الموضوع: نويت اشترى fsv وعندى بعض الاسئلة وارجو الافادة من الجميع

بص هو محدش رد عشان هى حاجات ردينا عليها كتير لو دورت فى المنتدى كنت هتلاقيها بس ماشى يعم عنك انت المرى دى بس ابقى دور المرة الجاية

مراجعة الحاجات كوبى وبيست من مشمش

ألف مليون مبروك

طبعا ان شاء الله ميكنش فى مشاكل

انت بس وانت بتستلم قول بسم الله وعلى بركة الله واقرأ المعوذتين واية الكرسى
2-حاول تبص نظرة كاملة على العربية من بره الدهان مفيش خدوش جرب كل الأبواب افتح واقفل والشنطة وتنك البنزين والكابوت وبص جوة الكابوت على الزيوت والميه كل ده حيبقى باين العربية جديدة تأكد ان مفيش اى خبطات لا قدر الله
3-بص على الإستبن فى الشنطة والكوريك
4-قول بسم الله وادخل العربية بص على الصالون نظرة الكراسى والسقف وبعدين التابلوة
5-دور العربية واسمع الموتور
6-بص على عداد الكيلومتر شوفها مشيت اقديه
7-جرب الإشارات يمين وشمال وانتظار وجرب النور عالى وواطى والفوجات وجرب الكاسيت هو طبعا سى دى خد معاك سى دى وحط عليها قرآن جرب الراديو وصوت السماعات واسمع كل سماعة على حده
8-جرب المساحات وجرب الزجاج الكهربائى والسنتر والريموت والمرايات لو كهرباء
وان شاء الله كله يكون تمام واتوكل على الله

وألف مليون مبروووووووووووووووووك


الاجراءات القانونية كوبى وبس من محمد زيموفاكس

بصوا بقي عشان الموضوع يبقي متكامل هاقولكوا علي مصاريف الترخيص واللي انا دفعته في المرور يوم 21 مارس اللي فات:

أولا مكنتش متوقع الترخيص يبقي سهل كده, وبصراحة الناس كانت متعاونة هناك بقدر المستطاع, عديت الصبح بدري أول حاجة علي مرور بين السرايات عشان أختم ورق الإفراج الجمركي والمبايعة (ختم النسر). المعرض قاللي معلش هتتعب شويه بس الموضوع مش هياخد أكتر من 10 دقايق, وفعلا كنت هناك الساعة 9 خلصت الساعة 9 و عشرة, ودفعت 5 جنيه للواد اللي بيختم محبة.

بعد كده, طلعت علي مرور حدايق القبة, اللي هو تابع لمحل السكن اللي في البطاقة (مش عارف كان ينفع أروح المرور اللي جنب البيت عشان أنا ساكن ف فيصل أساسا ولا لأ, بس فضلت أروح هناك عشان أنا عارف إنه مبيبقاش زحمة والناس اللي هناك بتنجز علي قد م تقدر), المهم كنت هناك علي 9 ونص وخدت دوري في الإجراءات اللي كلكوا عارفينها. فحص وتأمين وضريبة وبعدين تستني دورك وتستلم اللوحات والرخصة, كلوا كلوا خلص ع الساعة 12 ونص.

المصاريف كالتالي بالترتيب:

1 - 8 جنيه ملف عربية جديد وتصوير مستندات (صورتين للبطاقة)
2 - 25 جنيه نموذج فحص من الخزنة
3 - 120 تأمين العربية الإجباري من أي شباك من الشبابيك اللي بره
4 - 121 طفاية حريق
5 - 45 شنطة إسعافات (والعربية كان فيها المثلث)
6 - 369 جنيه ضريبة العربية ومصاريف اللوحات (لمدة سنة واحدة عشان مكنش معايا فلوس أرخص 3 سنين وعشان سبب تاني هأقولهولكوا حالا)
7 - 61 جنيه ضريبة رفاهية عشان العربية بتاعتي القديمة لسه بإسمي ف المرور (وده السبب التاني اللي خلاني أرخص سنة واحدة عشان مدفعش ضريبة الرفاهية مضاعفة)
8 - 20 جنيه إكراميات (لعامل الفحص وموظف الشباك والراجل اللي بيعلق النمر). وطبعا الإكراميات دي كانت مني أنا ومحدش أجبرني عليها ولا حاجة, بس انا كنت فرحان بأه بالعربية الجديدة وماشي عمال بافرق فلوس. أهبل بأه.

الإجمالي تقريبا 770 جنيه, بالسلامة ان شاء الله وكله فدا حبيبتي وفدايا, وعقبال 100 سنة واحنا مع بعض.

اى خدمة يا باشا

المرة دي زيمافوكس شخصيا هو اللي هيتكلم (علي رأي أكرم باشا), ومعلش الرد جه متأخر شويه ده بسبب إني بقالي كتير مفتحتش المنتدي. مع إني بصفتي أحدث مشتري للبريليانس, كان المفروض أكون أول من يشارك.

المهم, المفروض تاخد من المعرض:
1 - صورة من الإفراج الجمركي موجود فيها رقم الشاسيه وموتور العربية.
2 - عقد مبايعة من الوكيل مباشرة لصاحب المعرض اللي هتشتري منه, ولو كان المعرض شاري من معرض تاني, يبقي تطلب منه عقد المبايعة من الوكيل للمعرض الأولاني ومن المعرض الأولاني للمعرض التاني اللي هتشتري منه.
3 - عقد مبايعة من المعرض اللي هتشتري منه ليك إنت بأه شخصيا وبإسمك.

المبايعات لازم تكون مختومة بختم النسر, وياريت تخلي المعرض هو اللي يختمهملك وإلا هتضطر تروح لنيابة المرور التابع لها المعرض وتختمهم بنفسك (راجع الموضوع اللي انا عملته).

أخر حاجة لازم تعرفها هي إن الإفراج الجمركي بياخد وقت علي م ييجي (في حدود أسبوع) وبالتالي حاول تتفق معاهم علي إنك تحجز مبلغ في حدود 1000 جنيه حتي تمام الإجراءات, وممكن في الحالة دي تخليه يكتبلك إيصال استلام نقدية بالمبلغ المدفوع وتبقي تسلمهوله بعد متديله الألف الباقية.

أظن واضح ؟

يا محمد انت اللى اسمك ملخبط مبعرفش اقراه حتى هو ده دوا ؟ هههههههههههههه