دعوة لشراء المنتجات المصرية إنقاذا للإقتصاد المصري

**semsem67** · 12-03-2011 04:51 PM

كل واحد فينا بيشتري شهريا مئات السلع - لو اجتمعنا إننا نشتري المنتجات المصرية علشان المصانع تفضل شغالة و الشباب المصري لا يفقد فرص عمل حنكون خدمنا بلدنا فعلا مش بس بالشعارات.
صحيح قد تكون السلع المصرية أقل جودة من المستوردة لكن ممكن نستحمل شوية قلة جودتها في سبيل بلدنا وشبابنا.
صحيح إن التجارة ليس لها أخلاق وإن شراء السلع المستوردة بيفرمل الصناع المصريين ويمنعهم من زيادة الأسعار على المستهلك ، لكن مصلحتنا جميعا هي إن المصانع تشتغل.
من غير المعقول إن فيه شباب ضحى بحياته أو صحته أو عينيه عشان البلد تبقى أحسن واحنا نشتري سلع مستوردة ومصانعنا تقفل وشبابنا يتعطل.
لا يستهين أحد بنفسه لأن قوة المصريين في كثرتهم و اجتماعهم على هدف واحد وهذه الثورة دليل واضح فلم يكن يتصور أحد أن مواطنين مصريين لا يحملوا سلاح من أي نوع أن ينتصروا على جحافل من القوات المدججة بالأسلحة وهذه القوات انسحبت أمام العدد الهائل للمتظاهرين وإصرارهم على هدفهم ، وكذلك الأمر لوحسب كل واحد مننا مشترياته شهريا ممكن يطلع مبلغ مش كبير لكن لو عدد كبير من المصريين بيشتروا بالمليارات بضائع شهريا أكيد حتفرق.
سمعتم المستشار جودت الملط : الدين الداخلي 1088 مليار جنيه - خدمة الديون 89.5 % من الناتج المحلي الإجمالي - مفيش حل إلا بزيادة الإنتاج وكيف يزيد الإنتاج إذا كان المستهلكون يفضلون السلع المستوردة؟!.
الأمر كله تضحية بسيطة من كل واحد فينا ولن تكلفه شيئا : حاول أن تشتري سلع مصرية بدلا من المستوردة كلما أمكن

**م. حاتم السباعي** · 12-03-2011 10:39 PM

السلام عليكم
الاخ الكريم صاحب الدعوة الكريمة بارك الله لحضرتك و جزاك الله خيرا
و انا اؤيد حضرتك و ان شاء الله سوف اعمل بها من اليوم
و علي هامش المداخلة لفت نظري ان الموضوع مكتوب من الساعة 5 مساء و احنا دلوقتي الساعة 10 و ربع و لم يشارك احد في الدعوة
العجيب بقي ان لو فلان و لا علان كان هو من كتب الموضوع كان زمان المشاركين تعدو ال 100 بكثير
و ده مؤشر خطير لما نمر به من حالات النفاق التي لم نتخلص منها بعد حتي بعد ثورة 25 يناير
و هذا طبعا لا ينقص من مقدار فلان و الا علان المشهورين في المنتدي انما هي و صمة عار في جبين المهللين الذين لا يهمهم ما يكتب و لكن يهمهم من هو صاحب الكلام
و عموما لك الله يا مصر
و اشكر حضرتك علي الدعوة الكريمة

م.حاتم السباعي