبه ليكي

**m10_10** · 08-04-2008 11:29 AM

المشاركة الأصلية كتبت بواسطة w_elfaham

شوف يا سيدي أسباب الحيرة
بالنسبة للماروتي فكل العالم بتنصحني بيها بس أنا شايفه انها ضيقة من جوه ومش حتنفع اي حاجة

الألتو ميزتها انها سوزوكي ياباني وشكلها جميل وابقى ما بعدتش عن السوزوكي

الدايهاتسو باحبها كشركة محترمة ونظراً لأن لي صديقة تعرضت لحادثة ولولا صاج السيارة كانت زمانها ..............

أما بالنسبة للميزانية فحدود السيريزن هي أخر حاجة يعني ده حائط الصد بتاعي

نمسك الكلام واحدة واحدة....

بالنسبة للماروتي فكل العالم بتنصحني بيها بس أنا شايفه انها ضيقة من جوه ومش حتنفع اي حاجة

يبقي انتي عايزه عربيه واسعه ...
العالم اللي بينصحو مش هما اللي هايتزنقو ويتخنقو من ضيق العربيه...

الألتو ميزتها انها سوزوكي ياباني وشكلها جميل وابقى ما بعدتش عن السوزوكي

انا شايف ان الالتو كمساحه ماختلفتش كتير عن الماروتي...

الدايهاتسو باحبها كشركة محترمة ونظراً لأن لي صديقة تعرضت لحادثة ولولا صاج السيارة كانت زمانها ٠٠٠٠٠٠٠٠

وكمان

أما بالنسبة للميزانية فحدود السيريزن هي أخر حاجة يعني ده حائط الصد بتاعي

خلاص يا حاجه ليه لو عندك امكانيه تشتري عربيه واسعه تستغني وتقولي اسمع كلام الناس اللي بيقولو عالسوزوكي ...

ولعلمك كلام الناس ده اتفق معاهم تماما علشان الوكيل محترم للغايه وعمل سمعه حلوة قولي للعربيه. انما كاداء للعربيه يبقي السيريون طبعا عشان ماينفعش نقارن عربيه ٨٠٠ مفهاش كماليات بعربيه ١٣٠٠ كماليات ممتازة..