السادة المحترفون : السلام عليكم/
امتلك استرا 2003 فل اوبشن اوتوماتيك اول يد استلام ديسمبر 2002 وماشي بيها حتى الآن 215 الف كم على اساس اني كنت ساكن في اكتوبر لمدة 6 سنوات قبل انتقالي لمدينة نصر. علشان كده ال.. كم عالي شويتين.

المهم انا من الناس الفرافير اللي مش عايزين وجع قلب ومش بحب الميكانيكيين الفتايين، علشان كده انا مش بروح غير التوكيل اللي في الهرم وبعدين بعد ما نقلت مدينة نصر كملت مع اوتوماستر مدينة نصر. واكتشفت بعد سنين من الخبرة ان الفرق بين التوكيل والميكانيكي من 15% الى 25% طبعا مع الأخذ بالإعتبار الفرق الرهيب في عمر قطع الغيار الأصلية وأداءها مقارنة بأي مصدر آخر. للأسف انا اتعلمت كتير من عربيتي التانية اللي عمرها ما راحت صيانة في التوكيل. فبفضل ادفع زيادة واشتري وقتي وتعبي.

الموضوع: عربيتي ماشية 216 الف كم. بالنسبة للميكانيكا واداء وقوة وعفشة انا مش بشتكي من أي شيء. لكن..
1= بدأ التكييف تعب نتيجة تسريب في الكويل اللي اسفل التابلوه. وللأسف الكويل غير موجود في التوكيل ولا حتى استيراد في الحرفيين. قدرت اظبط كويل اوبترا مؤقتا لكن شتان في التبريد سرعة وأداء.

2= صاج العربية كأي اوبل أصبح جربان آخر حاجة ومحتاج رش نضافة (حتى السقف)

السؤال:
1= ابيع عربيتي واحط 10000 جنيه وأشتري ميجان2007؟ واسمي جبت موديل حديث واوبشن اكتر وشكل احدث
2= ارش عربيتي =وتخسر في قيمتها= وابعت اشتري كويل مخصوص من الخارج على حسابي وتقريبا بالشحن والتركيب ورشة نضافة مع كاسيت وسماعات وشوية حركات حدفع حوالي 7000 جنيه؟ ولسه عربيتي عارف اصلها وفصلها

ملاحظة: انا حريف مطبات علشان كده الألماني بيستحملني

جزاكم الله خيرا على النصيحة

اخوكم محمد