نرجو الاهتمام بهذا الموضوع هل الكيك داون

**marwan_147** · 14-04-2008 04:19 AM

هل الكيك داون كتير يرهق موتور الانسر 1300 الخليجى ....وشىء اخر عندى سماعتين فقط فى الابواب الامامية فهل من الممكن ان اعمل اتنين اخرين فى الخلف ام هذا يقلل من السيارة وتحياتى للجميع ..واشكر من القلب من اقامو هذا المنتدى فوالله انا استفت منكم ايها الاعضاء كثيرا اشكركم

**sammor_28** · 14-04-2008 04:37 AM

على ما أعتقد ان كتر الكيك داون او التسقيط يعني بيتعب الموتور وده لأنك بتبقى مضطر انك تقرص عليه وده بيقصر عمر الفتيس والموتور...وبالنسبه للسماعات اعتقد طالما انها نوع نظيف وراكب بطريقه نظيفه من غير ما يبهدل العربيه مافيهوش مشكله..والله واعلم

**مصراوي جدا** · 14-04-2008 01:30 PM

استاذ MAZMAZ أهلا بيك معانا في المنتدى ومبروك العربية

هو موضوع الكيك داون يعني بتسقط نقله يعني صوت الموتور بيعلى والـ RPM فمفيش مشكلة منه طالما الـ RPM مدخلش في مرحلة الخطر انما طبعا بشكل عام اكيد المحرك اللي صاحبه بيحافظ عليه وبيمشي بيه على مهله هيعيش اطول من المحرك اللي صاحبه بيحرق عليه كتير وشغال علطول الـ RPM على خمسة مثلا

بخصوص السماعات واضح ان عربية حضرتك خليجي هي اللي بتيجي بدون سماعات خلفية انما طبعا تركيب سماعات مش هيضر بالعربية او يقلل قيمتها اطلاقا طالما متركب بشكل نضيف

**اسلام المصرى** · 14-04-2008 08:36 PM

بسم الله الرحمن الرحيم
نصيحة منى لحضرتك أستخدمه فقط عند الحاجة , أعتبره مش موجود , و لما تتزنق دوسسسس :)
حضرتك مع الوقت لما تتعود على دواسة البنزين ممكن تشد بالعربية بدون الحاجة الى الكيكداون , يعنى تسارع طبيعى , مع أخذ كلام الأخوة الأفاضل فى الأعتبار أيضا :)
ربنا يكفيك شر الطريق.

**marwan_147** · 14-04-2008 10:59 PM

الف شكر يا اسلام على النصيحة القيمة وربنا يحفظك

**zikoziko** · 23-02-2009 01:35 PM

ممكن يا جماعه سؤال انا مش عارف يعنى ايه كيك داون فى السيارات انا عربيتى لانسر 2005 1600سىسى اتوماتيك ممكن توضحلى يعنى ايه وايه فايدته وبتعمل ازاى.

**memoo_1st** · 23-02-2009 02:00 PM

المشاركة الأصلية كتبت بواسطة zikoziko

ممكن يا جماعه سؤال انا مش عارف يعنى ايه كيك داون فى السيارات انا عربيتى لانسر 2005 1600سىسى اتوماتيك ممكن توضحلى يعنى ايه وايه فايدته وبتعمل ازاى.

الكيك داون يعني حضرتك مثلا في المانيوال لو انتا ماشي على التالت وعاوز تشد او عاوز تجمع سرعة بسرعة تسقط غيار وتجيب التاني وتحرق علية .
نفس الكلام في الاوتوماتيك بس بدل ما حضرتك تسقط غيار بأيدك بتدوس بنزين جامد العربية تستجيب وتسقط غيار في الفتيس الاوتو وتجمع بسرعة و ال RBM يعلى معاك .
اتمنى اكون قدرت اوصل الصورة لحضرتك .

**man_66666661** · 23-02-2009 04:49 PM

فعلا كلام الاعضاء صحيح بالنسة لموضوع الكيك داون كل ما قل طال عمر الموتور اما بالنسبة لموضوع السماعات ممكن تشيل البوردة الاصلية الى عند ومحل الكاسيت يعملك بورد من الخشب وعليها موكيت وركب السماعات الى انت عايزها براحتك