الموضوع: نفس الهورس باور , نفس العزم , نفس الوزن .. لكن دي اسرع من دي ..ازاي ؟

سلام عليكم
كنت بافكر في اداء العربيات المختلفة , و لاحظت حاجة يا ريت حد يصححها لي

انا ملاحظ ان ممكن جدا نلاقي عربيتين زي بعض في أرقام العزم و القدرة , و حتى بيوصلوا لهم عند كام RPM , و حتى في الوزن , و مع ذلك نلاقي واحدة فيهم سحبها احسن من التانية

مثال
الكيا سيراتو : قدرة 124 حصان /6300 RPM , العزم 156 نيوتن/4200 RPM , و وزنها 1236 كيلوجرام

الميجان II : قدرة 115 حصان / 6000 RPM , و عزم 152 نيوتن . متر/4200 RPM , و مش عارف وزنها بالظبط

الكروز : قدرة 107 حصان / 5800 Rpm , و عزم 150 نيوتن . متر/ 6000 Rpm , وزنها 1325 كيلوجرام

الجين2 : 110 حصان / 6500 RPM , و عزم 148 نيوتن متر/4000 RPM , وزن السيارة1230: 1245 كيلو جرام

لو رتبنا العربيات دي من ناحية التسارع , هانلاقيهم
1- السيراتو
2- الجين2
3,4- الكروز و الميجان ما اعرفش اي تسارع فيهم اعلى

لو بصينا على الأرقام , هانلاقي مثلا عربية زي الكروز تسارعها اقل بسبب ان اقصى عزم ليها بيحصل عند 6 RPM , و ده رقم بشع , منطقي , مثال زي ده عكسه بالظبط الفيرنا , ارقام عالية يقابلها وزن قليل مثلا , برده منطقي

لكن لو قارننا ارقام السيراتو و الجين2 مثلا , نلاقي مفروض انهم زي بعض , على اساس ان العزم و القدرة السيراتو بتوصل لهم على RPM اعلى , لكن الحاصل ان تسارع السيراتو اقوى

لو جينا للميجان2 مثلا , هانلاقي الوضع اعجب , مقارنة ارقامها بأرقام السيراتو او الجين2 تقول ان تسارعها اقل حاجة بسيطة جدا , لكن الواقع ان ملاك السيراتو مبسوطين جدا من أداء موتور السيراتو , و ملاك الميجان معتبرين الاداء غير رياضي بالمرة ... هنا انا فرملت و مش فاهم !!!

اللي فات ده مجرد مثال , فيه امثلة تانية كتير لعربيات ارقامها كويسة لكن تسارعها على ارض الواقع مش تمام بالمرة
اللانوس مثلا

شو رأيكم ؟