الموضوع: اعرف عن البرادعي قبل الهجوم عليه

المشاركة الأصلية كتبت بواسطة hh

يا أستاذ طارق متضيعش وقتك في محاولة أقناع من يهاجم بغرض الهجوم فقط. يا أخي دول ناس قالولهم الليبرالية دي كفر و العياذ بالله قالوا أمين.

.

أنا مع الرأي ده.

المقالات المكتوبه عن مواقف البرادعى ( من صاحب الموضوع ) دفاع عن البرادعى كشخصيه
لكن لا تؤهله لمنصب رئيس الجمهوريه لأنه لا يصلح

المشاركة الأصلية كتبت بواسطة human12

تمام ده حقك فعلا انك تراه لا يصلح و حريه مطلقه

ممكن اعرف حضرتك ايه الصفات اللى شايف ان حضرتك محتاجها و كمان اعرف بتفكر فى مين

حضرتك مقتنع بمطالب الثوره
هل بتطالب بيها ومصر على تحقيقها
هل اللى حضرتك بتطالب بيه هيحقق الخير لبلدنا


طب أيه الفرق بينك وبين البرادعى


ليه أختار البرادعى وما أختارش حضرتك


على الأقل حضرتك عايش فى مصر


البرادعى عايش عمره بره مصر وبعد ما ساب الوكاله قعد برا مصر أكتر ما قعد جواها بس برضه ده مش سبب رئيسى لرفضه


يبقى لو من ناحيه المبادئ والمطالب وحرصه على البلد , البرادعى زيه زي حضرتك زى ملايين قاموا بالثوره


بالنسبه لموضوع أنه قال لأ فى عز جبروت مبارك , ده عادى مش بطوله منه وممكن أوضحها لحضرتك


البطوله تكون لناس زى الأخوان ( ده مثل مش أقتناع بفكرهم ) لأنهم قالوا لأ وشافوا الويل بسببها


البطوله زى الناشطه أسماء ( مثلا برضه ) أللى طالبت بمظاهرات 6 أبريل وهى عارفه حيجرالها أيه وفعلا أعتقلت


البطوله زى كل الناس اللى قالت لأ وأتسحلت على سلم نقابة الصحفيين


يعنى البطوله تكون من الناس اللى بتقول لأ ومفيش حد يحميها

لكن لما أقول لأ وأنا عارف أن مفيش مخلوق يقدر يمسنى متبقاش بطوله


البرادعى زيه زى الدكتوره المعارضه الأيرانيه اللى معاها نوبل وبتبهدل السلطه الأيرانيه ومحدش عارف يكلمها علشان الحصانه الدوليه اللى واخداها


الحصانه دى جايه من أنهم شخصيات دوليه والعبث معها بيكون أخطاره رهيبه من المجتمع الدولى وأعتى الأنظمه بتعمل لكده ألف حساب ومفيش أعتى من النظام الأيرانى ( راجع الأنترنت للتأكد )


علشان كده البرادعى زيه زى حضرتك فى المطالب بالعكس أنا عارف صدق مطالبك ( مع أنى معرفكش بس متابع لمشاركات الأعضاء وبقدر الحمد لله أفهم فكرهم ) لكن مش متأكد من صدق مطالبه ( لما يحدد بالضبط برنامجه يبقى أعرف صدق مطالبه لأنه أذكى من أنه يرجع فيها )


يبقى أنا شايل من دماغى أفضلية البطوله علشان يكون تفكيرى سليم ( من وجهه نظرى )


مواصفاتى للرئاسه وضحتها
بالنسبه لترشيحى .... ولا واحد ينفع ( حتى الأن ) لأن محدش قال هيعمل أيه غير البسطويسى بس أنا مش متابعه كويس , يمكن لما الكل يحدد برنامجه أشوف الفروق بينهم


حضرتك ممكن تسألنى طب شايف البرادعى لا يصلح ليه , زى ما قلت لحضرتك ولا واحد يصلح حتى الأن مع تحفظى على نقطه أن البرادعى عارف أن فيه ثوره يوم 25 ومجاش من السفر ومش مقتنع بأن السبب أنه ميخدش المنظر من الشباب , المهندس ممدوح حمزه نزل وبالبلدى أشتغل خدام للشباب قى ميدان التحرير وبيفتخر بكده وممدوح حمزه الكل عارفه كويس وعارف مقداره , بس يمكن أفعال ابرادعى تغفر له ( من وجهة نظرى ) الموضوع ده لكن لغاية ما يبان أفعاله هو بالنسبه لى لا يصلح زيه زى غيره

وعلى فكره فيه ناس كتير بتختار البرادعى لمجرد العاطفه فى أنه عارض مبارك

زى ما فيه ناس كانت بتنتخب الأخوان المسلمين عندا فى الحزب الوطنى من غير ما تعرف عنهم حاجه ( برضه ليس تشكيك فى نواياهم )


كل ده بعيد عن موضوع أنه ليبرالي ولا علمانى ولا أى حاجه ( تفرق معايا كتير ) لأنى سمعت الكلام ده بس لسه متحققتش منه لأنى مش بمشى ورا كلام أى حد ( مع أحترامى للكل ) لأنى بعرف الحمد لله أدخل على النت وأعرف كل حاجه عن أى شخص ودى ميزة الأنترنت وخصوصا لما يكون البحث بالأنجليزى مش بالعربى لأن فى الحوارات الأجنبيه الكل بيتكلم بمبادئه اللى مقتنع بيها لأنهم بره بيراجعوا كل المواقف وما بيرحموش الكذاب


أتمنى أكون جاوبت على سؤالك وعذرا للأطاله
مع تحياتى