الموضوع: رابطة مالكي وعشاق التمبرا (الجزء الرابع)

المشاركة الأصلية كتبت بواسطة zago

متخطفتش اتطمن
بس كنت بصيع ولسه مخلص صياعه
وقابلت استاذ (خالد ) صاحب البرافا
راجل لذيذ
زيي
بس انا الذ :oc_sun1[1]:

المهم بالعوده للأستفسار المقدم من سيادتكم بخصوص الجو النار بجد مش هزار
ينصح باستخدام الاتي في الظروف المماثله :-

اولا كل يوم باليل تحط ازازه ميه بلاستيك في الفريزر علشان حتاخدها معاك تاني يوم وانت نازل
مع ملاحظه ان الازازه تكون مليانه ميه مش فاضيه

ثانيا اللي بيروح الشغل ببدله وكرافته يقلع الجاكت ويرميه ورا ويعلق الكرافته على مرايه الصالون ويلبسهم قبل ما يخش الشركه علشان يبقى امور

ثالثا لازم تشجع الاقتصاد الوطني واي محل عصير قصب يقابلك تركن وتاخودلك كوبايه قصب

رابعا في حاله وجود تكييف في العربيه مش لازم تفضل مشغله ليل نهار علشان فاتوره الكهربا متجيش كتير .... شغله وانت سايق بس

خامسا في حاله عدم وجود تكيف وعدم وجود القدره الماديه والصبر على الصنايعيه يبقى المفروض تفتح الازاز وانت سايق

سادسا ( دي للمتهورين ) وانت على الطريق بعد سرعه 120 مش حتحس بالحر
ولو حسيت حتكون مشمركز لانك بتجري بسرعه



لو الافكار دي مش مناسبه معاك يبقى مفيش غير حل واحد .... خليك في البيت
:oc_sun1[1]:

ههههههههههههههههههههه مشكلة متحركة

المشاركة الأصلية كتبت بواسطة zendo

طيب بالنسبة للصوت العالى للمكنة اللى انا بسمعة وانا دايس البنزين وانا ماشى مع سحب العربية البطيىء ده ولما اشيل مقاس الزيت والعربية شغالة العربية بطرطش زيت فالميكانيكى قاللى المكنة خفيفة بس والله مابتكلش زيت معايا برضه تبقى محتاجة طقم شنبر برضةلان وانا بغير الزيت الراجل شاف المقاس وقاللى الزيت زى ما هو وهى فعلا مابتاكلش زيت ممكن يكون الدخنة السوداء سببها حاجة فى المكنة والفايظ بتاع الخرطوم عندى بيطلع دخنة جامده لونها رمادى برضة غير الكربراتير ارجو الافادة

فلتر الهوا لو مسدود او البوجيهات حالتها سيئه صوت الموتور هيبقي عالي..

حاول تحدد اذا كنت بتسمع الصوت العالي ده وانت ماشي فقط ولا لو دوست بنزين جامد وانت واقف كمان ..

- لو وانت واقف فقط لازم حد يفتح الكبوت ويزود بنزين ويحط ودنه قريب من الموتور علشان الصوت ممكن ما يكونش من الموتور انما ممكن يكون بليه خشنه زي بلية الدينامو مثلا ..

- لو الصوت وانت ماشي فقط ممكن تكون بلية دبرياج او بلي العجل او الفتيس خشن..

- لو الصوت في الحالتين سواء ماشي او واقف ممكن يكون بلية كاتينه او تنفيس في الشكمان..

وكل اللي انا قلته فوق ده ممكن الميكانيكي يشيك عليه ويعرف ايه فيهم سبب المشكله بدون فك او تغيير اي شيء ولو ميكانيكي شاطر هيعرف العيب منين في خلال 10 دقائق..

الدخنه الرمادي من خرطوم الفايظ لازم يقابلها نقصان زيت لو الزيت ما بينقصش يبقي الموضوع عندك لسه في بدايته ( طقم شمبر ) ولو استعملت زيت شمبر مع كل غيار زيت الموضوع هيتحسن وممكن تقعد 3 سنين منغير ما تعمل طقم شمبر.

وطالما خرطوم الفايظ بيبرجل المكنه شيله من العمه وسد مكانه بحاجه تسمح بدخول الهواء ولا تسمح بدخول الاتربه ( قطن او منديل ورقي )مع التأكد من عدم انزلاق هذه القطعه لداخل الكربراتير..