رجرجة من ناحية العجلة اليمين قدام
مساء الفل على جميع اعضاء المنتدى الكرام تجربتي هي اني بقالي اسبوعان بسمع صوت رجرجة من ناحية العجلة اليمين قدام مع المشي في طرق خشنة وبدأ الصوت يزداد لغاية مبقيت حاسس ان العجلة اليمين هتقع في الارض فرحت للميكانيكي وكشف على العفشة كويس لقاها الحمد لله زي الفل وبعدين لقى العيب وهو خزنة الفرامل سايبة قولتله ايه يا عم خزنة الفرامل ديه مالعربية بتفرمل زى الفل قاللي لأ ملهاش دعوة بالفرامل دي عبارة عن المسمارين اللي رابطين ماستر العجل بيبقوا رابطين في جلبتين طوال جوة كوتشة سوستة والمفروض ان الجلبتين دول واحدة من فوق الماستر والتانية من تحت بيبقوا سداسي الشكل مش مدور عشان المسامير تربط فيهم من غير ميلفوا ففكهم ولقاهم سايبين خالص فكان الماستر عمال يلعب مع المطبات والارض الخشنة فدق عليهم عشان يبطحهم وميلفوش وركبهم وفعلا الصوت راح خالص والموضوع خد ربع ساعة للعجلتين اللي قدام والعربية رجعت زي الفل فقولت اديكم فكرة عن الموضوع ده يمكن يقابل حد فيكم ولا حاجة وعلى فكرة عربيتي موديل 2007 وعاملة 105000 والسلام ختام.