الموضوع: رابطة مالكي وعشاق التمبرا (الجزء الرابع)

المشاركة الأصلية كتبت بواسطة zago

متخطفتش اتطمن
بس كنت بصيع ولسه مخلص صياعه
وقابلت استاذ (خالد ) صاحب البرافا

راجل لذيذ
زيي
بس انا الذ :oc_sun1[1]:

:oc_sun1[1]:

قصدك هاني

تحب اقول اللي حصل ولا بلاش
بلاش احسن مش طالبة فضايح

المشاركة الأصلية كتبت بواسطة mohamed_kh

اولا احب اسلم على جميع الاعضاء واتمنى اكون واحد منهم

ثانيا
عندى شوية مشاكل كتير فى عربيتى وانا السبب لانى انا الى اهملت لفتره طويله وده لعدم علمى والثانى
انى كنت مشغول عنها قوى الفتره الى فاتت
هى تمبرا 90 كنت شاريها من معاق
الميكانيكى الى اشتراها قالى 100% وبعد 3 شهور فك يغير وش السلندر علشان كانت بتسخن
وبالمره ركب طقم شمبر وقالى المكنه 100% وقلتله بالمره غير ديسك واسطولنه ولثقتى فيه عاطيته فلوس وسبت العربيه عملها عافشه
غير مقصات ومش عارف ايه صرف 850 جنيه
وشديت العربيه سمكره ودكوا بالمره
الكلام ده من سنه تقريبا
الحمد لله كانت 100% لفتره طويله يادوب تغير بجوهات ينظف الكاربراتير وبس

المهم
حصلت معايا مشكله كبيره جدا

ركبت طرمبة ميه من 5 ايام واول ما ابتديت اتحرك بالعربيه اول يوم كان باليل والعربيه سخنت وانا كنت ملاحظ من اول لحظه وصلة 90 وده كان غريب قوى عندى عمرها ما كانت بتعمل كدا كنت فى مكان مينفعش اقف فيه
بعد شويه لاقيتها بتزيد قبل ما توصل 100 او 105 كنت واقف

واوالمفاجئه قصدى الصدمه لقيت الفرن بالشكمان حتة نار حمره اترعبت والله قلت هتنفجر
جريت بطلت العربيه ووقفت شويه وبعدين دورت تانى وحطيت مايه قلت اكيد هلاقيها فاضيه

بس ماكنتش ناقصه كتير قوى استغربت قعت اضيف ميه كدا لغايت ما بردت بطلت وطلبت الميكانيكى قلى بس اكيد وش سلندر
وهوا مسافر فى شغل مش قريب منى المهم قالى سيها تبرد ودور وارجع تانى لانه كان عارف المسافه الى همشيها
تانى يوم رحت لميكانيكى تانى وانا ماشى بحرص بس كانت العربيه عاديه جدااااااا وفيش حاجه
تسخن والمروحه اشتغلت وبردتها
الميكانيكى قالى مفيش حاجه هى بس كانت الطرمبه الجديده واخده هوا وغير زيت وفلتر
وقالى بالاسلامه وسافر على مسؤليتى
والحمد لله سافرت
بس انا ملاحظ العربيه بتسخن شويه لاكن مابتعديش 80
بس لو قرست عليها 110 او 120 تجيب 90 حراره وده غريب انا كنت بمشى 140 150 وممكن 160 على ما تعدى الحراره الى 90 100
هل ده فعلا من وش السلنر ولا من الطرمبه الجديده ولا اساسا ده الطبيعى
رجاء المساعده

نفسى ارجع تانى

أستاذ محمد. الاعراض اللي حضرتك بتقولها ده معناها ان الشكمان عندك مكتوم وده سبب سخونه العربيه واحمرار الفرن وزيادة السخونه مع زيادة السرعه والله اعلم..

ما تسمعش كلام الميكانيكي وتخليه يلعب في الموتور.. روح اكشف علي الشكمان ولو تخميني صح غيره من عند ابو اليزيد. الشكمان كامل ما عدا الفرن بحوالي 550 جنيه عليه ضمان سنه بس لازم تتأكد انهم ربطوا الافيز اللي بيمسك العلبه الاماميه بالخلفيه كويس وتقلهم يغيروا (السيل رينج) وتدور العربيه وتخلي حد يسد الشكمان من ورا ( تكبسه ) وتحط ايدك عند الافيزعلشان تتاكد انه مفيش تنفيس..

بعد تغيير الشكمان العربيه هتفوق اكتر في السحب والحراره هترجع زي ما كانت قبل كده..

المشاركة الأصلية كتبت بواسطة zendo

يا جماعة انا شكلى هاعمل عمرة لعربيتى تيمبرا كربراتير موديل 90 بس عاوز من خلال خبرتكم تعرفونى العربية ممكن تبقى محتاجة اية فى المكنة وانا هقولكم ملاحظاتى:
-سحب العربية ضعيف
-دخان اسود كثيف مع الكبس على البنزين
-تاخير الدوارة لما المكنة تبرد
-خروج زيت من فايظ مقاس الزيت
-عند توصيل خرطوم فايظ الزيت بالعمة العربية تبرجل والموتور يفصل
ارجو من الاستاذ هشام والاخوة الافاضل يفدونى اية اللى محتاج يتعمل فى العمرة

السحب الضعيف والدخان الاسود وتاخير الدواره سببهم عملية احتراق غير كامله داخل غرف الحريق وده ممكن يكون بسبب الاتي والله اعلم...
1- مشكله في الكربراتير بتتسبب في دخول كمية بنزين اكتر من المطلوب ينتج عنه تهبيب البوجيهات..
2- بوجيه او اكتر به رطوبه او تالف ..
3- الشراره الخارجه من الموبينه او الاسبراتير ضعيفه او متقطعه..
4- انسداد فلتر الهواء وده بيسبب عدم امداد المحرك بالاكسجين الازم لعملية الاحتراق..

بالنسبه لنقطة خروج زيت من فايظ مقاس الزيت فمفيش حاجه اسمها فايظ مقاس الزيت

بالنسبه لبرجلة الموتور عند توصيل خرطوم فايظ الزيت ده معناه ان المحرك ممكن يكون خفيف ومحتاج طقم شمبر وليس عمره اذا وجد الاتي..

1- خرطوم الفايظ بيخرج دخنه زرقاء كثيفه او زيت كثيف يجب ان يكون مصحوب بنقصان زيت ملحوظ

2- خروج دخنه لونها رمادي مائل للازره من الشكمان..

المحصله النهائيه: ظبط الكربراتير وكهربة العربيه وغير زيت وفلتر بنزين وفلتر زيت وفلتر هواء ولما تغير الزيت حط اقل من الكميه اللي بيحتاجها الموتور ب ربع كيلو وهات علبة زيت شمبر وحطها والعربيه هتتظبط باذن الله..