DIY PIC16F877A Digital Speedometer, LCD Odometer, LED indicators | اعمل عدادك بنفسك

**amrelsaqqa** · 24-03-2011 12:05 AM

السلام عليكم ورحمة الله ..

بعد السلسلة الجميلة اللى بدأها العضو الفاضل abo_hosni لعمل عدادات rpm و سرعة وحرارة بأفكار مبتكرة تستحق رفع القبعة :)
فكرت في اضافة جديدة مستلهمة من الافكار اللى فاتت

وهى عمل العداد باستخدام ميكروكنترولر متعدد الوظائف ( الميكروكنترولر هو عبارة عن كمبيوتر مصغر جدا ومتواضع جدا على اي سي واحد قابل للبرمجة بحيث بيبقى له مدخلات تتم معالجتها وينتج عنها مخرجات )

كان انسب حاجة من حيث الكفاءة والسعر هى الميكروكنترولر PIC16F877A

البيك 16F محترم جدا وفيه امكانيات حلوة وسعره لا يتعدى 25 جنيه

الفكرة باختصار شديد كعداد سرعة هتكون في استخدام حساس او سنسور متركب بطريقة او بأخرى على واير السرعة او الترس اللى في الفتيس ، والحساس بدوره هينقل البيانات للميكرو كنترولر والميكروكنترولر هيعمل حساباته ويحول الاشارة دى لسرعة و مسافة ويعرضها على السفن سجمنت والشاشة ال ال سي دى و 20 لمبة صغيرة ( ليدات ) تضيء تباعا مع السرعة ( الاخيرة دى اختيارية )

ابو حسنى كان مستخدم سنسور عبارة عن ستيبر موتور بيطلع جهد منتظم متزايد مع السرعة .
حاولت في الاول استخدم حاجة زي كدة بس لقيتها هتنفع في قياس السرعة اه بس مش هتنفع في حساب المسافة وكمان هتكون محتاجة معايرة ، وانا عايز حاجة ابرمجها بالظبط تطلع السرعة بمعادلات محسوبة تنفع على اي عربية

كان لازم افكر في سنسور يطلع نبضات مش جهد يعنى بدل ما يطلع جهد من 0 لـ 5 زي 2.5 و 1.5 ....
لا انا عايز سنسور يشتغل كأنه زرار بحيث مع كل لفة او ربع لفة مثلا يقفل ويفتح الدايرة ياما 0 او 5 والميكرو كنترولر يعد النبضات دى ويستنتج منها سرعة

الحاجة اللى لقيتها وقضت الغرض كان السنسور بتاع بكرة الماوس ( نفس الفكرة ،، البكرة تلف تنقل اشارة للكمبيوتر ، الكمبيوتر يستنتج منها سرعة يحولها لحركة في الـ scrollbar )

السنسور شكله بيبقى حاجة زي كدة

وهو له 3 اطراف هنوصل منهم اي طرفين :) للبيك

وطبعا بدل البكرة بتاعت الماوس هيركب واير السرعة اللى كان راكب في عداد السرعة القديم :)

السنسور ده بالتجربة على الافو ميتر بيطلع 12 نبضة لكل لفة

بحسابات معينة لو خدنا في اعتبارنا عجلة العربية محيطها كام سنتى و الواير بيلف كام لفة لكل لفة عجل
نقدر نستنتج مثلا (بمعادلات ) ان كل 120 نبضة = 10 متر على الارض -----> حصلنا على عداد مسافة
للحصول على السرعة ناخد عينة كل نصف ثانية من عدد النبضات ومن خلالها نستنتج السرعة
يعنى مثلا لو 120 نبضة في نصف ثانية يبقى 10 متر في نصف ثانية = 20 متر في الثانية = تقريبا 72 كم في الساعة -------> حصلنا على السرعة

دى مقدمة بسيطة عن الفكرة ومش مهمة في تنفيذ الدايرة :)

ننقل بعد كدة على الاسكيماتيك او مخطط الدايرة في المشاركة اللى جاية :)

**amrelsaqqa** · 24-03-2011 12:29 AM

ده الاسكيماتك هو شكله يخض شوية في الاول بس لو قسمناه كل دايرة لوحدها هنلاقى الموضوع سهل ويتعمل على مراحل

الجزء اللى فوق واضح انه الباور سبلاى وضرورة وجود الباور سبلاى ضرورة حتمية لأن الـ 12 فولت بتوع العربية المتذبذبين اللى كلهم ضوضاء مش هينفعوا مع الاجهزة الالكترونية
لأن اولا لازم يبقى عندنا 5 فولت

ولازم برضه وده الاهم انهم يكونوا 5 فولت ثابتين معزولين ما يتأثروش بالضوضاء اللى جاية من الاشعال والدينامو والكلاكس والراديو ........

اولا عندنا اول 2 دايود دول عشان حماية الدايرة لو حد قلب السالب مكان الموجب
بعد كدة الملف او الكويل وده ضرورى جدا مع المكثف اللى بعده لتثبيت الجهد
والملف اللى انا جبته كان من باور سبلاى كمبيوتر قديمة
وشكله زي كدة بالظبط

بعد كدة 2 ريجيوليتور 7809 و 7805 لتثبيت الجهد على مرحلتين ننزل الجهد ل9 فولت الاول وبعدين 5 فولت ووجود مرحلتين بيساعد في تثبيت الجهد لحد كبير جدا

المكثفات للتنعيم والتثبيت برضه اول واحد 220 ميكرو وبعد كدة اللى في الوسط 1000 ميكرو وفي الاخر بعد خرج ال5 فولت 100 نانو

------------------

كدة تمام بقى عندنا 5 فولت زي الفل ثابتين ومستقرين

نيجى لدايرة البيك مع السفن سجمنت : ( على اليمين )

الدايرة اظن انها مش محتاجة شرح بصفة عامة

هنيجب الاي سي والقاعدة بتاعته ونثبته مع الكرستالة ومكثفاتها ( الكرستالة فوق على الشمال في اي سي البيك في الاسكيماتيك )

الكرستالة اللى هنستخدمها 4 ميجا ( كأنه كمبيوتر سرعته 4 ميجا )
شكل الكرستالة بيبقى كدة

ومكثفات اللى معاها 2 كل واحد 22 بيكو فاراد

توصيل السفن سجمنت هيكون بحيث ان كل ال3 متوصلين مع بعض بس بنتحكم في انهى واحدة اللى بتشتغل فيهم عن طريق اطراف الكاثود

طبعا الفكرة انك بتطفى كل السفن سجمنت وتكتب الرقم اللى انت عايزه وتقيد منهم واحدة وترجع تطفيهم كلهم وتغير الرقم وتقيد السفن سجمنت اللى بعدها وهكذا ( مع السرعة العين مش هتلاحظ ان واحدة بس اللى بتقيد في المرة ) الفكرة دى اسمها multiplexing

فكدة بدل ما عندنا 3 سفن سجمنت كل واحدة فيها 7 اطراف انود وطرف كاثود يبقى عندنا 24 بنة
هنعتبرهم 7 انود متوصلين كلهم مع بعض و3 كاثود يبقى كل الموضوع بقى 10 بنّات ( وبكدة قللنا الاسلاك جامد )

في السوق لقيت سفن سجمنت جاهزة معمولة بالطريقة دى بحيث انها 3 في واحد والانودات كلها مشتركة والكاثودات مختلفة

شكلها كدة

وتوصيلتها كدة :

احنا شغالين common cathode يعنى الجزء اللى فوق من الرسمة

بعد توصيل البيك والسفن سجمنت هنوصل السنسور في الطرفين اللى فوق على اليمين من البيك ( اللى عند البنة ( RB0/int)
وما ننساش نوصل المقاومات والمكثفات الموجودة
بالمناسبة الزرار اللى عند البنة رقم RB7 ده بتاع تصفير عداد الكيلو متر هنبقى نتكلم عليه مع ال ال سي دى

المفروض نقف بعد المرحلة دى بعد ما ركبنا السفن سجمنت والسنسور ونجرب الدايرة
المفروض هتشتغل وتكتب 0
واول ما نحرك السنسور يمين وشمال السرعة تزيد
ننزل نجرب في العربية وبعدين نبقى نكمل توصيل الـ LCD ( سعرها 30 جنيه بالمناسبة :( )

**amrelsaqqa** · 24-03-2011 12:58 AM

قبل ما انسى لازم اوضح حاجة
الاي سي بتاع البيك اللى في الاسكيماتيك موضح توصيل الاطراف بس مش موضح ترتيبها الفعلى

فلازم اوضح الشكل الفعلى للاي سي

وطبعا اطراف VDD اللى هى 11 و 32 مش باينة في الاسكيماتك هيتوصلوا بالطرف ال5 فولت اللى هو خرج الباور سبلاى ونخلى بالنا اوى اوى لاحسن نوصل 12 فولت ونحرق الدنيا

وطبعا الاول لازم نتخبر خرج الباور سبلاى بالافو ميتر ويستحسن نستخدم فيوز مع الطرف 12 اللى جاى من كهربة العربية او المحول ال12 فولت اللى بنجرب بيه ويكون مثلا في حدود 200 مللى امبير

الاطراف VSS اللى هى 12 و 31 تتوصل بالارضى وطبعا الارضى بتاع دايرة ال5 فولت هو نفسه ارضى العربية

في الرسمة اي رمز

معناه ان الطرف ده واخد 5 فولت (وفي دايرة الباور معناه ان الطرف ده هو اللى بيطلع 5 فولت )

وطبعا اي رمز

معناه ارضى

**amrelsaqqa** · 24-03-2011 02:25 AM

بعد كدة نيجى لتوصيل الـ LCD
ال ال سي دى وظيفتها هتكون عرض عداد الكيلو متر وهيكون عندنا رقمين واحد في السطر الاول وواحد في السطر التانى بحيث يكون عندنا عداد بيتصفر بزرار وواحد تانى بيعد على طول مع العربية ومش بيتصفر

ال ال سي دى اللى انا جبتها زي دى بالظبط

قلت للبياع عايز شاشة ال سي دى 16*2 لون ازرق
قاللى هات 30 جنيه ( بصراحة انا استغليتها في الاول لأن ال30 جنيه دول ممكن يجيبوا شاشة موبايل صينى ملونة)

الشاشة وضوحها كويس بالنهار وبالليل بس انا مرة ركنت العربية في الشمس لمدة ساعة لقيت لونها بقى بنفسجى شوية بس بعدها لونها راق تانى واتعدل لوحده وما حصللهاش حاجة

فأنا بصراحة مش عارف هل هي مصممة تستحمل الشمس الجامدة ولا لا

بالنسبة لتوصيلها هيكون زي ما متوضح بس هى في الغالب مش هيكون مكتوب عليها اسماء الاطراف وياريت ماحدش ياخد ترتيب الاطراف من الرسمة لأنه ممكن يختلف

عشان كدة هجيب رسمة تانية هنا بتوضح الاطراف بالظبط على الشاشة الحقيقية

ده بالنسبة لتوصيل الشاشة

**amrelsaqqa** · 24-03-2011 02:41 AM

كدة ناقص دايرة الليدات ودى نفس الدايرة اللى استخدمها ابو حسنى بالظبط 20 ليداية بيقروا من 0 ل 200 يعنى كل ليداية ب10 كم

مع 2 اي سي LM3914

مش محتاجة معايرة لأنها بتاخد الاشارة من البيك والاشارة مرتبطة باللى بتعرضه السفن سجمنت

طيب بالنسبة لمعايرة العداد البيك نفسه ؟
صممته بحيث مع البرمجة اكتبله 3 حاجات ويحسب على اساسها ويعاير اوتوماتيك وبدقة :

- عدد النبضات لكل لفة من لفات السنسور وفي الحالة بتاعتى كانت 12
- عدد لفات الواير لكل لفة عجل وفي الحالة بتاعتى كانت 2
- مقاس الكاوتش وكان عندى 175/80/14

ودى خدت منى وقت جامد لحد ما توصلت للمعادلة الى تظبط المسافة والسرعة بالمللى
وكنت احيانا بفك البيك واركبه واعيد برمجته 10 مرات في الساعة والبرمجة استمرت لشهور من التحديث والتطوير

صور حقيقية وفيديو للعداد اللى انا نفذته :

بورده عليها البيك
وبوردة الباور اللى واضح عليها الملف وال2 ريجيوليتور اللى راكب عليهم هيت سينك الومنيوم جبتها من الباور سبلاى القديمة بتاعت الكمبيوتر .

وبرضه في بوردة عليها الليدات

و اللى جوة اللزق البنى الايسيهات بتاعت الليدات

طبعا لما جمعتهم ركبت بوردة البيك في القاع وفوقها السفن سجمنت والشاشة وفوقهم بوردة الليدات ولزقت السفن سجمنت والشاشة بلزق شمع في بوردة الليدات

وطبعا بوردة الليدات اتفرغت على شكلهم بالسكينة او المفك بالدق على الاخرام بالراحة وبحرص

ودايرة الباور سبلاى كانت خارج العداد

------------

الصورة اللى جاية دى وهو راكب في العربية

الشاشة على الحقيقة اوضح من كدة بكتير والمقاومة المتغيرة اللى في دايرة الشاشة بتظبط الcontrast زي مانت عايز

---------
صورة من بعيد شوية

واخيرا صورة وفيديو وهو شغال

طبعا الليدات لسه مش معزولة عن بعضها ومركبتش ورقة لسه

YouTube - PIC16F877A Digital Speedometer with LCD Odometer and LED indicators

**amrelsaqqa** · 24-03-2011 02:57 AM

مستنى اعرف رأيكم وخصوصا الناس اللى طلبت منى تفاصيل الدايرة في موضوع ابو حسنى

بالنسبة لبرمجة البيك هو المفروض هيحتاج مبرمجة ودى ممكن تبقى ب30 لوحدها :(

بس مش عارف هل ممكن عند النخيلى مثلا تطلب منه يبرمجلك البيك وانت بتشتريه حسب البرنامج اللى معاك ولا لا

هو هيبقى ملف .hex صغير هيفتحه بالبرنامج اللى هيبرمجها على الكمبيوتر
وعن طريق المبرمجة او البرنر الكمبيوتر هيحرقه على الاي سي

طبعا العداد بيحتفظ بالكيلومتر حتى بعد فصل الباور لأن البيك فيه ذاكرة زي الفلاشة كدة eeprom

وطبعا انا اثناء برمجة الملف ظبطته على 206300 لأن دى قراية عدادى القديم

ان شاء الله هبقى اقول تفاصيل عملية حرق البرنامج على البيك وازاى نظبط الكيلومتر على رقم معين واحنا بنبرمجه
وده لينك البرنامج .hex في ملف مضغوط

speedo.zip

**newhansol** · 24-03-2011 02:58 AM

تسلم الايادى
مجهود جبار
هوة دة التجديد عايزيين نخش عصر البك بقى ونعدى
هاحاول كدة وربنا يسهل بس برمجة البك هانعمل فيها اية دة احنا غلابة فى موضوع البرمجة دة

**MASERATI** · 24-03-2011 03:15 AM

السلام عليكم و رحمة الله و بركاته

ما شاء الله عليك.

الشغل باين عليه جامد أوى و الله .

ربنا يوفقك و يباركلك.

شكلك فاهم هندسة كويس.

طاب, ممكن تساعدنى فى الفكرة دى:

أننا نحط أى شريحة فى العربية فى مكان ما و نقدر نرصد مكانها فين عالخريطة الجغرافية بواسطة شبكة الانترنت عشان العربيات اللى بتتسرق كل يوم و التانى دى؟؟؟

هو مش كان فية موقع أو شركة -أنا كنت شوفتهم عالنت من مدة- ممكن تحدد مكان الموبايل؟؟؟

أنا متهيألى أنى كنت شوفت الموضوع ده عالنت من فترة بس مش عارف امتى و لا فين.

**Amr Mohamed** · 24-03-2011 03:15 AM

huh
يا نهار اشطة
بصراحة مهندس الكترونيات ولا كهربا دى مش بالسااهل خالص ده انا لو اتشقلبت لا ينكن ابدا افهم ال يلااااا
الحمد لله
وطبعا مجهود جميل جدا وتعب راءع انتج حاجه زى الفل
شكلة حلو كمان وهو راكب تحس انه نضيف ومدى لقطة حلوة

**amrelsaqqa** · 24-03-2011 03:25 AM

المشاركة الأصلية كتبت بواسطة newhansol

تسلم الايادى
مجهود جبار
هوة دة التجديد عايزيين نخش عصر البك بقى ونعدى
هاحاول كدة وربنا يسهل بس برمجة البك هانعمل فيها اية دة احنا غلابة فى موضوع البرمجة دة

البرمجة خلاص بمجرد ما تمت مرة
بتاخد انت الملف النهائى .hex جاهز ومش هتكتب اي اكواد
لأن دى هى المشكلة كلها اصلا وانا اتأخرت لحد ما برمجت كل حاجة
كل الموضوع انك هتحط الفايل على البرنامج اللى بيحرق وتوصل المبرمجة وتحط فيها الاي سي وشكرااا