الموضوع: ملحوظة قد ترقى لدرجة المشكلة فى كاوتش بريدجستون My-01

من حوالى اسبوعين ركبت 4 فرد بريدجستون My-01 اندونيسى مقاس 14*60*185، المهم الكاوتش ده بجد محترم جدا، هادئ و بيفرق قوى فى ثبات العربية التحكم، بس فى ملحوظة لازم انبه ليها.

النقشة الرياضية بتاعة الكاوتش بتلقط الحصى الكبير نوعا ما و ده بيسبب صوت تكتكة بسيطة خصوصا لو ماشى جنب سور او رصيف عالى الصوت بيوضح، انا عارف ان كل الكاوتش بيلقط حصى، بس كل ما الحصوة كبرت، كل ما صوتها وضح و كمان ما بيقعش بسهولة، يعنى عادى قوى ان الحصوة تفضل تتكتك من المقطم للمطار، انا عارف ان ناس كتير مش هتفرق معاهم الحكاية دى مقابل كفائة الكاوتش اللى اشهدلها، بس بعض الناس - وانا منهم - بيجيلهم هسهس من اى صوت فى العربية و يمكن كمان اى صوت فى عربية تانية لغاية ما يتأكد انه مش من عربيته، عن نفسى ممكن اربط الكراسى كل ما اربط العفشة علشان الهسهس. :d