هل السباحة تغني عن الجيم ؟

**ehab** · 08-04-2011 03:05 PM

السلام عليكم

انا عايز العب رياضة تبني جسمي شوية بس ميال اني اكون بامارسها لوحدي
معظم اصحاب بيروحوا جيمات بس جربت اروح معاهم مرة حسيت الجو مش عاجبني

فبفكر العب سباحة يعني اروح النادي مثلا يوم و يوم اعوم بتاع ساعة مثلا
هل دا يكون كافي و هل ممكن اجيب مثلا دانبلز العب بيها في البيت او عقلة

لو في حد هنا ليه خبرة يقولي لاني مشكلتي اني نحيف شوية فعايز ازيد حبه
و شكرا

**WalidAdel** · 08-04-2011 03:22 PM

هو اكيد ليه فايده حضرتك بتشوف الناس بتوع ال Water Polo عاملين ازي ماشاء الله
ميزة السباحه عن الجيم انها بتحرك كل عضلات الجسم في وقت واحد و دا بسبب قوة اندفاعك في الميه
بس نصيحه خاليك في الاول تعوم براحه علشان جسمك مايشدش اوي و بعدين حط لنفسك Time للدوره الكامله رايح راجع يعني و حاول تحسن بقي الوقت دا عن طريق سرعه الحركه و قوة ضربتك في الميه
دي معلومات كده علي الماشي لاني ماجربتش احسن وقتي لان الثانيه و الثانيتين بتتعب علشان تقللها وانا جسمي ماليان حبتين تلاته بس مستني اخس شويه في الجيم و ابتدي سباحه ان شاء الله

**tito_1980** · 08-04-2011 03:42 PM

عندي نفس مشكلتك و للاسف السباحه لا تغني عن الجيم

**megamoudy** · 08-04-2011 03:49 PM

انا اتعقدت نفسي اخس ومش عارف
انهي احسن الجيم ولا السباحه

**otefa** · 08-04-2011 03:54 PM

السباحة تغني عن الجيم كلياقة كاملة متكاملة(تشغيل كامل لكل عضلات الجسم+تحسين رائع للجهاز الدوري والتنفسي+تحسين الصحة النفسية ورفع الروح المعنوية بصفة عامة+رياضة أمنة لحد كبير لاتضغط على المفاصل والعمود الفقري)
ولكن التضخيم وزيادة الوزن هايبقى محدود
ممكن تبدأ أولا بالسباحة لفترة شهرين تظبط فيها وتشوف طبيعة جسمك كمان وأستجابته يعني فيه ناس ممكن شوية سويدي تجيب نتيجة جيدة وعضلاتهم تبان كأنهم بيلعبو حديد على خفيف (أنا من النوعية دي)
ده غير مجهود السباحة هايفتح نفسك على الأكل بزيادة
فيه حاجة كمان قبل ماتبدأ السباحة بساعتين تقريبا تكون واكل أكلة محترمة مليأة بالكربوهيدرات(طاقة) علشان لما تتمرن ماتاخدش من المخزون في جسمك

**sayed911** · 08-04-2011 03:54 PM

انا مش ها اقول لحضرتك غير اني بلعب سباحة من وانا عندي 6 سنين :d والسباحة دي عندي زي الوهم كده :d :d بص هيا ها تبنيلك جسم خيالي !!! ولكن متحلمش بأجسام ضخمة والكلام ده هيا ها تقسم جسمك كويس جدا وطبقة الشحوم والدهون ها تختفي الى حد كبير جدا ولكن مينفاعش تاخد السباحة كده كهواية لأنه حركاتك الغلط ممكن تخليك تقضي ايام في الحمام من غير اي استفادة لازم يكون معاك عنصر خبرة في بداية الموضوع عشان تعرف ازاي تأدي الحركات بطريقة متكونش مرهقة لأنه زي ما انتا عارف السباحة لعبة انسيابية مش لعبة قوة :d :d واي استفسار تاني ها اكون موجود عشان ارد على حضرتك ..

**midoabdeen** · 08-04-2011 03:54 PM

بس هو على حسب الهدف اللى انت عايز توصلة
ياعنى لو عايز عضلات وجسم مشدود طبعا السباحة لا تغنى عن الجيم
بس لو عايز لياقة وجسم متناسق طبعا السباحة احسن بكتير من الجيم
ومن ناحية انك بتقول انك ماكونتش مرتاااح فى الجيم دا هاتلاقية لان كل اللى معاك او عموما فى الجيم بيحب بعرضها على اللى لسة جاى جديد
بس لو انت اقل من 18 سنة انصحك بالسباحة اكتر
ولو هاتنزل جيم اختار جيم كويس ويكون الكابتن اللى فية فاهم مش عايز يعمل شغل وخلاص واوعى تاخد مكملات او اى حاجة قبل 6 شهور على الاقل من التدريب علشان تكون ملم بكل حاجة وابعد عن النشطات خااااااااااااالص