لو عندك او ناوي تشتري سوزوكي سويفت يبقي لازم تقري النصائح دي

**muhmado_furp** · 30-01-2010 01:02 AM

المشاركة الأصلية كتبت بواسطة hazem_hiza

والله الواحد احتار مع السويفت .. اشتريت واحدة 94 ياعنى يابانى ب 27000 من 3 شهور .. ماكدبش عليكو لقلة خبرتى بالسيارات و لأنها أول ركوبة اتغشيت فيها من ناحية البارومة لأنها كانت كتير شوية و كنت محتار أبيع ولا لأ .. و أخيرا قررت أركبها فسمكرتها كلها و رشيت بره نضافة.. لكن مشكلة الاستعمال أنها عاملة زى البطيخة .. و لأن لكل شيء عمر افتراضى مهما كانت حالة السيارة قدامك فهى بقالها 16 سنة على الطريق و الله أعلم الى قبلك كان عامل فيها ايه.. ما هو أصل العربية بتقعد تستحمل لحد معين ثم تبدئ تطلب تغيير قطع غيار.. المهم بعد السمكره ظهرت مشكلة فى الفرامل رغم أنى غيرت التيل أول ما جبتها لكن يبدو أن العيب سيرفو أو ماستر زيت ياعنى العيوب ممكن تكون حاجات مستخبية و بعيد عن دماغك خالص ..عمر افتراضى !! شويه و لقيت بالصدفة أن فى زيت فى العمة يعنى ماتور خفيف شوية .. ياعنى عكننه ورا عكننة و فلوس يعنى العربية واقفة دلوقتى فى حدود 30000 وكل مرة أقول خلاص حبيع هبيع ألاقى العربية ماشية كويس أقول نخليها ألاقى المشكلة الجديدة أقول أبيع ألاقى واحد يقولى أوعى تبيع أنت كده تقريبا عملت المهم فيها خصوصا أنى كنت بقف على ايد الصنايعى علشان ما يقلبش أرجع أقول لسه حشوف استعمال تانى وأجرى ورا سمكرية تانى أصل دى استعمال ..طب أمشى بيها لغاية ماموتور يجيب أخره و أجيب واحد استيراد ب 1200جنيه أو أبقى أعمل طقم شنبر بعدين.. على الأقل أبقى عارف كل حاجة فيها و مطمن .. وساعات أقول بيغ يا عم وهات ماروتى 2007أو 2008 وانسى العذاب.. حيرة كبيرة .. يمكن يكون حظ وحش .. رغم كل ده ماتقدرش تقول ده عيب عربية ده عيب الاستعمال .. بطيخة و مشكلتى أن بطيخطى طلعت قرعة و مافيهاش بذر يا ريت أسمع أرأكو فى قصتى دى .. ايه أخطاءى و المفروض أعمل ايه دلوقتى ولو كنتو مكانى تبيعو بعد كل التعب ده لأن المفروض ماحدش يبقى على عربية و العربية اللى تصرف تروح مهما خسرت فى بيعها على رأى واحد صاحبى .. و لا أظبط فيها كمان و شوية شوية حتبطل تطلب و المشاكل تقريبا حتنتهى لأن كله على ايدك و حيحصل ايه تانى أكثر من كده خصوصا أن السويفت قطع غيارها مش غاليه قوى زى حاجات تانية و خصوصا الحاجات الكبيرة فيها و ده رأى واحد صاحبى تانى .... !!؟

بصراحه ياأستاذ حازم
انا متابع موضوعك وده للاسف شبه مواضيع ناس كتير قوي
اولا اخطائك انك مكنتش علي الوعي المطلوب قبل ماتشتري العربيه دي
وكان لازم تكون عندك ثقافة اكتر من كده وتتفرج كتير علشان عنيك تاخد علي الحلو والوحش
ثانيا هيا مشكلة ضمير بكل الاحوال لان الي بيبيع لازم يقول العيوب قبل المميزات
فبصراحه
انا شايف انك متفقدش الثقه في العربيات
اكيد ربنا شايل الاحسن
وبصراحه انت اكتر واحد تقول تخليها ولا تبيع
بس انا لو مكانك هخليها اديها بتعلمني وتعذبني وفي الاخر هتبيعها بس بعد ماتكون حفظت وعرفت كل
حاجه عن الصيانه والصنايعيه وكل القصص دي
وربنا يعوض عليك في تعبك وفلوسك
وانا برضك خسرت كتير زيك بنفس الاسباب فمتزعلش نفسك

**muhmado_furp** · 30-01-2010 01:04 AM

المشاركة الأصلية كتبت بواسطة romeo_6887

شكرا ليك و للاستاذ حازم خضر

شكرا لحضرتك ولزوقك
وطبعا استاذ حازم خضر الغائب الحاضر
كان ليه مشاركات مميزه جدا عن السويفت
وهو كان من اسباب اني كنت اشتريته

**hazem_hiza** · 30-01-2010 10:02 PM

شكرا جدا على اهتمامك بموضوعى muhmado باشا و أنا فى الحقيقة رغم التعب و الفلوس ميال لرأيك لأن فى المدة الصغيرة اللى اشتريت فيها العربية دى عرفت حاجات كتير أو عن العربيات و أكيد العلام مش ببلاش فيارب تكون دى أخر الأحزان و المشاكل تبدأ تقل و تبقى عادية

**mmffor** · 30-01-2010 10:06 PM

هو ده عيب اي عربة مستعملة

**exact** · 01-02-2010 01:07 AM

أنا معاك في اللي بتقوله عدا حاجة واحدة
ايه حكاية السخونة مع خرط الطنابير...هي دي هتيجي ايه جنب السخونة اللي مع الفرملة
الطنبورة بتتخرط ببوز رفيع جدا وبتبرد بسرعة لأن بعد ما بتتشال من المخرطة الراجل بيمسكها بايده على طول بالمقارنة بالتيل اللي بيبقي مغطي نص الطنبورة والجدع اللي يمسكه