مقارنه بين e39 و e46

**kliken** · 05-03-2011 02:27 AM

السلام عليكم انا بصراحه اول مره اشارك فى قسم بى ام بس بصراحه متابع جيد من فتره للقسم و فعلا فى ناس كتير هنا محترمه جدا و بتساعد كتير اللى محتاج للمعلومه
و تقريبا كل المعلومات اللى اعرفها عن البى ام كلها من القسم هنا
انا نويت ان شاء الله انى اجيب بى ام الفتره الجيه بعد حيره بصراحه من الجديد زى النترا او سيراتو او مستعمل زى هوندا و تويوتا موديلات فوق 2008 بس بصراحهحاسس ان البى ام ركوبه و عربيه افضل رغم ان الموديل هيكون اقدم طبعا
انا حاليا محتار جدا بين e39 520 يفضل موديل حتى 2000 علشان يكون لسه 2000سىسى مش 2200 سىسى على حد علمى و بين e46 318 موديل 2001 او 2002 علشان يكون فتيس الجديد
و المقارنه من حيث:
-اسعار قطع الغيار
-مشاكل فى العربيه حاجه مثلا بتبوظ بصفه دوريه
-الكماليات اللى بتنزل مع العربيه زى مثبت السرعه الطاره و هكذا
عاوز اعرف يعنى تقريبا انه افضل كعربيه و ممتعه فى سواقتها و هى هتبقى فى الاغلب استخدام فى السفر لان معايا عربيه تانيه هتبقى معايا جوه البلد
و شكرا

**inspiron** · 05-03-2011 07:46 PM

الـ e39 حاجة و الـ e46 حاجة تانية خالص.مينفعش مقارنة بينهم..وطبعا الـ e39 أحسن من كل النواحي.لكن الـ e46 مش وحشة طبعا.

**inspiron** · 05-03-2011 10:10 PM

المشاركة الأصلية كتبت بواسطة kliken

شكرا لرد حضرتك عن استفسارى
لكن هل فى فرق فى اسعار قطع الغيار بين العربيتين فرق كبير يعنى
و بعدين التكييف بتاع البى ام عامه قوى و لا مقبول
و اخيرا يا باشا ليه فى فرق فى اسعار العربيتين بس لصالح e46 بحس ان الناس بتطلب مبلغ اكتر شويه فيها
و شكرا

أولا يا باشا أنا معنديش فكرة أوي عن فروق الأسعار بالنسبة لقطع الغيار..لكن عموما طالما هتركب بي إم يبقي علي الحرفيين عدللللل والأسعار زي الفل في كل حاجة..وطبعا أي شغل في العربية نصيحة مني في مركز المهندس منصور في جسر السويس.

ثانيا...أنا هعلق علي تكييف الـe39 لأن هي اللي معايا...مش هقول عليه غير...الله أكبر عليه.

ثالثا...أختلف مع حضرتك في نقطة السعر لأن دي بيرجع لمقياس حالة العربية..ومن النادر إنك تلاقي e39 بحالة نادرة..ولو لقيت بيبقي سعرها عالي مقارنة بسنة الصنع..

**kliken** · 05-03-2011 11:00 PM

اللى اقصده فعلا و حسب الكلام اللى قريته كتير هنا طبعا من مشاركات الاعضاء فى قسم بي ام ان قطع غيار e39 اغلى شويه من e46 و فى كتير معروض للبيع موضوع نضيف او لا بيبقى بعد المعاينه و الكشف على العربيه بس انا فعلا محتار بين العربيتين e39 اكبر و افخم شويه بس هتبقى موديل اقدم شويه علشان تكون 2000 سى سى لكن e46 هتكون احدث شويه كموديل لكن شكلها تحسه شبابى اكتر و اظن من متابعتى للاسعار e46 موديل فوق 2001 بتبقى اغلى شويه من e39 520 موديل حتى 96 حتى 2000 علشان بتكون 2000 سى سى لسه

**elfashn** · 06-03-2011 12:20 AM

انا مع الرأى الى بيقول انه مفيش مقارنه بين الاتنين دى فئه ودى فئه تانيه كل فئه لها مالها وماعليها وانا شخصيا جه عليا وقت كانت بفكر وبفاضل بين الاتنين وكنت ميال اكتر لل39 مريحه اوى فى السفر فخمه برستيج واسعه محترمه اوبشنز على حسب الموديل بس مصاريف التشغيل والصيانه كانت عاليه بالنسبه لدخلى الحالى فلغيت الفكره مؤقتا

**kliken** · 06-03-2011 10:54 AM

انا معاكو يا شباب ان دى فئتين مختلفتين علشان كده انا كنت بقارن فى نقط معينه
اسعار قطع الغيار
استهلاك البنزين
قوه التكييف
الكماليات اللى يتنزل مع الموديلين دول على سبيل المثال انا معرفش مثلا هى 520 ما قبل 2000 كانت بتنزل كلها فتيس اتوماتيك و لا فى منها ستيب
و فى الآخر اكيد هستخير ربنا

**TheBuccaneer** · 06-03-2011 01:48 PM

المشاركة الأصلية كتبت بواسطة kliken

انا معاكو يا شباب ان دى فئتين مختلفتين علشان كده انا كنت بقارن فى نقط معينه
اسعار قطع الغيار
استهلاك البنزين
قوه التكييف
الكماليات اللى يتنزل مع الموديلين دول على سبيل المثال انا معرفش مثلا هى 520 ما قبل 2000 كانت بتنزل كلها فتيس اتوماتيك و لا فى منها ستيب
و فى الآخر اكيد هستخير ربنا

السلام عليكم. طبعا أنا متفق مع كل الأعضاء فى أن ال e39 فئه و ال e46 فئه ثانيه. بالنسبه للسعر فهو لصالح ال e46 بمعنى أنك بمبلغ x تقدر تشترى e46 موديل اعلى من موديل ال e39 هذا بالنسبه للحالات النظيفه.

أسعار قطع الغيار لصالح ال e46 لأن أسعار قطع غيار ال e39 غاليه جدا, على سبيل المثال 2 فوانيس أماميه رينجات ب 3000 جنيه أستيراد, عفشه خلفيه تقريبا ب 1800 جنيه بدون مساعدين إلخ...

استهلاك البنزين هيكون لصالح ال e46 لأن ال e39 محركاتها 6 سليندر و بالتالى استهلاك البنزين اكبر بعكس ال e46.

بالنسبه لسعة المحركات ما بين ال e46 و ال e39 هذا على حسب موديلات السياره. على سبيل المثال ال e46 1999 - 2001 يوجد بها محرك يعرف بالكود m43tub19 بسعة 1895 سى سى قدرة 118 حصان. منذ نهاية عام 2000 زودت ال e46 بالفتيس الأستيبترونيك مما يعنى إنه ليس بقاصر على موديل 2001 فقط فهو موجود بال e46 منذ نهاية عام 2000. ال e46 منذ عام 2002 بالنسبه لموديل 318 زودت بمحرك ثانى أعوام 2002 - أوائل 2004 < تقريبا > يعرف ب n42b20 بسعة 1995 سى سى قدرة 143 حصان, ثم بدل المحرك أعوام 2004 - 2006 بأخر يعرف ب n46b20 بنفس سعة و شكل و إمكانيات سابقه.

بالنسبه لل e39 520 مزوده بمحرك m52b20 بسعة 1991 سى سى و هو موجود بال e39 أعوام 1995 - 1999 و هو بقدرة 148 حصان و الفتيس الأستيبترونيك موجود بال e39 منذ بداية الأنتاج < على حد علمى >.

التكييف بالبى أم دبليو على العموم ممتاز و لا يحتاج مقارنه لأنه سواء بال e46 أو ال e36 سابقتها و ال e39 أو ال e34 سابقتها التكييف ممتاز.

الكماليات فى ال e39 اعلى من الكماليات فى ال e46 شىء طبيعى لأن ال e39 فئه اعلى فبالتأكيد هتجد فيها إمكانيات أعلى من ال e46.

**novo** · 06-03-2011 02:12 PM

المشاركة الأصلية كتبت بواسطة kliken

انا معاكو يا شباب ان دى فئتين مختلفتين علشان كده انا كنت بقارن فى نقط معينه
اسعار قطع الغيار
استهلاك البنزين
قوه التكييف
الكماليات اللى يتنزل مع الموديلين دول على سبيل المثال انا معرفش مثلا هى 520 ما قبل 2000 كانت بتنزل كلها فتيس اتوماتيك و لا فى منها ستيب
و فى الآخر اكيد هستخير ربنا

اتمني المواضيع دي تدي حضرتك فكره عن أسعار قطع الغيار و أسعار الصيانه الدورية

http://www.nilemotors.net/Nile/19113...98-2002-a.html

http://www.nilemotors.net/Nile/19023...teptronic.html

http://www.nilemotors.net/Nile/9108-...0i-2001-a.html