الموضوع: بفكر اخد عيالي وسافر

إيه يا جماعة فيه إيه مالكم شوية ريح صغيرة هتبوظلكم تفكيركم كده يعنى لو كان اللى ماتوا فى الثورة أكتر شوية زى ما بيحصل فى ليبيا أو سوريا أكيد كل حاجة و لها تمن الحرية لها تمن و الديموقراطية لها تمن و الكبت و القمع اللى كنا عايشين فيه كسره له تمن مش قادرين نستحمل شوية و نحاول على الأقل نصلح من نفسنا و بالتدريج إن شاء الله الدنيا كلها تمشى ده الأجانب اللى بيبقوا قمة الالتزام فى بلادهم سلوكيا و مروريا بييجوا هنا فى ظرف 3 أو 4 شهور و يبقوا أسوأ من أسوأ مصرى اتعاملت معاه ليه لأن الأغلبية سيئة أو كويسة هى اللى بتفرض ثقافتها و المفروض إحنا طالعين من 30 سنة فساد و ظلم و عك و إهمال أكيد الدنيا مش هتتظبط بين يوم و ليلة و أكيد فيه قلة متطرفة و قلة كانت مكبوتة و لسه ما صدقتش نفسها إنها بقت حرة بجد فمش عارفة و مش متعودة تستخدم حريتها كويس و قلة لسه مش عارفة مصلحتها و قلة متعصبة دينيا و قلة الفلوس بتحركها و قلة كانت راضية بالوضع و كل مشكلة صغيرة بتقابلها دلوقتى بتشوفها كارثة مقارنة بالماضى و كل الأقليات دى لو اجتمعوا مع بعض هيكونوا نسبة كبيرة منهم اللى بقصد و اللى بدون قصد بيشوهوا الثورة و البلد و رغم اختلافهم فى المفاهيم و الأسلوب إلا إنهم فى الآخر بيتفقوا فى النتيجة حتى اللى كانوا مؤيدين الثورة منهم مش عارف إن نتيجة أفعاله دى بتأثر عليها فلازم الناس المتزنة فى تفكيرها و لا تنتمى لأى فئة من الفئات المذكورة حتى لو طلعوا هما اللى قلة مقارنة باتحاد الفئات السابقة هما اللى يقودوا التغيير يعنى ييجوا على نفسهم و يستحملوا كبت واحد بينفجر شوية بعد ضغط 30 سنة ممكن يكون عمره كله و يستحملوا سخط أقلية حسة بنوع من الظلم أو الاضطهاد و مرعوبة من التيار القادم بعد ما نجح النظام القديم إنه يعمل فرقة بينهم و بين بعض و هى النواة الوحيدة اللى قادر يسند عليها دلوقتى لازم ما نشخصنش كل حادث و كل موقف و نتعصب لا لفريق و لا ديانة و لا لعرق و لا لمحافظة ما لم نكن كلنا مصر فعلا مصر هتبقى أسوأ من الأول بجد و كمان اللى عايز يسافر و يسيبها هى دى المسئولية اللى ماحدش قادر يشيلها خلاص و الله ده أنا أول مرة أشترى تى شيرت مرسوم عليه علم مصر و أبقى فرحان بيه و حاسس إنه قمة فى الشياكة كأنى لابس علم أمريكا أو إنجلترا أو فرنسا عشان خاطرى و عشان خاطر كل نقطة دم طاهرة راحت فى الثورة و كل بنىءادم اتصاب و أصبح عاجز و كل شخص فقد حد عزيز عليه يعنى كلها مصايب أكبر كتير من التفاهات اللى بتحصلنا دلوقتى عشان خاطرى ما تموتوش الإحساس ده فيكم عشان تقدروا تصحوه فى اللى حواليكم

المشكلة مش مشكلة ثورة .....
المشكلة تتلخص في بعض الكلمات .. ولكن لكل كلمة منهم ملف طويل:
(الضمير) ______ أصبح الضمير شبة منعدم وإلا كل واحد كان شاف شغلة بجد .... لية الشرطة متقاعسة لحد دلوقتي ... لية الجيش مش بيتدخل بحزم فى أمور مثل هذة ... في حد معندوش ضمير بيحرك الأمور دي كلها

(الجهل) _______ غالبية من شعبنا مازال يهوي إطلاق وتصديق الإشاعات ... وطبعا (جهل) + (إشاعات) = فتنة كبري

أنا بنفسي كنت في ميدان رمسيس يوم الجمعة إللي (ناس مجهولين) كانوا عاملين فيه مظاهرة (كاميليا) ....... وبما انني ماشي بالمثل بتاع ( لا أصدق إلا ما أري) فقلت أسأل إللي شالين اليفط بتاعة (عايز أختي كاميليا) ........ 99% من الناس إللي شايلة اليفط بتقولي (معرفش ... واحد إداني اليافطة دي ووقفت أهلل معاهم ... عايز يافطة؟ بيوزعوها علي العربية إللي هناك دي!!!!!!!!!) ...... يعني هيصة وخلاص ........

ياجماعة ........ لازم كل واحد يقتنع إن البلد دي بيمشها (قانون) ويلتزم به .... أما موضوع التجمهر والتظاهر والإعتصام وقطع الطرق دي هودينا في ستين داهية ....
وللناس إللي مش عاجبها القانون أو معتقدين إن القانون لا يطبق علي الكل ... أقول
قانون أعرج أرحم مائة مرة من شريعة الغاب

ربنا يستر

اللهم لا تؤاخذنا بما فعل السفهاء منا

يا حي يا قيوم برحمتك نستغيث
يا حي يا قيوم برحمتك نستغيث
يا حي يا قيوم برحمتك نستغيث

المشاركة الأصلية كتبت بواسطة nfs

على كده لو قامت حرب كلنا نسيب البلد, علشان بنخاف على نفسنا.

من حق أى حد يخاف على نفسه و أسرته و ممتلكاته ....ده حقه و من حقه يعمل اللى شايفه صح علشان يبقى امن عليهم

المشاركة الأصلية كتبت بواسطة amro1965

اللى موافق يسيب البلد ويهاجر بيحسسنى انه كان عايش فى بلد الامن والامان فى ظل عصابه على بابا والاربعين حرامى
واللى مش فاهم بيقولك ادى نتائج الثورة
ونسى وتناسى ان يوجد ترس مهم فى مجموعه تروس غير مفعل بفعل فاعل خفى الا وهو جهاز الشرطة بجميع انظمته
افضل مثال لمجموعه تروس الساعه لو ترس عطل الساعه كلها بتقف
جهاز الشرطة مش عايز يشتغل بيقولك يرجع مثل الاول يبالاش مش راجع عايز يرجع بفكره السلطوى بفكر القوه من البطش والجبروت واللا مسائلة
ومعندزش استعداد للتغير
اللى عايز يسافر ويهاجر برحته بس مفيش انسان على وجه الارض بيرتاح بره بيته وينام مطمأن الا على سريرة فى مأمنه
انتى هنا بتقول رايك لكن برة انسى

على فكرة فعليا لحد دلوقتى .....كان فى أمان عن دلوقتى و محدش يقدر ينكر كده و مش معنى كلامى إن الحرامية اللى كانو ماسكينها هما السبب و لكن لأن غالبية الشعب (الفئة الفقيرة فى مستوى التعليم) مينفعش معاه غير سياسة العادلى و مش بيتردع غير منها

المشاركة الأصلية كتبت بواسطة gebreel

لو كلنا خفنا على نفسنا و اولادنا و سيبنا البلد مين اللي هيبنيها و يقومها؟!!

ازاي اعلم اولادي انهم يحبوا البلد دي و يفدوها بروحهم و يشتغلوا علشان يخلوها احسن بلد في الدنيا و اتسال سؤال هو حضرتك سافرت وسيبتها ليه اما كدة و عملتلها ايه علشان تقومها و تبنيها؟

و حضرتك شايف إن الشعب اللى نصه فى الشارع بيعتصم و موقف الشغل و بيقطع طريق و بيولع فى بلده و النص التانى بيتفرج على البلد قدام التلفزيون إن البلد كده بتتبنى !!!!

لعلم حضرتك الإعلام مصور لناس إت إحنا سواء إخترنا أى طريق من اللى قدام مصر دلوقتى البلد هتبقى ماليزيا و كلام الأحلام ده و ده استحالة يحصل و الشعب بينتحر بالطريقة ديه

أنا ليا إن إحنا بقالنا 3 شهور من تنحى حسنى و الشعب
بيعتصم و عاوز فلوس .....تفتكر هوا كده بيبنيها ؟؟
محدش بيشتغل زى الأول مع إننا مطالبين بالأحسن.....تفتكر هوا كده بيبنيها ؟؟
أخلاقيات الشعب للأسف بتتجه للأسوأ مع إن المفروض إن كلنا نراعى ربنا فى بعض....تفتكر هوا كده بيبنيها ؟؟

خلينا واقعيين و بلاش موضوع إن أى حد بيتكلم على السلبيات الكبيرة اللى موجودة دلوقتى يبقى هوا كان من أنصار حسنى و رجالته لأن لو فضلنل نقول إحنا كويسين و ماليزيا جيه و 3/4 الشعب بينتحر يبقى معملناش أى حاجة

عاوزين نبنى البلد ديه لازم نبقى واقعيين مش ثوريين اإقتصاد هيقف لما الشعب يعرف إن 1+1=2 يعنى نشتغل هنعدى غير كده هنغرق ده اللى إتعلمناه

و شكرا

طبعا انهيار النظام السابق سبب عدم الاستقرار الامني و الاقتصادي ,,, و ده طبعا مؤثر مباشر علي البيت المصري
سيبك ان البلد كانت بتنهار بس بالراحة يعني اقتصاد و تنمية غير حقيقية .... يعني زراعة مفيش مشاريع خدمات و صناعات استهلاكية و صناعات ملوثة للبيئة و مستهلكة للكهرباء
الهيئة العامة للبترول مديونة ب 11 مليار جنيه .... محدش يعرف حاجة طبعا
... اي حد يبص لسوق العقارات و الاراضي هيعرف انهم باعوا كل حاجة و مكانش فاضل حاجة غير الارض فكانوا بيبعوها هي كمان

طبيعي ان هزة مفاجئة زي دي هتلخبط الدنيا ..... و من حق اي حد انه يدور علي فرصة للاستقرار برة مصر
بلاش نهاجم حد عشان بيدور علي مصلحة اسرته مش معني ان احنا شايفين ان فيه امل اننا نحجر علي راي واحد شايف ان مفيش امل

انا عن نفسي شايف ان قدامنا عشر سنين عشان نشوف بداية حاجة عدلة
و حتي لو زادوا فوق العشرة عشرين قاعد فيها