الموضوع: زيوت كاسترول !

المشاركة الأصلية كتبت بواسطة wahid 1127

وبناء على راى الشباب المحترمين فى المنتدى جربت زيت كاسترول ماجنتك

وبصراحة حاسس بفرق كتير الماتور صوت اهدى والسحب اسرع

معايا هوندا سيتى 2008 _1300 سى سى 163000 كيلو

ما تعتمدش على تجارب الآخرين.. خصوصا إذا كان معاهم عربيات مختلفة عن عربيتك

غالبا هتلاقي آراء متباينة عن الزيت الواحد.. ﻷن أغلب الناس بتحط الزيوت في عربياتها بدون أي قواعد.. مجرد آراء ناس تانية لناس ظروفها مختلفة عنك..

وللعلم.. مش كل الزيوت تمشي في كل المواتير.. ﻷن المواتير مش زي بعضها.. وكل واحد وله طلبات.

علشان كده بنقول إن الكتالوج هو المرجع والفيصل في اختيار الزيوت.. وليست التجارب

ولما تختار زيت.. اختاره بناءا على مواصفاته.. اللي لازم تبقى زي الكتالوج .. إذا ما كانتش أحسن منه.

وارد تلاقي زيوت متشابهة في المواصفات.. وساعتها بس ممكن تفاضل ما بينهم من ناحية الماركة... ولو إنك مش حتلاقي فرق في أداءهم لو كانوا زي بعض بالضبط في المواصفات.

مواصفات الزيت ما هياش لزوجة وبس... في أكواد تانية مهمة جدا لازم تراعيها وتتأكد إنها ماشية مع المكتوب في الكتالوج.. ﻷن الأكواد دي بتدي فكرة عن الأداء الفعلي للزيت ومدى كفاءته في الحفاظ على موتورك.

أنصحك تاخد فكرة عن كيفية فهم الأكواد دي من الموضوع دع

http://www.nilemotors.net/Nile/341680-a.html

ولو محتاج أي مساعدة أنا في الخدمة.


...

المشاركة الأصلية كتبت بواسطة Nfs Rivals

بوريو باشا .. عاوز رايك في حاجة لو سمحت

انا بحط للنوبيرا زيت للمحرك .. بيزول اﻻلمانى الصنع
كل خمستﻻف كم.. ابو 130ج بالتغير وكل غيار زيت
بغير الفلتر ... عشان احافظ على شمايز واسطوانات المحرك
وزيت فتيس اﻻوتو عندى برضة بغير زيت بيزول الخمسة
لتر
ب290ج وفلتر الفتيس ب60ج مع التغير

اية رايك في زيت محرك بيزول للنوبيرا 2
و زيت بيزول للفتيس اﻻوتو للنوبيرا برضو

كويس ومناسب ليها وﻻ مضر.. خاصة ان مفيش مكانيكى
تقوله ايه رايك في زيوت بيزول ﻻى مكن عربية
اﻻ ويشكر فية.. مع انه مش كسبان حاجة في مدحه
لزيوت بيزول اﻻلمانى الصنع.. المعبأ فالخارج
خاصة ان ان كتالوج النوبيرا عندى مسخرة السنين والله
عندى بيقولى محركها عاوزة زيت10w30
تخيل.. طب انا اﻻن العربية عاملة 88 الف وكسر
احطلها الموبل ابو عشرة على تﻻتين زى مالكتالوج بيقول
وﻻ زيت تقيل لزوجة عالية زى
ال
50w

بص يا باشا..

أولا.. أنا معرفش الزيت أبو ١٣٠ جنيه وأبو ٢٩٠ جنيه... أنا اللي أعرفه مواصفات وبس..

الزيت أبو ١٣٠ جنيه ده مواصفاته إيه؟؟ يعني لازم تقوللي لزوجته كام وأكواد جودته إيه.. ساعتها أقوللك كويس ولا وحش..

ولو الاتنين كويسين.. ممكن يردو يكون فيه واحد منهم جودته أعلى... بس ساعتها الاختيار بيبقى حسب انت عايز إيه من الزيت وهتعمل إيه بالعربية.

أما بقى لو حصل ولقيت زيتين زي بعض بالظبط في المواصفات.. ساعتها بس تدور عالماركة... ولو كانوا الماركتين مضمونين.. ابقى دور على بلد الصنع.



ثانيا... موضوع اللزوجة التقيلة والخفيفة ده فيه كلام كتير غلط منتشر بين الناس.. لإن الناس واخدة نص الكلام وسايبة بقيته..

اللزوجة التقيلة كويسة لإنها بتدي طبقة تزييت اتخن شوية.. وبالتالي بتبقى كويسة لما "تحمل" على الموتور.. زي حالات الشد بالموتور أو طلوع المرتفعات أو قطر السيارات..

بس مشكلة الزيوت التقيلة عموما إن انسيابيتها في الموتور بطيئة شوية.. خصوصا في بداية التشغيل (وانت عارف إن أخطر وقت هو بداية التشغيل).. وأحيانا ممكن ما توصلش للأماكن الضيقة.. وبالتالي بتفقد ميزة التزييت أساسا.

الزيوت الخفيفة بالعكس.. انسيابيتها أسرع.. وبتعمل مقاومة أخف على الموتور.. وبالتالي بتوفر في البنزين.. بس أحيانا ما بتديش الحماية الكافية... بالذات مع اللزوجات الخفيفة جدا زي 0W-20 أو 5W-20


طيب نعمل إيه؟؟؟ ده كل حاجة وليها عيوب ومزايا!!!

ملخص الكلام..

ما تحطش حاجة من دماغك... الزيت بتاع الكتالوج متجرب في ١٠٠ موتور في المصنع قبل ما ينزلك في السوق... والصانع مش هيجازف بسمعة عربيته بحاجة مش مضمونة.. ما تقلقش.

وبعدين ٨٨ ألف كيلو دي يعني الموتور لسه جديد .. ولو بنحسب بحسابات الاستخدام الطبيعي للعربيات في العالم كله.. يبقى الـ٨٨ ألف دول معناها إن العربية عمرها حوالي ٤ سنين...

أمال لما الموتور يعمل ٢٥٠ ألف هتحطله زيت إيه.. فالفلين؟؟ ده أنا معمر موتور عربية والدي على ٣٤٠ ألف.. وماكانش محتاج غير نص عمرة فعلا.


عموما.. ادخل على الموضوع ده يمكن تغير رأيك..

http://www.nilemotors.net/Nile/477071-100.html

والموضوع ده لو عايز تعرف ازاي تختار الزيت الصح وازاي تعرف الزيت الكويس من الوحش.

http://www.nilemotors.net/Nile/341680-a.html


ولو الزيت بينقص عندك.. شوف المعلومات اللي في الموضوع ده قبل ما تفكر في نص عمرة

http://www.nilemotors.net/Nile/418186-a.html


...