أهلا بيك معنا يا كريم
عرض للطباعة
أهلا بيك معنا يا كريم
انا محمد من اسوان سافرت القاهرة من 6 شهور جبت فليشيا 95 ولما رجعت والدى اخدها منى رحت جايب وحده تانى بس 97 بصراحه الفليشيا عربيه جمييييييييييييله جدا وشكلى هسيب السياحه قريب واشتغل فى قطع غيار الفليشيا لانه مفيش حد بيجيب قطع غيارها على الرغم من وجود ما لايقل عن 20 عربيه فليشيا فى اسوان
كان عندي استفسار للفلشياويه لو حد ممكن يساعدني
انا لسه جايب العربيه من فتره قصيره و في شوية حاجات مضايقاني اهمهم اضائة التابلوة خافته جدا و المريا الشمال هي كهرباء
هل فيه حد عنده مانيوال او يقدر يقلي الحاجات دي تتعمل فين او حتى يشرحلي افكهم ازاي انا اتعامل
انا عيز اشترى فليشيا glx تنصحونى بموديل كام وياريت يكون ليها حل لمشكلة السخونة دى
انا معايا GLx 97 وعندى مشكلة السخونية مع السرعة العالية وروحت لواحد بتاع رادياتيرات نضفلى الرادياتير وسربانتيتة التكييف بس المشكلة لسة موجودة مع العلم انى لسة مغير جوان من شهرين بالظبط والمشكلة دى مخليانى خايف اشحن التكييف واشغله ...الغريب ان العربية مابتسخنش خالص فى الزحمة وفى السرعة القليلة
بس بصراحة باستثناء العيب دة العربية والحمد لله مافيهاش اى مشكلة ولو مشكلة السخونية اتحلت وشغلت التكييف مش هفكر ابيعها ابدااااااااااااا
الحل في هذا الموضوع
http://www.nilemotors.net/Nile/226010-a.html
حل اضاءة التبلوة بسيط جدا ................ هو ان اغلب المبات اتحرق ؟؟؟؟؟؟؟ لازم تغير اللمبات ..... انا غيرت بعض اللمبات في عربيتى ... اللمبة من 2.50 الي 3.75 جم وعايز كهربي يفك التبلوة ... بس لازم تروح لواحد بيفهم مش اي كهربائي والسلام انضف واحد روحله.
وخلي بالك ديه فيها اكثر من 30 لمبة
السلام عليكم أخوكم محمد من القاهره انا معايا فليشيا 96 ومغير المكنه بالفتيس 98 بس في مشكله ان العربيه على السرعات العاليه مؤشر الحراره بيعلى فوق 70 شويه هل ليها حل ولا ده الطبيعي وممكن اركب تكيف ولا ممكن يسبب مشاكل مع إن العربيه في السرعات القليله والتوقف الدائم في الطرق بسبب الزحام المؤشر بيكون على 70
لا يا باشا ما تقولش كده لحسن تتحسد
الحراره طبيبعى لغايه 90 ما تقلقش
بس قولى المكنه ال98 بكام بالفتيس وياترى 1300 و 1600
واشرح لنا حاله العربيه والتوب سبيد بتاعها كام
السلام عليكم
انا حابب استفيد بخبراتكم في الفيليشا 1997 اذا سمحتم
العربية بتفصل مني لو ماشي هادي او سريع و بنعمل حاجة من اتنين يا اما بنزق العربية و بتدور على طول او بستنى مدة ممكن توصل لنص ساعة و ادور تاني على ماتلقط
الحاجات اللي عملناها و غيرناها (الموبينا و الاسلاك و البوجيهات و نظفنا الرادياتير و تحت العمة و غيرنا فلتر البنزين)
انا بحط بنزين 92 و البطارية جديدة و مش مشكلة مارش عشان بتلقط اول ماتتزق و في اوقات بتشتغل زي الفل
انا وديتها لاكتر من ميكانيكي و كهربائي و كلهم اتفقوا ان مفيش مشكلة خالص و بيرموني على بعض!
اتمنى اني اكون وضحت المشكلة صح و شكرا مقدما لردودكم
معايا فيليشيا 96 مشكلتى الصوت عالى .ما المطلوب لتكون ناعمة؟
الاخوة مالكي الفليشيا الكرام انا معروض عليا تكييف فليشيا كامل استيراد بسعر 2000 جنيه وعاوز اعرف هل تركيب التكييف الاصلي بتاعها افضل ولا اجيب ياباني جديد وايه هي التكاليف الى هتبقى مع التركيب ياعنى الموضوع هيتكلف كام من اول شراء التكييف لغاية ما اشغله في العربية وجزاكم الله خيراً
السلام عليكم
النصيحة في موضوع التكييف اشتري ياباني جديد بالكرتونة أفضل وده عن تجربة. اولا الاستيراد مش مضمون زي الجدي وبالذات للكباس، ثانيا تكييف الفيليشيا الأصلي تبريده أقل من الياباني، ثالثا الكويل في الياباني هيكون جوه التابلوه أما الأصل في حوض الموتور وده هيقلل من درجة التبريد، رابعا السعر بتاع الجديد 2700ج والفرق مش كبير بالنسبة للاستيراد وان حضرتك مش هتركب تكييف كل يوم. وبالتوفيق
بس يا باشا كل المشكلة فى سير الكاتينة غيرة مش حتسمع صوت للعربية خالص مع تظبيط التاكيهات انا لسة عامل كدة الاسبوع اللى فات
معايا فليشيا 96 جايبها من حوالي 4 شهور وظهرت مشكلة السخونة في الصيف (اول عربية ليه)
انا عندي مشكلة السخونة على السرعة العالية (يعني بتجيب اعلى من 90 في الوقت الحار جدا) و بتوصل سعات ل110 (من كام يوم كان درجة الحرارة الخارجية 40, المهم الميكانيكي قالي ان مافيش حاجة في الماتور هو بص عليه من بره سمع صوته و كده وقالي ان الجو وحش وعادي جداً!!! انها توصل 110!!!!
جربت أغسل الرداتير هو شكله كده المونيوم 2 ماصورة(معلشي اصلي جديد في الموضوع) بس هي لسه بتسخن بتجيب ساعات 100 و ساعات تبقى 90, وده كله من غير ما أشغل التكيف, أنا عندي مروحة واحدة حاولت اركب مروحة تانية الكهربائي قالي مفيش مكان!!!! المروحة اللي عندي 2 سرعة و انا أصلا بشغلها مانيوال في الايام الحر من عند 70 كده, المشكلة لما درجة الحرارة وصلت 110 مشوفتش بخار طالع وانا سايق ولا حصل اي تخريف في العربية مع ان 110 معناه اني عديت درجة الغليان, انا مش عارف أعمل ايه بجد
أغير الرداتير
ولا ركب مروحة أكبر أو مروحة تانية (حد ركب مروحتين في فليشيا 96 قبل كده)؟؟؟
وليه المشكلة بتظهر على الطريق السريع بس ليه مش في الزحمة؟ انا شاكك ان مفيش هوه بيخش من وش العربية حاسس ان فتحة صغيرة قوي
سلام عليكم انا وائل من اسكندريه ومعايا
فليشيا كومبى 96
بقالها معايا دلوقتى حوالى 7 شهور
هى كويسه واعتماديه لكن مش بتاعت شقى اوى
انا بحب احرق على الغيارات واجمع واجرى لكن كل شىء ليه وقتوا مش فى العموم
المهم يعنى العربيه كويسه فعلا وبتحمل الشقى والشيل وكدا
لكن مشكلتها الموتور صغير على حجم العربيه لانوا عربيتى كومبى ........
سؤال يا جماعه انا بفكر ابيعها واشوف حاجه تانيه
او لو حد عندوا فكره هل ممكن اسقط لها موتور اكبر شويه يكون 1600 مثلا لانوا ال 1300 مش عاجبنى خاااااااااااالص
ياريت يكون فى حد منك يا جماعه عندوا الافاده
واتمنى التواصل دايما
انا معايا فلشيا 95 اللون ازرق عاوز اعرف كيفيه ضبط الكربراتير وصيانه السيارة
يا جماعة حد يعرف سعر تغيير الزجاج الامامى للفليشيا كام
شكرا لردك واهتمامك
انا احمد ضياء
عندى فليشيا 97 glx جبتها من 5 اشهر
هقول بعض المشاكل اللى واجهتنى فى المدة دية وازاى اتحلت
المشكلة الاولى :اول ما جبت العربية كانت مبتسحبش كويس وكان فيها مشكلة تانية بتطفى منى لما اجى اهدى السرعة وكانت شغالة على بنزين 80
الحل: المشكلة كانت فى مسمار الهواء والبنزين والاسبراتير مكنش مظبوطين كويس وتم الظبط على العداد الكهربائى للميكانيكى وتم الحل وايضا تم تنضيف الكربياتير
المشكلة الثانية:بدات العربية تنتش جامد لما ادوس بنزين على اى غيار ورجعت مبتسحبشى
الحل:تغيير طقم اسلاك البوجيهات وتم الحل
المشكلة الثالثة : لمبة الدينامو تنور وسعات تنطفئ
الحل: تغيير كتاوت الدينامو (محدش يشترى الكتاوت الصينى 45جنية ياما الاصلى 145جنية او يروح لكهربائى شاطر ويلغى الكتاوت الداخلية بكتاوت خارجية صناعة تركى 25جنية زى ماعملت انا وشغالة زى الفل
نسيت اقول انى فى الاخر قولت اجرب بنزين 92 والصراحة فى فرق كبير فى سحب العربية ويستحق التغير وخصوصا انى قرات الكتالوج مكتوب فية لاتضع بنزين اقل من 91
(على العموم اللى بيسوق عربيتة كتيير ممكن يستعمل 80 عشان ميتخربش بيته)
والبقية تاتى ........
لسة عندى ثلاث مشاكل
التكييف محتاج صيانة بيطلع هواء فقط شغال مروحة (عايز حد محترف تكييف)
عندى باب من الابواب الماكينة محترقة لايقفل سنتر لوك يقفل يدوى (عايز حد محترف ايضا)
مؤشر الحرارة لايتحرك مع العلم ان المروحة والثرموستات شغال والكهربائى قالى غير ماكينة الحرارة فى العربية واشترى واحدة جديدة وناوى اشتريها بعد يومين وجارى الحل
على الرغم من كل هذة المشاكل بس الصراحة العربية جامدة جدا ولما تضعها فى مواجهة اى عربية فى نفس جيلها بتتفوق عليها بكتيير ومش محتاج انك تغيرها بعربية جديدة لانك مش هتحس بفرق كبير الا لو هتشترى عربية فوق 80 الف جنية جديدة لان مع احترامى معظم العربيات صجها ورق وكمان مع اى مطب جامد سلملى على العفشة
وسلامى لكم جميعا
سكودا فيليشيا فعلا عربية محترمة جدا، ومتميزة عن عربيات كتير جدا من نفس الفئة والعمر، أهم شيء في الحفاظ عليها وعن تجربة هو صيانتها عند متخصص سكودا فاهم ومحترم وأمين، وبكدة العربية هتشرفك في كل الظروف والأوقات.
طيب يا جماعه انا هحط زيت قريب وانا دايما بحط زيت موبيل سوبر 5000 هل في زيت افضل منه وكويس؟
موضوع يستحق التثبيت الفلشيا عروسة الأسفلت بصراحه بحبها بسخونيتها بحبها بصوت الجنزير (الكاتينه ) بحبها بصوت بليه الدبرياش اللى عمال وش وش وش على طول وبحبها بمشكلة ترشيح الزيت من الفتيس برضوا بحبها....
تكمله للمشاكل اللى قبلتنى وحلتها
زى ماقولت قبل كدة الدينامو كان مش شغال وبوظلى البطارية. على العموم انا مزعلتش عليها لانها كانت نسر فارتا السائله
رحت شارع احمد سعيد واشتريت من شركه صبرى بطارية اسيدلكوا جافة وبدلت البطارية ودفعت 410 جنية بس هو عمل معاية واجب فى تمنها لانها اغلى من كدة
والعربية شغاله زى الفل
نسيت اقول انى اشتريت النهاردة ماكينة حرارة اصلى (صباع حرارة) من سكودا اللى بعد كبرى لتجنيد بس شكلة كان غالى والله اعلم انا اشتريته 35 جنية وهحاول اركبه بنفسى
وربنا يوفق
والبقية تاتى ...............
وسلامى للجميع
عايز ادخل العربيه عمره كامله متكامله
المهم نا دلوقتى بشترى الحاجات واشيلهم عشان كل شهر يعنى لما اقبض بجيب حاجه
عايز اجيب بقى رفرفين قدام وشبكه اماميه والكاوتش اللى فوق البيبان اللى تقريبا اسمه (جريد ) اللى هو من فوق على السقف فى الجناب
وطبعا هجيب فوانيس والحاجات دى كلها
وكمان عندى العتب رااايح فى داهيه بايظ خالص وفى بارومه كتير فى العربيه
بس طلبى منكم بقى حد يقولى اسعارف الرفارف الاماميه والجرايد والعتب وبقيه الحاجات دى كام ؟؟
فكره جميله ان يكون فى تجاوب و نفيد بعض فى معالجه الاعطال . انا معايا فيلشيا 97 . تحياتى لجميع الاخوه الاعضاء
فرسان الفيليشيا ما شاء الله عليهم، العربية فعلا مش كلام تستحق الأهتمام والرعاية لأن فعلا وعن تجارب مفيش عربية من نفس الفئة تتميز بمميزات الفيليشيا زي:
1- أوروبي
2- ثبات واتزان في السرعات والدورانات
3- متانة هيكل وصاج
4- صالون مناسب بالنسبة للحجم ومنافس للسيارات الصغيرة
5- شنطة معقولة جدا
6- قطع غيار متوفرة وبأسعار جيدة
7- نادرة الأعطال (لو سليمة)
8- تتحمل المجهود الشاق والاستخدام القاسي
الموضوع ومافيه هو بس قاعدة بيانات قوية ومتينة تتخذ كمرجع لكل فرسان الفيليشيا، وتشمل:
1- قائمة شاملة لكل تجار قطع الغيار الجديدة والمستعملة بأرقامهم وعناوينهم (المحترمين منهم ليتم التعامل معهم)
2- قائمة شاملة لكل التجار النص كم للحذر منهم وعدم التعامل معهم.
3- قائمة لورش الصيانة والفنيين المتخصصين
4- بيان الأسعار لقطع الغيار والوصف الفني والنوعية، حيث تواجد الفترة الأخيرة لجميع السيارات قطع غيار مضروبة.
5- نصائح وتجارب عملية لفرسان الفيليشيا لتداول الخبرات لصيانة الأعطال والوقاية منها، وحلول المشكلات الشائعة.
6- .... مش فاكر بس أكيد حاجات تانية السادة الزملاء ممكن يقترحوها
أحب أشترك معاكم فى الرابطة أنا عندى فليشيا 96 لسة شاريها من شهر و أحب أشارك النقاش حولها
الرفرف الامامى كنت جايبه من سنة 130 جنيه من شارع صلاح الدين
الجرايد نادرة شوية لكن ممكن تلاقيها عند سعيد نصار فى عزبة سعد 100 تقريبا
العتب عملته عند السمكرى عمولة ومش هايكلف كتير مش فاكر كام
الفوانيس نصيحة عن تجربة هات ماركة اسمها ديبو اغلى شوية لكن محترمة كنت جايب الخلفية الفانوس الواحد 120