-
اخى العزيز الأمر تفسيره العلمى بسيط جدا، الموتور طالعة منه قوة بمقدار معين متناسب مع كمية البنزين اللى رايحاله ، طول ما العربيية ممورة او انت حاطط رجلك على الدبرياش فالقوة المطلوبة من الموترو هى القوة اللازمة لتحريك اجزاء الموتور فقط وهى قوة مش كبيرة، لما نات بتديها الأولانى، وتبدى تشيل رجلك من على الدبرياش فانت كدة بتحط حمل جديد على المحرك هو حمل تحريك العربية بحالها، وبالتالى لو مديتلوش بنزين زيادة يتناسب مع الحمل الجديد الموتور هيبطئ لحد ما سرعته توصل لصفر وساعتها هيهمد تماما لأن الموتور مافيهوش قدرة للبدء من السكون بدون مساعدة خارجية* ، علشان كدة لازم لما نبدأ الحركة بالعربية نديها شوية بنزين اضافيين علشان العربية تتحرك
المبتدئين عادة بيدوا شوية البنزين الأول، فصوت الموتور يعلا وبعدين يبتدوا يشيلوا رجلهم من على الدبرياش فالحمل الإضافى يخفض عدد لفات المحرك الى الطبيعى، لكن مع الوقت انت بتتعلم انك تديها بنزين اثناء رفع الدبرياج ، وكمان بتبتدى تحس امتى المحرك صوته وطى جدا لدرجة انه ممكن يبطل فبتدى شعرة بنزين زيادة
برضه لازم تلاحظ ان كمية البنزين اللى بتديها لازم تتناسب مع الحمل اللى انت هتحطه على المحرك، يعنى ايه؟ يعنى لو انت متعود تدوس على البنزين بقدر معين علشان العربية تبتدى تتحرك على ارض مستوية، ممكن تلاقى نفس الدوسة مش بتكون كافية لبداية الحركة على مطلع والعربية بتبطل منك ، لأن القودة المطلوبة لتحريك سيارة ضد مقاومة الإحتكاك فقط اقل بكثير للقوة المطلوبة لتحريك سيارة ضد الجاذبية الأرضية، لذلك انت لو واقف على مطلع هتحتاج بنزين اكتر
كذلك لو العربية محملة ناس او شنط هتلاقى انك محتاج تديها بنزين اكتر
فى حين انك لو واقف على منزل ممكن تحرك العربية برفع قدمك اليسرى من على الدبرياج فقط دون ان تدوس بنزين لأنك مش محتاج بنزين كتير لأن الجاذبية الأرضية هنا بتكون معاك وهكذا
___________________________________
*احنا لما بندور العربية الصبح بندى الموتور مساعدة خاجية من خلال الوحدة المسماه المارش، وبدونها لا يستطيع المحرك بدء الحركة منفردا-حتى لو المارش بايظ وحبينا ندور العربية لازم ندى الموتور مساعدة خارجية عن طريق دفع السيارة نفسها ومن ثم تعشيق الموتور على العجلات ليأخد حركة من العجلات ويدور)
-
شيك قوي رد سبعاوي ، فعلا مع إنها معلومة معظم الناس اللي بتسوق فاهماها بس في أناقة و بساطة في الرد
-
شكرا على الاهتمام يا باشمهندس سبعاوى ربنا يبارك فيك
-
ربنا يبارك فيك علي افادتك لكل المبتدئين وانا واحد منهم
-
تعرف اول ما اتعلمت السواقة اتعلمتها في الركنة لاني كنت غاوي و كان سني صغير و مكانوش بيرضوا يخلوني اسوق في الشارع برة كتير و بعد ما اتعلمت شوية في الركن و عرفت ازاي البنزين و الدبرياج و الكلام ده بدات اخرج للسارع واحدة واحدة و اول مرة خرجت اسوق علي العمومي برة وقفت بالعربية علي جنب و قعدت ابص في المرايا و حواليا و قلت انا مش هعرف اسوق سرفيس و عربيات كبيرة و صغيرة و نقل عام و كل ده اعمل ايه بس و كنت اكاد و الله اني اعيط و ابكي لاني بحب السواقة اوي و ازاي بعد ده كله معرفش اسوق؟؟!!
لكن واحدة بواحدة اتعلمت و اخدت علي الموضوع و خاصة اني بحب السواقة و بقت الحكاية سهلة و حلوة خالص و الموضوع بييجي بالتدريج و وحياتك انت السرفيس حاليا بيشتكي مني ناس كتير لما يجي السرفيس يكسر عليهم يقفوا فورا لكن انا بدوس كلاكس و رعاش و بكمل و بيقف زي الجزمة و بالذات بيبص في المراية عنده يا عيني يلاقي اكصدام لادا بس صراحة لو كنت سايق حاجة جديدة باخد بالي لانه ممكن ساعتها يكسر بقلب ما هو عارف اني حقف له و هخاف.
المهم انت متعقدش الحكاية و صدقني حتيجي لوحدها و بالممارسة.
-
التسخيييييييييييييييييييي يييييييييييين
Content Relevant URLs by
vBSEO 3.6.0 PL2