الموضوع: بتشتم وانت سايق

بشتم بس في سري بس مش علي الملاء

للأسف انا مش بعرف اشتم حتى لما اتنرفز اوي اوي يإما ببرطم مع نفسي شوية واقعد اقول في سري حسبي الله ونعم الوكيل يإما لو لساني فلت اقول يابن ال...... وقبل ماكملها اوقف لساني ومكملهاش (وطبعا بصوت غير مسموع خارج العربية اللي جوة العربية بس يسمعه) بس بتنرفز جدا وانا سايقة ومفيش مشوار بروحه بالعربية الا لما الاقي حد يتغابي عليا :skeptical:وسواقين الميكروباص اللعنة دول يبقي داخل في عربيتي بقلب جامد لحد مايكون خلاص هايخبطها اروح مدياله كلكس جامد واقوله رايح فين انت فهمني رايح فين هي الحتة دي تعديك يعني يرد عليا ببرود خلاص عدي عدي يامدام (معندهمش اختراع آنسة ده بس مش مهم مبركزش انا ماعلينا) او يقولي عدي ياابله ويفتح بوقه اوي في حرف ال(أ) ويضخم حرف ال(ب) (كلمة ابلة دي بتخنقني جدا) بينطقوها بمنتهي البلاهة كده طبعا عارفين ومتخيلين بينطقوها ازاي
وحصل معايا موقف مرة كنت ماشية في طريق علي طول وفي تقاطع كده في ناس بتيجي من اليمين وتعدي وتكمل في الطريق الموازي لينا الناحية التانية وفي حد عدي من قدامي بس لسة جزء من عربيته معداش وانا واقفة مستنية لحد مايلف ويعدي بكل عربيته الاقي الشئ اللي سايق الميكروباص جاي وعربيتي وقفت قدامه بالضبط (المفروض اعديه هو كمان يعني ) وراح ده داس بنزين وداخل عليا خلاص هايلبس في عربيتي لا محالة قال يعني عشان البيه مستعجل وعايز يعدي وانا معطلاه فزعقتله قولتله رايح فين يعني قالي ماتعدي قلتله يعني هو الطريق فتح يعني وانا مُصرة اقف مش في ناس قدامي يابني ادم انت وعديت

امبارح بقي سواق ميني باص من الكبير اوي اللي مالوش ملامح ده هو جاي من الناحية المقابلة وعايز يلف وييجي ورانا وانا من حظي الجميل جيت في قرعته بعربيتي والطريق مقفول قدامي فمستنية يتفتح عشان اعدي بقي وباب عربيتي قدام بوز عربيته مش يقف بقي لحد مالعربية تعدي لأ برده دايس بنزين لحد ماخلاص لزق في الباب يعني لو ريحت ايدي علي الباب بتاعي ممكن المسه الميني باص بتاعه ده بقي وقفت وبصتله وقلتله تعالي تعالي البس في عربيتي البس والاقيه عيل صغير مكملش 12 سنة وحسبنا الله ونعم الوكيل.
ده غير السواقين بتوع الميكروباص برده اللي يفضلوا يزنقوا عليا وانا بحاول امسك نفسي واقول عديهم يابنتي وخليكي مؤدبة وعاقلة :Angel_anim: واعديه فعلا يقعد يتمختر قدامي او ينزل زباين في نص الشارع ده بقي بظبطه كلاكسات لحد ماقرفه وبمنتهي البجاحة يقولي ماتعدي
الغبي ماهي الناحية التانية اصلا في عربيات جاية يعني لو عديته هالبس في اللي قدامي بجد بشعين بكل مقاييس البشاعة.

مواقف تانية مع المارة اللي في الشوارع بقي:
1- ماشية في شارع حارتين حارة رايح وحارة جاي وانا ماسكة يمين الطريق وماشية في الحارة بتاعتي وواحد ماشي علي رجلية قدامي في نص عربيتي اديته كلكس صغنتت كده معبرنيش:angelsad2: كلكس تاني صغنتت برده معبرنيش :angelsad2: قمت اتفرست بقي قلت مبدهاش عملت ايه زودت صوت الكلكس راح وقف وادورلي وبصلي يقولي ماتعدي مالشارع واسع اهوه (بيشاور من جنبه يعني اني اعديه واكمل طريقي) وقفت بمنتهي الهدوء قلتله حضرتك الشارع ده اتجاهين يعني انا لو عديت ومشيت الناحية التانية زي ماحضرتك بتقول كده هالبس في اللي قدامي فهمت ليه ؟وانا علي وشي ابتسامة صفرا كده فقالي طيب حقك عليا ومشي وانا مشيت وانا هاعيط من الفرسة
2- واحد ماشي هو ومراته وبيعدوا من قدامي وانا كنت لسة بسوق جديد ومابصدق العربية تتحرك اصلا واجيب التاني عشان رجلي مكانتش واخدة علي الدبرياج لسة فكانت احيانا بتفصل والاقي مراته عدت وقفت علي جنب وهو كان شايل شنطة سفر وقام جاي قدام عربيتي وراح واقف وفتح الشنطة انا فضلت واقفة متابعة في صمت قلت يمكن هايعمل حاجة مهمة لما نشوف ايه هي الحاجة اللي في غاية الاهمية اللي هايطلعها من الشنطة حالا ووقف في نص الشارع عشانها؟ اويمكن هايستوعب دلوقتي انه واقف في طريق العربيات مش قدام عتبة بيتهم يعني
والاقيه بمنتهي البرود فتح شنطة السفر وطلع منها ايه .......... تخيلوا انتوا طلع ايه......... منديل ورق شوفتوا القهرة اللي انا فيها فانا ليه وليه اني اتزمجرت وبدي كلكس طبعا ماليش حق تقوم الهانم مراته تقولي ماتصبري شوية ميجراش حاجة يعني رديت قلتلها ياستي هو يعرف يتحكم في رجليه لكن انا الفرامل ممكن تخوني انا خايفة اخبطه هو راحت وبنفس لهجة البرود قالتلي معلش معلش ميجراش حاجة
بجد بجد اتنقطت في اللحظة دي خصوصا انه معدانيش الا لما الباشا طلع المنديل المتين من الشنطة وقفلها طبعا امال يمشي بيها مفتوحة يعني (عارفين الشنطة اللي ليها سوسته بالطول دي) وروحت مشيت وانا دمي بيغلي بس هاعمل ايه بس مانا لو خبطه الناس هاتقولي حرام عليكي انتي قاسية انتي وحشة عشان راكبة عربية يعني تدوسوا علي البني ادمين اللي ماشيين علي رجليهم؟
امبارح بقي كنت في روكسي فعايزة اركن العربية (صف تاني لمدة اقل من 5 دقايق مثلا) وهاسيب اختي في العربية ولاقيت مكان بس في ناس واقفة عشان توقف تاكسي او اتوبيس وواحد منهم شايفني داخلة بالعربية وده واقف متنح برده وانا بتحرك سنة سنة عشان يفهم اني هاركن مفيش فايدة برده مُصر يفضل واقف وموقف جنبيه شنطة كبيرة برده (مش عارفة ايه حكايتي مع الشنط الكبيرة دي :biggrinjester:) شاورتله وفهمته اني هاركن وانه يوسع شوية وبعدين جه علي نفسه ووسع سنة بسيطة متعدينيش برده روحت من كتر فرستي بصيتله وابتسامة صفرا علي وشي وبجز علي سناني علي خفيف وبقوله حضرتك شكلك مُصر اني اخبطك مش كده شكلك كده عايز تتخبط قالي اه وضحك ووسعلي اوفففففففففف :ack2:
انا زهقت والله من الغلب ده مش عارفة امشي بالعربية في بيتنا ولا اعمل ايه بس
الشارع كل يوم ليه مواقف معايا فيها اللي بينقطني وبيخليني ببقي هاعيط وفيها اللي من كتر استفزازه يخليني اضحك من الغل.
يارب يارب حسن حال شوارعنا عن قريب يااااااااااارب
ادعوا معايا وقولوا امين

Oui
للأسف... بس و أنا قافل الإزاز و مع نفسى... و أغلبها تعليقات مش شتايم بالمعنى ... ودة برة مصر
أما فى مصر ... فأنا اللى بأتشتم و أتخبط و يتكسر عليا عن قصد .... لأنى مثلا وقفت فى الإشارة الحمراء كما أنا متعود ... لكن اللى ورايا شايف إن دة غباء مطلق منى أستحق عليه وصلة ألفاظ نابية خاصة إنى الوحيد اللى وقف... ولما أدى إشارة يمين أو شمال و يتم الكسر عليك بكل وقاحة وإنت و حظك فى فانوس أو رفرف... أو لما المدام اللى سايقة قدامك على سرعة 1 كم/س فى نص الشارع تتكرم و تتعطف و تعديك ولو نبهتها بكلاكس تسمع أحلى كلام، دة غير عدم إستعمال المرايات من 99% من الشعب و بالتالى كل مشوار بالعربية هو حرب شوارع الشتايم فيها تعتبر أقل الخسائر ...

لما واحد قدامه الشارع واسع 5 أو 6 حارات و قافلة معاه أوسع له عشان يعديو يلزق في شنطة العربية عندي. ده أنا بيبقى الشيطان بيقول لي دوس فرامل و دخّله في شنطة العربية بس أنا بشيل رجلي من على البنزين و ألمس الفرامل
و حاجة تانية لما تبقى ماشي أقصى الشمال و عربية قدامك في الحارة اليمين و يجي توتو يزنق عايز يعدي تعدية خطر أو يعدي بحيث أفرمل جامد يا ألبس في الجزيرة يا أخبط له الرفرف الشمال ورا عنده
طبعا أنا بجيبه بعدها و مش بسيبه الا لما يا ألبسه في الرصيف أو أجي قدامه و ينسى بروح أمه انه يعدي و أحبس له دمه
حاجه ترفع الضغط

فى مواقف بقى تغيظ بجد يعنى مثلا تكون ماشى فى شارع حارتين حاره رايح
وحاره جاى
والحارة اللى انتا ماشى فيها تكون واقفه خالص واللى جانبك فاضيه
تلاقى واحد جاى من وراك ومشغل العالى وطاير ( قال يعنى هوا الفت واللى واقفين بهايم ) وبدل ما الطريق يسلك فى دقيقتين يقعد نص ساعه عقبال ما يفتح عشان الاستاذ سد طريق اللى جاى
وطبعا تلاقى طابور عربيات وراه (بيقلدوة )
وفى الحاله ديه لو طريقك مشى شويه تلاقيه عايز يكسر عليك ويخش قدامك فى حارتك ويقعد يحشر نفسه لحد ما يجى حد غلبان كده ويصبر عليه
بس عن نفسى مش بديله فرصه
فى الحاله ديه بدل لما اشتمه بكتفى انى مش بدخله قدامى

بردو كنت مره ماشى فى شارع عادى خالص ولقيت عربيه واقفه فى وسط الطريق
لقيته بينزل واحده ست وشايله عيل على ايديها ( صبرت عليه واديته كلكس بسيط عشان انبهه ) نزلت الست من الباب اللى ورا وراحت طالعا تسلم على كل اللى فى العربيه وبوس وسلامات وقعدت ترغى
بردو قلت مش مهم
قعدت بتاع دقيقتين قولت خلاص اهو ماشى وبعديها بخطوتين رح واقف تانى (بياخد كنز من البقال وبيحاسبه ) اتنرفت بصراحه واديته كلاكسات ونور
مشى بردو بتا ع 100 متر ولقيت واحد جيه يكلمه من الازاز
بصراحه نرفزنى اكتفين انى دخلت فيه من ورا ( وكنت قاصد ) وقلت فى مخى زى ما تيجى تيجى

تخيلوا ولا فتح بقه بكلمه لانو عارف انو غلطان ومشيت بعد ما سيبتله فوانيسه على الارض وانا الحمد لله مافيش اى حاجه فى العربيه