الموضوع: شوية تظبيطات فالعربيه

صباح الفل عليكو جميعا

امبارح قررت اني اسافر الغردقه بالعربيه الاسبوع الجاي، بس كان في عندي شوية مشاكل فالعربيه زي الـ ABS كان مش شغال والعفشه اللي ورا محتاجه تظبيط.

المهم طلعت علي حسام أوبل فطنطا وهناك قابلت مهندس محمد أبو زهرة واتشرفت بمعرفته جدا وقلتله علي الـ ABS قاللي مفيش مشكله بيتصلح عادي ويتظبط.

المهم قاللي انا هوريك الفرق قبل الـ ABS وبعد الـ ABS ... طلعنا عالطريق وجري جري وفجأه هوب راح رازع فرمله جامده جدا.. هي العربيه وقفت فساعتها بس الكوتشات صفررررت جااااامد والعربيه حدفت يمين جامد.

المهم رجعنا وهوا فك جهاز الـ ABS واخده صلحه وبياخد حوالي من ساعه ونص لساعتين وفخلال الوقت ده فكيت العفشه اللي ورا ابص عليها ولقتها محتاجه 4 جلب من الصغيرين وجلبتين كبار، اشتريت الجلب الصغيره انما الجلب الكبيره جبتها نضيفه استيراد بالمقص بتاعها والمساعدين بردو غيرتهم.

كان في كمان مشكله ان العربيه بتعلي عندي لما اجي اقف مثلا وانا ماشي ويفضل الـ RPM علي 1500 لفة تقريبا وينزل ببطء شديد. ابو زهرة الله يكرمه فكلي حساس الايدل وظبطهولي ونضفهولي.

طلعنا عالطريق تاني نجرب العربيه والـ ABS وبسم الله مشاء الله العربيه ضربت فرامل كلبشت فالارض كلبشه رهيبه ومحدفتش لا يمين ولا شمال ولا صفرت.

ودي أسعار كل حاجه للي يحب يستفيد منها

طقم مساعدين خلفي اسباني 650 جنيه

4 جلب صغيرين للمقصات 4*90=360 جنيه

جلبتين كبار 2*50 = 100 جنيه

تصليح الـ ABS وده اتكلف 400 جنيه

طقم فوانيس كريستال خلفي DEPO تايواني 2*85 = 170 جنيه

بنزين رايح جاي 15 جنيه

المشاركة الأصلية كتبت بواسطة hellboy

انا صلحت الabs بتاعي ومعايا نفس عربيه اسامه عند حسام اوبل من حوالي 3شهور والحمد لله فل . علي فكره يا تامر هواما بينظفه ويغير كاوتش الكباسات او بيعيد برمجته تاني او الاثنين معا . ولو جبت الاوربي حتحتاج تعدل في مواسيره وماستر الفرامل (شغلانه ) وسمعت ان البحقيري اللي في الحسنيه ( المنصوره ) بيصلحه برده ولو اني سمعت انه غالي واستغلالي ( اللي نعرفه احسن ) وكمان م/ محمد ابو زهره حيظبط المواضيع .

فعلا نفس المبدأ بتاعي

اللي تعرفه وتضمنه احسن من اللي متعرفوش حتي ولو كان غالي شويتين