أنا تعمدت أقلل درجات التقييم لتقليل الخطأ الناتج من أن بعض الناس تميل لوضع تقييمات متفائلة و العكس
برجاء المشاركة ممن يتعامل بشخصه مع الوكيل لضمان نزاهة الإستطلاع (شكرا)
عرض للطباعة
أنا تعمدت أقلل درجات التقييم لتقليل الخطأ الناتج من أن بعض الناس تميل لوضع تقييمات متفائلة و العكس
برجاء المشاركة ممن يتعامل بشخصه مع الوكيل لضمان نزاهة الإستطلاع (شكرا)
هو انا روحت بعربيه المدير بتاعي لحد صيانه 5000 توكيل كويس بس لازم تكون حاجز قبل ماتروح انا بكلم علي مركز خدمه في جسر السويس
للأسف هوا المراكز في مجملها تاخد من سيء الى جيد
و ان كان احسنهم مركز خدمه ابو رواش احسنهم من حيث المعامله و الكفاءة و الخدمه
و لكن موضوع لن اذهب اليه مرة اخرى دة للأسف صعب لأن العربيه لسه مش في طول الامان بنسبه 100% لذلك حتى لو كان الضمان مش شغال كويس اوي فلا تستطيع الاستغناء و المجازفه بيه نهائيا
عموما ان هصوت لجيد
مركز خدمه عيسى بالمنصوره:-
قله زوق بعد 3 شهور من مركز خدمه عيسى بالمنصوره
انا الكلاكس بتاعى فرده فيه مش شغاله المهم رحت لعيسى قالولى الكلاكس مفيش عليه ضمان قلت خلاص مش مشكله كلمت مركز الصحراوى قالولى مين اللى قالك كده الكلاكس عليه ضمان المهم رحتلهم تانى وقلتلهم الكلام ده قالولى ماشى بس بعد شهر عشان لسه هنقدم طلب المهم صور الضمان والرخصه والموافقه جت على كلامهم بس الكلاكس اللى مش موجود طيب والحل الكلاكس امته قالولى استنه كمان عشر ايام روحت بعد عشر ايام قالولى تعالى يوم السبت روحت يوم السبت قالولى لسه برضه مفيش غير بتاع العربيه الأسبيرانزا الصغيره هو اللى موجود عايزه نركبهولك بس النغمه هتبقى مختلفه قلتله لآ بدام النغمه مختلفه فقالى خلاص اشترى الفرده التانيه الصغيره برضه من عندنا عشان يبقى الأتنين زى بعض صغيرين المهم قولت ماشى وامر لله مع انى عارف انى كل ده مش هينفع ونصب المهم بعد مركبه لقيت الصوط واطى قوى وصوته زى الموتسيكل بالظبط قولتلهم لآ مش عايزه المهم شالوهم وقلتلهم انا مش عايز الا اللى زى بتاع العربيه الأصلى المهم بعد شهرين كمان وطول الفتره بتاعت الشهرين دى اروح كل اسبوع كام مره يقولولى هما سافرو انهارده إن شاء الله وبكره تعالى واروح بكره يقولولى برضه مفيش غير الصغير عايزه ماشى مش عايزه مفيش غير ده مش عاجبك كلم خدمه العملاء المهم انا قبل مرحلهم كلمتهم بالتليفون قالولى الكلاكس موجود بس انا لما سألت سألت على اساس انى انا عايز اشترى كلاكس ومقولتلهمش انى انا ولا انه المفروض يتبدل بالضمان فقالولى موجود واول مرحتلهم قالولى لأ مش موجود انا خلاص مش عارف اعمل معاهم ايه يعنى مش عارف انا نصب ده ولا ايه يعنى معنى كلامهم انى الكلاكس لو هشتريه موجود لكن لو بالضمان يدولى الصغير ومفيش اى فايده اخر ما زهقت بعد 3 شهولا كلمت خدمه العملاء عشان اشتكلهم ورض عليا واحد وخد بيانات العربيه وبرضه ولا حياه لمن تنادى اتصللت تانى بخدمه العملاء ردت عليا انسه منال قولتلها على الموضوع من اوله وخدت برضه بيانات العربيه وبرضه قالتلى هرض عليك فى خلال يومين وبرضه مفيش فايده بعد كده كلمت م- حسام فتحى بابو رواش وبصراحه راجل محترم قالى متقلقش إن شاء الله هحللك الموضوع ده بس خلى أ- طارق مسئول عن الضمان اللى عند عيسى يكلمنى حالا انا مستنى على مكتبى وكلمنى كمان نصف ساعه المهم كلمته كمان نصف ساعه وقاللى خلاص كلم أ- طارق وهو قاللى على السريال بتاع الكلاكس وانا هبعتهوله المهم كلمت أ- طارق وأ- طارق قالى خلاص إن شاء الله هجبلك الفرده اللى بايظه بس ادينى اسبوع على ما توصل قولتله ماشى مفيش مشاكل روحت بعد اسبوع قالى تعالى يوم السبت عشان لسه مطلعناش الحاجه من المخزن روحت يوم السبت اللى فى الأستقبال هناك واحد اسمه وائل وقاعد يبعت فيا كل يوم وحططنى فى دماغه مش عارف ليه ولقيته بيقولى احنا خلاص قفلنا الضمان انهارده خلاص والكلام ده كان الساعه 12 قولتله ازاى يعنى هو الضمان ليه وقت المهم دخلت ل أ- احمد وصفى المدير بالمعرض قاللى طيب انا هكلم وائل المهم كلم وائل ووائل برضه حطيطنى فى دماغه ومفيش فايده روحت تانى ل أ- احمد وصفى قاللى طيب معاك مهندس مجدى روحت للمهندس مجدى المهم بعت يجيب الكلاكس من المخزن وجاب الكهربائى عشان يركبه بعد كل ده لقيته جايبلى فرده اليمين وانا اللى بايظه عندى الشمال وركبهالى وقاللى مفيش غير كده المهم سبتها وطبعا مش عايز اقول لحضرتك الكلاكس صوته وحش قد ايه وواطى قد ايه لأنه طبعا فردتين يمين زى بعض المهم وائل اللى حططنى فى دماغه لقيته جاى بيقولى على فكره انا ركبتهولك بمزاجى لوحده كده المهم رحت قلت ل أ- احمد وصفى على اللى قاله قاللى معلش ومش عارف ايه والحمدلله انك ركبت الكلاكس وخلاص المهم مشيت وانا ماشى لقيت وائل ده بيكلمنى فى التليفون وبيشتمنى وبيقولى ابقى اشوفك تانى هنا هلغيلك الضمان انا مش عارف هو حططنى فى دماغه ليه بصراحه ده مش ممكن ينفع مركز خدمه ابدا دول مجموعه بلطجيه على حراميه على نصابين انا مش عارف حضرتك اعمل ايه دلوقى ياريت خضرتك تقولى لآنى بسبب التوكيل ده انا خلاص زهقت من العربيه بصراحه يعنى حضرتك انا اهم من الكلاكس بالنسبالى انى يكون فى وقفه مع المركز ده انا اسف على التطويل
بص مراكز الخدمه دي اخرها الصيانات الدوريه
لكن لو في اي مشكله في عربيتك او حاجة عايزة تتغير في الضمان يبقا مفيش اودامك غير ابو رواش افضل شيء افضل من مركز الصحراوي الرئيسي كمان
يعني شوف انت استنيت اد ايه و تعبت اعصابك اد ايه لو كنت كلفت نفسك بمشوار لهناك كان اتحل الموضوع في يوميها لو كنت اتصلت و اتأكدت بس في التليفون الاول و كانت خلصت المشكله
عموما للأسف دة حال توكيلات كتير في مصر فما بالك بمركز خدمه معتمد !!! فيا ريت تاخد نصيحتي انك لو في بعد كدة اي مشكله متروحش عيسى
ووائل دة انت اللى غلطان كنت تستخدم معاهم من الاول سياسة الصوت العالي و ازاي كمان تسكت لما يقولك مش هدخلك تاني و الكلام دة !!!!!!! لازم تروح تفرج عليه المركز كله و تكلم مدير الفرع و تبعت شكوى رسميه بأسمه تحديدا
اتصل بخدمه العملاء و كلم هناك الاستاذ محمد ابو الخير و قدملهم شكوى رسميه فيه مش بس بالكلام و روح المركز و خليه يوريك كدة يعني ايه مش هتدخل المركز و مش هتبقا في الضمان !!!!! مينفعش تسكت على كلمه زي دي
بس الحل العملي عشان تشتري دماغك زي ما بقولك كدة متروحش عيسى تاني غير في الصيانات الدوريه العاديه بس يعني على اد تغيير زيت و فلتر و شكرا
والله أنا لو مكانك كنت ضربته بالجزمة
في الأماكن دي ماينفعش غير سياسة الصوت العالي وقلة الأدب
ولعلمك المركز الرئيسي مش هايفرق عن البلطجية اللي بتتكلم عليهم دول إلا في الشياكة والأدب في التعامل ..ولكن أنا واثق إنك بردو لو كنت رحت الصحراوي ماكانوش هايغيرولك الكلاكس على طول لأنهم بتبعوا سياسة الأمر الواقع !!
يا باشا خلى التوكيل و الشكل و التخلف بتاع التوكيلات دا للحاجات التقيلة مش تركيب حتة كلاكس تعمل الحوار دا كله مع الناس دى ممكن تروح لواحد كهربائى و تشترى الكلاكس من برة و خلاص
هو ده اللى حصل فعلا ياباشا
انا لو مكانك كنت هزئته *****وعملت محضر واوصى عليه كماان عشان
يكلم عدل مع اللى بيأكله عيش عشان واحد زى ده تلاقيه مسنود فلازم
يتربى ويتاكل قلمين على افااه عششان يعرف ان الله حق
ااااااه لو حصل معاياااا كنت******
انا محروقلك والله العظيم
******
---------------
هدى أعصابك يابوحميد وماتنساش قواعد الكتابة فى المنتدى
نرجو عدم الخروج عن النص مرة أخرى
الإدارة
دول غير محترمين ويستهلوا ردود من ايها بس الواحد فى منتدى محترم وكان من المستحسن انك تعمل محضر سب وكمان تبلغ حماية المستهلك وكمان تصيح لهم فى كل حتة علشان يخسروا ويقعدو فى بيتهم لغاية مايتعلموا الادب
يا جماعة انا بعت عربيتي a516 لسبب رئيسي هو التوكيل لسؤ الخدمة وعدم ضبط السيارة بشكل محترم وتكرار الشكوى في كل مرة من نفس الاشياء
سبحان الله انا عمل صيانه الالف و ال 5000 في عيسي و رحت بتاع 5 مرات تانيه واحده لتربيط العفشه و مره علشان الفرامل وواحده علشان اغير كف المرايه اليمين و مره كنت بسأل علي حاجه في صوت الشكمان و كل مره المهندس مجدي بسعه صدر اما يرد عليا او يطلع معايا و يجرب العربيه بنفسه و شيكلي علي كومبيوتر العربيه بتاع مرتين زياده عن مرات الصيانه الدوريه و ببلاش
بصراحه التوكيل رديء جدااااااااااااااااااا ومينفعش يتقال عليه مركز خدمه وصيانه لانهم ميعرفوش حاجه .............
كرهونى فى العربية لحد ما بيعتها زبالههههههههههههههههههه
أ<مل حاجة إن الكلام هدى عن توكيل أبو الفتوح و لكن بكل مساؤه و مميزاته أنا تقديرى له جيد
كفاية إن العربية ماسكة نفسها فى السوق و رأسها برأس عربيااااااااااات كتيييير
طب يا شباب ايه أخبار توكيل أسبيرانزا اللى فى اسكندرية
انا ملاحظ ان محدش قال رأيه فيه خالص
معروف اساسا ان عيسى اكبر حرامي في المنصوره
:I_angr1[1]:
انا مشكلتي ان انا اشتريت العربية ومش عارف اروح اعمل صيانه 1000 بسبب ضمان العربية اللي لسه موصلش بقاله شهر وانا وبعيد عن حضراتكم عامل 1900 كيلو لحد دلوقتي . بس الحمد لله الضمان وصل من يومين بس للاسف مجبوش معاه ااعرض اللي منزلوه ابو الفتوح ( 20000 كيلو او عام ) ايهما اقرب و ده عرض صيانه مجاني وبيغيروا كل حاجة ببلاش العرض ده لكل الناس اللي اشترت في الفتره اللي ما بين 1/1/2009 لحد 31/3/2009 وانا الحمد لله كنت من الناس دي اللي في شهر مارس بس للاسف قالولي ان انا ملاحقتش العرض (ده المعرض) علشان انا عقبال ما طلعت الرخصة وبعتوها كنا بقينا في شهر ابريل . وطبعا ده كلام مايدخولش العقل
المهم انهم توصلوا لفكرة تانيه وهو ان ابو الفتوح منزل العرض ده علي عربيات معينه ,
بمعني ان فيه ارقام شاسيهات معينه هي اللي عليها العرض وللاسف ان رقم الشاسيه بتاعي مدخلش في العرض بس مشكورا ادارة المعرض قالتلي انهم حايبعتوا الورق تاني ويحولوا يجبولي العرض في اقرب فرصه. علي شان انا للاسف مدخلتش في السحب ده اللي منزلوا ابو الفتوح ( ده برضوا كلام يدخل العقل) عمتا انا سايبهم يومين كده واشوف حايعملوا ايه
لاني عرفت من مصدر موثوق منه ان ابو الفتوح كان بيبيع العربيات في الفتره دي علي اساس العرض اللي موجود واللي مش عايز العرض بيتخصم جزء من سعر العربيه وان المعرض اللي انا اخدت منه العربيه كان واخدها من غير العرض وبسعر اقل وباعها بسعر العربيات اللي عليها عرض - وانا والله عرفت موضوع العرض ده بالصدفة بس مش مستعد اني اتنازل عنه ورفضت استلام ضمان العربيه الا بعد استلام العرض وفي نفس الوقت خايف العربيه يحصلها حاجه بسبب ال صيانه ال1000 اللي لسه معملتهاش ومش عارف اعمل ايه ؟؟؟
السلام عليكم ورحمة الله وبركاته
تجربتى الشخصيه كويسه بصراحه من حيث التعامل وتصليح المشاكل
انا رحت مرتين مره للدقى ومره لابو رواش بصراحه ابو رواش تعاملهم عادى مش وحش ومش حلو لكن كفاءة التصليح والامكانيات كويسه جدا
بالنسبه للدقى تعاملهم كويس جدا بس الامكانيات محدوده.
ودى تجربتى الشخصيه
حد يا جماعة ممكن يقول رأيه فى مركز خدمة أبوغالى...
ولو عاوز احجز فى أبورواش ممكن حد يكتب رقم التليفون.. وشكرا
ناس قمه في
قلة الذوق
اساتذه فى
عدم الاحترام
عباقره فى
عدم المعرفه
من الاخر توكيل مالوش لازمه لعربيات مالهاش لازمه
نرجو من الجميع ان يكون رايهم موضعى ويتم ذكر الاشايء الجيدة والسيئة التى حدثت معاة: يعنى مثلا يكون على النظام الاتى:
- نوع العربية ، السنة
- تاريخ الصيانة، نوعها
- اسم مركز الصيانة
- الاشياء الجيدة
- الاشياء السيئة
وبناء عليها ممكن نحدد التقييم بصورة صحيحة
ايضا بمراجعة نتائج التوصيت تبين ان فى بعض الاعضاء مش معاهم عربيات اسبيرانزا، فمش عارف قيم بناء على اية؟؟؟؟؟؟
انا بتعامل مع مركز ابوالفتوح في الإسكندرية في شارع كلية الطب
الناس هناك زي الفل بصراحة وبخاصة البشمهندس أحمد
ناس زي الفل
لو سمحتم أنا جبت اسبرانزا 113
عاملة 16000 وعندي صوت في تيل الفرامل والله أعلم الطمبورة كمان والا ايه والعفشة ناشفة محتاجة ربط وفردة كلاكس مش شغالة
طبعا أحتاج أروح للتوكيل قبل ما اتحرك بيها
والحقيقة اني لسه ما اعرفش عناويين مراكز الخدمة
فياريت لو تزودوني بالمعلومات دي لأني ملاقيتش في المنتدى
وألف شكر للجميع...
تجربتى مع مركز صيانة تكنو سرفيس 2 بجسر السويس
مش عاوزة اقولكم انها حاجة زبالة عندة طلمبة الباور بايظة و محتاجة تغيير فضلو يماطلونى حوالى اسبوعين و كلم استاذ فلان و استاذ فلان يحولنى على استاذ زفتان و استاذ زفتان على استاذ ابو قردان و فى الاخر مفيش طلمبة طيب يا عمى مينفعش امشى بالعربية كدا و اشتكيت فى خدمة العملاء و فى الحقيقة ناس فى منتهى قلة الذوق بردو قالولى الطلمبة موجودة بس عاوزها ادفع 1200 جنيه ليه يا حج وفين الضمان قالولى هو كدا قلتلهم طيب انا هشتكى فى حماية المستهلك رد بتاع خدمة العملاء اللى تعرف تعمله ابقى اعمله
زبالة بقى واللا لاء ؟ انا بعت للشركة الام فى الصين و هفضل اشتكيهم فى كل حتة لغاي ما اوصل لحقى لان دى ناس بتمارس البلطجة وبس
و شكرا لاتاحة الفرصة انى اقول تجربتى
اولا احب اقول للاخ صاحب الكلاكس .. اتق الله وقول الحقيقة
انا كنت واقف فى اول مرة راح فيها يشتكى من الكلاكس وشوفت اسلوبه فى التعامل مع الناس فى مركز خدمة عيسى اسلوب فى منتهى قلة الادب ، نازل شتيمة فى المهندسين والفنيين والمهندس وائل اخذ النصيب الاكبر من الشتائم وبعد دا كله عايز الناس تتعامل معاه باحترام طيب ازاى الكلام ده هم دول مش بنى ادميين زى حضرتك والا انت على رسك ريشه .
هو فى ناس كده الغرور راكبها وفاكره كل الناس هتخاف منها لما يقلوا ادبهم . يااخى اتقى الله ومتفرتيش على الناس ايه يعنى لما تروح اول مرة وما تكونش قطعة الغيار متوفرة فى الوقت ده ويقولولك على ميعاد تانى دا يدى لك الحق فى شتيمة الناس وعايزهم فى الاخر يتعاملو معاك كويس طيب ازاى
اخى العزيز اعتقد ان مشاركة واحده و تقول الكلام ده و كانك عارف الراجل صاحب الموضوع على فكرة انا متاكد من كلام الراجل لانه حصل معايا فى عربية نسيبى و خرجوا العربية برة الضمان قال اية عشان فى بند فى الضمان بيبقول انى اعمل الصيانة كل 5000 كيلو او بعد 3 شهور من نهاية اخر صيانة و بالتالى انا مش ملتزم بالمواعيد الصيانات الدورية و العربية عاملة عداد 22 الف فى 3 سنوات و مليانة مشاكل و عايزين 1300 جنية بص توكيل زبالة و بلطجية و نصابين و قلة زوق تخيل يرد عليك و يقول لك كتيب الضمان ده العقد اللى بينى و بينك و مش هاتعرف تشتكى بكل قلة زوق طبعا ياخد درجة توكيل سىء و نصابين
توكيل ابو ال * * * *:36_1_40[1]:
دول شله حرامية و نصابين و نور:36_9_4::3mla:
فعلا الشعار بتاعهم لا زم يكون
انطلاقة تنفض جيوبك :khd:
تنبيه بعدم استخدام الفاظ خارجه عن الذوق العام
26/4/2010
5:00 am
مشرف 12 أ
أنا خلاص كرهت الاسبيرنزا عشان انا من المنصورة وهضطر اتعامل مع التوكيل الزبالة
كنت محتار بينها وبين اللوجان بس استقريت على اللوجان بإذن الله
لأننى أول مرة هشترى عربية
و شفت عربية اسبيرنزا 620 a مخبوطة من قدام وسقف الماتور بس مفعوص استغربت ازاى وجديدة ويقلك فيها abs
المهم كنت واقف عند المرور وهركب ميكروباص
دقيقتين بالظبط لقيت صاحبك المخبوط اللى لسه داخل عند عيسى طالع من عندهم قلت أكيد مش عارف يعمل حاجة
أنا ابن خالى جايب العربية وبيقلى لو هتجيبها خليها للمشاوير الصغيرة يعنى معرفشى أسافر بيها القاهرة مرة اسبوعيا
قلت ازاى تبقى 1.6cc ومعرفشى اسافر بيها القاهرة مرة اسبوعيا من المنصورة قالى عشان الفرامل والأمان فيها زبالة
اولا:فى صيانة ال1000 ك كان كل الناس فى التوكيل محترمين
ثانيا:فى صيانة ال5000 ك كل الناس فى التوكيل مش محترمين ونصابين وكدابين واى مشكلة تقوله عليها يرد عليك المهندس يقولك هى كده فى كل الموديلات وطبعا انت تحاول تقنعة انك عندك مشكلة يقولك معرفش وكمان فى حاجه ضيقتنى خالص انا قلتلهم على مشاكل معينة للاسف لم تحل وكمان عايزنى احاسب عليها طبعا انا كنت هنط فى كرش المهندس راح هو ولغى البنود من الحسابات
التوكيل بتاع الصحراوى
التقيم :سئ
توكيل تكنو سرفيس شارع كليه الطب ممتاز وعملت فيه اخر صيانه كانت 9.000 كيلو والمهندس احمد وايمن ناس اخلاق عاليه جدا
ما هو طول ما انت بتغير الزيت و الفلتر من غير ما تطلب حاجة تانية يبقوا نا محترمة
انما لما تطلب حاجة تانية من حقكك تشوف الوش التانى
والحمد لله انك لسه بتغير زيت و فلتر
النوع : 516 (سابقا)
الموديل: 2007
الصيانه: دورية وبلا تأخير ,
التعاملات: ليست رديئه وايضا ليست جيده , وتميل للكسل فى الاصلاح والبطء ولكن دائما يصلحون الاعطال (بعد المعاناه)
التقييم الشخصي: متوسط
أنا من بداية ال5000 و بطلت أروح لتوكيل إسبرانزا ....بأتعامل مع مركز خدمة معتمد لديهم ، الصراحة شغلهم و معاملتهم غاية فى الذوق.... و الكفاءة فى الدقة و العمل ممتازة ده غير مصاريف الصيانة بما يرضى الله ....فوجئت بعد كده إن المركز أوقف تعامله مع إسبرانزا لإن ليه فلوس حق قطع الغيار اللى بيصرفها المركز للعميل على حس الضمان.....تخيلوا حتى مراكز الصيانة إسبرانزا بتنصب عليهم
و رغم كده فضلت أتعامل مع المركز برغم من إنه أصبح غير معتمد و ما رحتش صيانة ال 10000 ولا ال 15000 فى إسبرانزا
و إن شاء الله ربنا ما يحوجنى ليهم و ما أروح لهم خالص بإذن الله
صدقونى موضوع الضمان ده كلام فاضى و إن غيرت حاجة على حساب الضمان هايخدوه منك أضعاف على حس حاجات تانية
ياجماعه احب اقول ان ابو رواش فيه عالم نصابين
انا لسه جايب اسبرانزا 113 من اسبوع و بتبطل مني كل يوم الصبح و ساعه مااخد ملف علي البطئ غير ان فيها نتشه غريبه و انا ماشي كأنها بتفصل بنزين و روحت ابو رواش خد مني العربيه و بيتها عنده و بعدين كلمني و قال ان العريبيه زي الفل و استلمتها و لقيت فيها نفس العيب و المصيبه ان المرش اتحرق من كتر ما بحاول ادورها و رجعتهالهم و طبعا كنت علي اخري و ادتهم الي فيه النصيب و برده العيب ما اتصلحش و اكتشفت انهم ما بيكشفوش عليها اصلا و كلهم شويه نصابين و بهايم و قدمت شكوي فيهم في المركز الرئيسي و ياريت حد يفهمني عيبهاا او يقولي اعمل ايه العربيه بقالها اسبوع بس ياجماعه
زفت زفت زفت