الموضوع: تجربتى مع عاطف فايز للتكييف

السلام عليكم

طبعا بعد تجربة طنانى مع عاطف بتاع التكييف اللى فى العمرانية و اللى كان عاملها فى موضوع "تكييف الفيكترا"حسيت ان الراجل ده كويس و فاهم و قلت أروح له .. مبدأيا أنا كان عندى الحمد لله التكييف شغال كويس الصيف اللى فات .. بس جربتة من كام يوم لقيته مش أوى.

انتهزت فرصة ان العربية كانت معايا فى الشغل الاسبوع ده و طلعت عليه .. كان فى واحد زميلى فى الشركة بالصدفة رايح العمرانية .. أخدته معايا عشان يعرفنى الطريق من القرية الذكية ل هناك.

وصلت هناك كلمت عاطف قال لى كمل فى الشارع اللى انت فيه على طول هتلاقى شركة تليمصر جنبها كشك .. استنانى هناك و أنا هاجى أخدك .. المهم جالى .. أنا مكنتش أعرف ان هو عاطف بصراحة .. عشان طنانى كان دايما يقول الحاج عاطف فا كنت فاكر انه كبير فى السن .. انما عاطف فى التلاتينات كده .. أسمرانى .. متوسط الطول.

رحنا الورشة .. هى صغيرة و شغال فيها هو و أخوة محمد .. قلت له كويس ان انت فاضى .. أنا كنت خايف اجى و استنى .. دى صورة الورشة.




بدأ الشغل .. كبس الدورة هوا بالجهاز اللى عنده و جاب مياه و صابون و حطها على البلوف و قال لى فيه بلفين بينفسوا .. بكام دول يا عم عاطف .. قال لى اللى قدام ب 10 جنية و اللى ورا ب 55 جنية .. وقال لى لو مش مستعد ممكن احط أويل سيل و أربطلك عليه و تغيرة بعدين .. أنا مكنش عندى مشكلة فى الفلوس بس عشان أول مرة أروح قلت أتأكد الأول .. فقلت له غير اللى قدام و اربط لى على اللى ورا و أغيره بعدين.

كبس الدورة هوا تانى و قعد يكلمنى عن الجهاز اللى عنده قالى ده أنا جايبه من أمريكا ب 75 ألف جنية .. و بيشحن و يفرغ و لو الكباس ناقص زيت بيزودة .. أنا مكنتش مقتنع بصراحة .. بس دورت بعد كدة على الانترنت لقيتة بيعمل كده فعلا هو الجهاز اسمه RTI Air conditioning System. بس الموديل اللى أحدث من اللى عنده ب 4 الاف دولار تقريبا .. يعنى 25 ألف جنية تقريبا على الموقع .. دى صورة الجهاز.




شحن فريون و قال لى ادخل جوه شوف ايه النظام .. العربية كانت تلاجه فعلا الحمد لله (هى الكورسا عموما تكييفها كويس).

كام يا عم عاطف؟ .. قال لى عشان خاطر محمد (طنانى) مش هاخد منك مصنعية .. هو الشحن و الكبس ب 200 جنية و البلف ب 10 جنية و مش هاخد منك مصنعية .. يبقى الحساب 200 جنية .. مفاصلتش معاه بس بصراحة محدش بيعمل حاجه ببلاش.

سألتة ان أحيانا لما بشغل المراوح بلاقى الريحه مش كويسة .. قال لى اوعى تشغل و تجيب هوا من برة .. دايما خلى الهوا ييجى من جوة عشان متبوظش التكييف و التلاجة و كده .. مع ان مكتوب فى الكتالوج انك متستخدمش الهوا من جوه الا فى أضيق الحدود عشان يكون عندك الهوا متجدد باستمرار .. بس كل الصنايعية فى مصر بيقولوا زى عاطف كده عشان الاداء على حساب الصحة.

برضه سألتة لو حبيت أنضف التلاجة ايه النظام .. قال لى لازم تفك التابلوة كلة و الدركسيون و القطمة .. و ده مصنعيتة 400 جنية .. طبعا المبلغ مبالغ فيه جدا.

اللى مزعلنى أنه بعد ما خلص قلتله أنا ممكن أغير المسمار اللى انت ركبتة ده بالبلف .. قال لى هتتضطر تفضى الفريون و تملاه تانى .. لو كان قالى من الأول كنت قلتلة ركبته و خلاص مجتش على 50 جنية .. عموما ملحوقه .. فى الصيانة الجاية ان شاء الله.

و دى كانت تجربتى معاه و الحمد لله التكييف شغال كويس .. اتمنى أكون أفدتكم.