امبارح 9 ابريل 2011 روحت لاول مرة اشتري حاجات للعربية من بورسعيد منطقة بنك الاسكان

انا نازل و في دماغي اني اجيب جنوط سبور للعربية نفس المقاس بتاعها 13

لفيت كتير لحد ما لقيت جنط شكلة حلو اوي و نظيف بتاع سكودا مقاس 13 و عليه علامة سكودا .. بكام يا عم .. بـ 850 جنيه المهم لفيت شوية كمان مالقيتش اي جنط 13 خالص و في واحد من المحلات قالي يا عم دا الناس مبقيتش تشتري الـ 14 تيجي انت تقولي جنط 13 و هرجنا شوية و مشيت و سبته

مالقيتش حل غير اني اشتري بتاع الاسكودا روحت للراجل تاني و قولتلة جربهولي علي العربية و جربة و لقيناه كويس و بالفعل اشتريتة بـ 800 بالعافية و قولتلة علي التجربة هاروح اكشف عليه عند بتاع ترصيص لو مش تمام هارجعهولك

و قد كان روحت لبتاع الترصيص كشف عليه اول فرده طلعت فيها رفة و قالي ثمنه غالي اوي ... روحت رجعتة للراجل و اخدت فولسي و قولت هالف تاني مع اني من جوايا احساس بيقول خلاص كده مفيهاش جنوط النهارده

و انا بلف و بسأل لفت انتباهي الكونسول الي فيه الهاند ريست بتاع الكريستالة فا سألت عليه بكام قالولي بـ 250 و بتاع الميراج بـ 300 .. ايه يا عم الفرق .. طلع الفرق ان بتاع الميراج اعلي شوية فا بيريحك و انت ساند عليه و عليه طبقة قطيفة
طيب بكام السبويلر قالي 200

استغليت الراجل ده و روحت سألت عند محل تاني .. بكام السبويلر قالي 120 ... الله ايه الاسعار الحلوة دي ... بكام الكونسول بـ 200 ،، اخدت الاثنين علي 250 و الكونسول نظيف جدا و طلع المحل ده اصحابة ناس جدعان جدا و قعدنا نهرج كتير بعد الشراء و قبله .. المحل اسمة كناريا و الادهم

دي صورة الكونسول







هو عاوز يتنظف شوية لما افضي هاعمله

و دي صورة السبويلر






و بالصدفة ببص من بعيد علي محل و بقول لصاحبي اللي كان معايا هو احنا سألنا عند الراجل ده علي الجنوط قالي اه فا مشيت خطوتين و قولتة لا انا مش فاكر اننا سألنا عنده هاسأل تاني مش هانخسر حاجة

روحت سألت الراجل لقيتة عنده فعلا شكلين واحد تقريبا اندونيسي من غير ماركة و شكلة متخربش كتير و التاني ايه بقي ..... علية علامة لانسر و من غير خرابيش هو شوية صدأ علي خفيف ... بكام يا عم ... 700 ... بعد الفصال و عشان انا شبطتان فيه اخدتة بـ 650 و برده عالتجربة

عمال ادعي من جوايا انة يبقي سليم لما اروح اكشف عليه .. روحت كشفت عليه لقيتة زي الفل و الحمد لله .. رصصت و ظبط زوايا و غيرت بلوف و الراجل حطلي غطأء بلوف نيكل هدية و اخدت 85 جنيه

و ادي الصور











الاجمالي : 985

جنوط : 650 جنيه
كونسول : 150
سبويلر : 100
بتاع الكاويتش : 85


روحت و رجعت بتفويلة واحده عملت حوالي 520 كيلو لحد دلوقتي حالا بحوالي 30 لتر فقط