الموضوع: محدش لية .. عاوز يرد على ثبات السيتى 1300 بعد ال 120

معلش اسمحولى أتكلم بالأرقام لأن مشكلة الثبات انه بيبقى "احساس" انما فى اختبارات بتتعمل للثبات بالأرقام و دى بتبقى أرقام فعلية مش مجرد احساس ... لو حضرتك دخلت على موقع www.safercar.gov حتلاقى نتائج اختبارات الأمان الأمريكية NHTSA و من ضمنها تقييم Rollover resistance و دة بيتقاس بنسبة مئوية هى الـ Chance of rollover و كلما قلت كلما كانت الثبات أعلى ... و دى نتايج الاختبار دة لمجموعة من السيارات:

* هوندا فيت (النسخة الهاتشباك من هوندا سيتى و هى أقل وزناً من السيتى و بالتالى ثباتها أقل): 13% (4 نجوم)
* تويوتا ياريس: 13% (4 نجوم)
* شيفروليه أوبترا (بتنزل فى أمريكا باسم سوزوكى فورينزا): 11% (4 نجوم)
* لانسر 2007: 10% (4 نجوم)
* لانسر 2008 (الشكل الجديد): 12% (4 نجوم) -- و النسخة اللى تم اختبارها نازلة بكاوتش 215/45R18 يعنى ثباتها حيكون أعلى من اللى بتنزل مصر
* بى ام دبليو الفئة الثالثة 2008: 10% (4 نجوم)
* كورولا 2008: 12% (4 نجوم)
* هيونداى الانترا 2008: 10% (4 نجوم)
* مازدا 3 سيدان: 10% (4 نجوم)

زى ما حضرتك شايف من القائمة دى فى عربيات بنقول عليها هنا فى مصر ثباتها تعبان و عربيات ثباتها تحفة .. لكن فى النهاية الأرقام الفعلية المبنية على اختبارات و معايير صارمة بتقول ان كلهم ثباتهم قريب جداً من بعض و كلهم واخدين 4 نجوم يبقى عنصر الثبات حضرتك اطمئن تماماً من ناحيته و شوف باقى احتياجاتك ايه و قرر على أساسها.

المشاركة الأصلية كتبت بواسطة mido_smsm

معلشان يا استاذ جندى انا مش عاجبنى الارقام دى وانا بامن بالتجارب الحقيقيه مش الارقام والحقيقه ان السيتى ثباتها سىء مقارنها بالسيارات اللى فى فئتها والكورولا الجديده ثباتها اعلى بكثير من الارقام الموضوعه وواضح من الارقام ان الماذدا 3 اثبت من الكورورلا الجديه وعلى ارض الواقع هذا الكلام غير مظبوط وعلى فكره انا شفت مره مقارنه بين كورورلا 2008 وماذدا 3 وهوندا سيفيك وسوباروا
كانت كوررولا فى المركز الاول ثم السيفيك ثم السوباروا ثم الماذدا فى المركز الاخير
وعلى لسان صديق والده كان عنده ميجان وغيرها وجاب نيو كورولا قال ثبات لايوصف بالنسبة للماذدا 3 الذى يمتلكها
وشكرا

يا ميدو باشا ما هو المشكلة ان كل الكلام اللى حضرتك بتقوله هو "احساس" السائق و دة بيختلف جامد جداً من شخص لآخر و الدليل على كدة شوف حضرتك ردود الناس فى الموضوع اللى حضرتك بتشتكى فيه من عفشة اللانسر حتلاقى تباين شديد فى احساس كل واحد عن العربية و عن الفرق بينها و بين عربيات تانية .... أنا فعلاً جربت ثبات السيتى على المنحنيات عدة مرات على سرعات عالية لحد 150 و العربية كانت بدون مبالغة ما شاء الله متبتة فى الأرض فعلاً .. للأمانة المرة اللى كنت بأحس فيها ان العربية بتعوم كانت على طريق الغردقة كانت الرياح شديدة جداً و عمودية على اتجاه العربية و كنت ماشى على ما بين 160 و 170 و كنت فعلاً خايف أحرك الدريكسيون بس أعتقد صعب أى عربية تانية تبقى ثابتة فى الظروف دى. عشان كدة الفيصل فى الموضوع دة اختبارات الثبات اللى بتتعمل فى ظروف قياسية و ثابتة لكل العربيات و بتدى رقم واضح نقدر نقارن على اساسه.