أنا تعمدت أقلل درجات التقييم لتقليل الخطأ الناتج من أن بعض الناس تميل لوضع تقييمات متفائلة و العكس
برجاء المشاركة ممن يتعامل بشخصه مع الوكيل لضمان نزاهة الإستطلاع (شكرا)
عرض للطباعة
أنا تعمدت أقلل درجات التقييم لتقليل الخطأ الناتج من أن بعض الناس تميل لوضع تقييمات متفائلة و العكس
برجاء المشاركة ممن يتعامل بشخصه مع الوكيل لضمان نزاهة الإستطلاع (شكرا)
أنا بتعامل مع توكيل رينو العبور
و تقيمى له إنه توكيل ممتاز و مريح جدا بالنسبة لى فى إهتمامه بالعميل و حل مشكلاته فى أسرع وقت
طب هو عنواه فين
و هل بيقبل بالسيارات الخليجي
أرجو من العضو mohameduoser
تحديد لنا ما سبب إختياره لتوكيل رينو بالسئ و ما هى سيارته الرينو حتى نستفيد و إللى أعرفه إن حضرتك حاجز سيفيك ؟
بالنسبة لقبوله السيارات الخليجى
التوكيل بيقبل أى سيارة و ممكن حضرتك تكلمه على 16202 علشان تعرف بالظبط العنوان
يا ريت كل إللى يقيم يقول ليه حط التقييم بتاعه
حتى نستفيد كلنا
شكرا يا إسلام على مجهودك و فكرتك
انا اتعملت مع فرع الاسكندريه - الصحراوى العامريه
اولا : المكان راقى جدااا وشيك وتحص انك فى مركز خدمه فى اوربا مثلا ..
ثانيا : المهندسين والفنين كفاءة عاليه وناس محترمة جدا .
العيب الوحيد اللى اناشوفته انهم غالين جدا .
على فاكره انا كنت بعمل صيانه النوبيرا هناك مش عند الوكيل لانها خرجت من الضمان .
بالنسبه لتقيم التوكيل نفسه
انا بروح لفرع المقطم وهو ممتاز فى سواء بالاهتمام بالتصليح او راحه واستقبال العملاء من اتاحه لهم المشاريب مجانا ووضع لهم اثنين كمبيوتر بdsl وخدمه توصيل العميل بسياره زى بتاعه ملاعب الجولف الى الشارع العمومى
وطبعا الاحترام المتبادل بينهم وبين العميل
بالنسبه لتقيم مراكز الصيانه (الميكانكيون العرب )
انا بصراحه لم اشاهد منهم اى موقف يستدعى انى اسيئ فى التصليح بس انا بحس انهم عايزين يغيروا اى حاجه فى العربيه حتى لو كانت شغاله وماشيه
ده غير اختلاف تغير الاجزاء المستهلكه عن التوكيل فى مواعيد الصيانه مثل زياده تغير فلتر البنزين فى صيانه العشرون الف والتوكيل مبغيروش
يمتازوا عن الوكيل انك بتخش مع العربيه وهيه بتصلح
فى النهايه انا برتاح لتوكيل المقطم اكثر
متشكر يا استاذ شركي
الاول فيه فرق بين الوكيل و مراكز الخدمة عشان مندخلش في ممشكلة
الوكيل هو Eim وده له فرعين واحد في العبور وواحد في المقطم
تعاملي مع مركز المقطم و كل الي هاقوله انهم ناس محترفة يعني واحد و واحد يساوي اتنين.. و عربيتي الجاية هاتبقى منهم
توكيل محترم جداً جداً ويستاهل ياخد اكتر من ممتاز ومش مبالغه انا اتعاملت مع فرعي التوكيل المقطم والعبور من حوالي شهور مش من زمان الحقيقه فرع المقطم لا يعيبه اي شيء غير بس اعمال البناء اللي شغاله هناك بقيلها حوالي سنه مخليا الدنيا زحمه جداً هناك لكن على المستوى الحرفي نقدر نقول ان الاتنين لا يقللوا عن بعض ابداً .............
انا من انصار دايما ان رينو في مصر محترمه كا سيارات ودي ممكن يختلف فيها اتنين وارد جداً اقصد على مستوى السياره نفسها كويسه او لأ تختلف الآراء بالطبع على فكره انا عشت في السعوديه فتره الرينو هناك اكتشفتها بالصدفه البحته وانتشارها هناك محدود جداً وده لعدة اسباب لكن في رأيي عشان توكيلها مش مهتم بيها ابداً لكن في مصر لئن وراها توكيل محترم محافظ على اسمه واسم الشركه اللي واخد منها الوكاله كويس جداً اعتقد ان ده اللي فارق رينو في مصر عن بره.
حتى الان كل من تعامل مع التوكيل بيشكر فيه و مازلنا فى إنتظار رد العضو mohameduoser حتى يفيدنا بنوع سيارته الرينو و ما هو سبب إختياره لتوكيل رينو بالسئ و خاصة إنه الوحيد حتى الان الذى ذكر ذلك
فعلا نحب نسمع الرأي الاخر ياريت العضو ده يحكيلنا تجربته و ايه السلبييات الي وجهها..وماتقلقش االناس هنا كلها بتساعد في حال وجود اي مشكلة مع التوكيل
بس انت احكيلنا واحنا معاك
عندي سؤال بالنسبة للتصليح ، يعني لا قدر الله لو فيها سمكرة و كده ، هل العربية بتدخل على طول ولا بالحجز ، و هل بيتعاملوا مع شركة تأمين ، يعني الشركة تحاسبهم على طول و انت تستلم عربيتك من غير ماتدفع او حتى تدفع فرق نسبة التحمل بس ولا ايه،
في حالات السمكره والكلام ده لا قدر الله مافيش حجز ولا حاجه حضرتك بتروح على طول سواء فرع العبور او المقطم...........كمان في حالات الحوادث لا قدر الله والمشاكل دي حضرتك ممكن تنقل السياره عليهم على طول حتى لو بالليل والأمن بيستلم من حضرتك العربيه ويبمضي وبيدي وصل باستلام السياره وطبعا المهندسين في اوقات العمل بتاعتهم من 9 لي 4 من أجل معاينات الاصلاح والكلام ده ....انا في حالتي عن تجربه سلمت عربيتي بعد حادث الساعه 12 بالليل لئن مكانش ينفع اسيبها في الشارع.
السؤال بخصوص التأمين زي ما تفضل الأخ شاركي على حسب تأمين حضرتك فين انا سألت مهندس استقبال السمكره والحاجات دي قاللي احنا عاملين عقد مفتوح بيننا رينو وبين كونتاكت بس اللي ممكن هي تحاسبنا مباشرة غير كده الشركات التانيه العميل بيدفع لينا ويسوي حساباته مع شركة التأمين .......ده على لسان المهندس هناك والله أعلم .
توكيل العبور مرتين للصيانة الدورية و لحد دلوقت ممتاز و الحمد لله
السلام عليكم
أنا بتعامل مع توكيل المقطم و حتى الأن ممتاز فى الصيانة و السمكرة :):):)
حتى الأن كل مالكى رينو صوتوا لتقييم رينو بممتاز
معادا الاخ mohameduser إللى صوت سئ رغم إنه معندوش رينو أصلا :eek:
و رافض حتى يحكى على أى أساس أختار هذا التقييم :confused:
و اضح أنه دخل غلط فى التصويت :D
حاجة غريبة
حاجة عجيبة
حاجة ساقعة
انا بينى و بين توكيل رينو عشرة عمر و الصراحة الناس هناك محترمين و متعاونين لأقصى درجة و سبب من اسباب شرائى للميجان هم
بصراحة أنا فوجئت بالتقييم الرائع لتوكيل رينو لان سمعته عندي انه غالي نااااار و بس
ممكن نعرف من العضو
mar3y
إختار سئ ليه على توكيل رينو رغم إن كل ملاك رينو فى المنتدى إختاروا إنه ممتاز
و هل هو من ملاك رينو ؟؟؟؟
يا واصل..بتجيبهم انتا على طول..
بلاش احراج بقى قلبك ابيض و البنزين ولع و الناس قرفانه
هو طبعا كل واحد حر في رأيه ..بس التصويت معمول لملاك العربية أو اللي تعاملوا مع الوكيل عشان يبقى مرجع لأي حد بعد كده .....يا ريت الأخوة اللي صوتوا بسيء يقولوا إيه السبب و يحكوا تجربتهم عشان الكل يستفيد أو تحذف المشاركة لانها ممكن تبقى مضللة للناس اللي ما تعرفش
انا اتعاملت مع التوكيل فى اسكندرية توكيل اكثر من ممتاز مكان شيك ومريح وناس محترفة ومحترمة من اول الامن الى الفنين الى المهندسين الى الادارة انا كان معايا بيكانتو وهم برده نفسهم وكيل لكيا وبصراحة كان نفسى عربيتى الجديدة تكون من عندهم لكن انا نقلت توكيل مودرن موتورز وهم برده توكيل محترم لان والدى اتعامل معاهم كتير
ممكن نعرف من العضو shiref_hamdy و هو مش من ملاك رينو مو معاه شيفروليه أوبترا لماذا علق على توكيل رينو بإنه سئ
يا جماعة التصويت لملاك رينو فقط
:no:
بصراحة مش عارف الناس دي زعلانة من توكيل رينو كده ليه
يعني كل الي بيعيب في الرينو ناس ماعندهاش رينو
وكل الي بيعيب في توكيل رينو ناس ماتعاملتش مع توكيل رينو
عاوزين طبيب نفسي يحلل لنا الموضوع ده
نوع من الحقد الطبقي
بس اقولك حاجة انا حموت و اصوت
وحاولت اقنع واحد صاحبي نغير الزيت لعربيته الميجان في التوكيل علسان اصوت مرضاش
اهيئ اهيئ
هو صاحبك بيعمل صيانة الميجان فين أصلا؟؟
لسه معملش لانه شاريها من كام شهر بس
انا معرفش جدول الصيانة للميجان
هو اول صيانة بتبقلا تغيير زيت فغيره هنا
يا جماعة انا اول مرة اشارك في المنتدى دة واسمحوا لي اشارك معاكم في تقييم اتوكيل دة
هو بصراحة انا حصل معايا موقف وحش وكرهت الناس دي (الميكانيكيون العرب)
انا معرفش دول وكيل ولا مركز خدمة بس هقول اللي حصل معايا
عربيتي موديل 2006 وعاملة 58000 يعني فاضل على الضمان بتاعها 2000 كيلو ويخلص
المهم رحت اعمل صيانة 60000 كم والمهندس اللي هناك طلبت منه يكشف على العربية ويقولي فيها اية مش مضبوط
خد عندك 1/ بطاحة المساعد عايزة تتغير ب 2500جنية
2/ علبة الدريكسيون ب 2500
3/ سير الايرباج اللي في الدريكسيون ب 1700 جنية
المهم انا قلت للمهندس ان العربية في الضمان والمفروض ان التوكيل يغيرها
راح مساومني
ايوة ساوم معايا على ان التوكيل يغير قطعتين مهنم سير الاير باج (علشان دي ارخص قطعة) وانا اغير التالتة يعني لو مش هغير القطعة التالتة هو مش هيركب القطعتين التانيين
المشكلة ان صيانة 60000 دي صرفت فيها والله ما انا فاكر بس الفاتورة معايا
انا محبتش الطريقة دي وقلت مش رايح تاني للميكانيكيون العرب علشان هما استغلوا الوضع بشكل سئ
وتاني انا معرفش هو وكيل ولا مركز صيانة انا بس بقول على الموقف
دلوقتي بقى انا عاندي استفسار صغير
انا هروح فرع العبور علشان الفانوس الامامي اتكسر والفيبر اللي موجود على الاكصدام
ممكن اعرف هما اسعارهم تقريبا كام لاني اتصلت سألت في الميكانيكيون العرب وقالولي فوق ال1200جنية
وشكرا ليكم واسف على الاطالة
هو حضرتك متأكد أنك روحت توكيل رينو أو مركز خدمة معتمد ؟؟؟؟
الميكانيكيون العرب بتعامل معاهم من 3 سنيين ونص والعربية عندى عاملة 80 ألف دلوقتى و عمر ما حصل معايا موقف زى ده هناك.........ده غير أن الأسعار اللى أنت قولتها دى مش مظبوطة خالص............البطاحة ب 1050 جم ولسه سأل عليها من أقل من شهر وعلبة الدركسيون حسب معلوماتى ب 1500 و ممكن شاركى يصححلى
أما بأه سير الأيرباج ده أنا أول مرة أسمع عنه أصلاً وغير كده أيه اللى يبوظه ؟؟
هو حضرتك العربية دى معاك من الزيرو ؟؟؟ هل عملت بيها حوادث لا قدر الله قبل كده ؟
وبعدين حضرتك لما تحب تسأل على قطع غيار أسأل فى الوكيل بس........مراكز الخدمة المعتمدة فى مصر لأى ماركة بتلتزم بسعر الوكيل لما يكون الوكيل هوه اللى مورد لهم القطعة لكن لو هما جابو قطعة من برة الوكيل ( مستورد تانى ) يبقى مينفعش يلتزموا بالسعر
لو حضرتك تحب أنا ممكن أجى معاك الميكانيكيون العرب و ممكن كمان ما دام العربية وكملتش لسه ال 60000 تروح على العبور وتقابل المهندس محي
أهلاً بيك عضو جديد فى المنتدى :red_indian: معانا ومبروك على أولى مساهماتك معانا