الموضوع: يعني ايه رشه جوه ؟؟

المشاركة الأصلية كتبت بواسطة darkmagician

يا اختي الكريمة ما تحاولي تجيبي حاجة جديدة لو حتستني شوية اضغطي على نفسك معلش

وممكن تدفعي مقدم اللي معاكي وتقسطي الباقي على بنك محترم زي البنك الوطني للتمنية وتخلي حد قريبك يثق فيكي يعملك وديعة تضمني بيها بقية القسط وعائد الوديعة حيغطي فايدة الاقساط وفي نفس الوقت انتي تسددي ما تيسر من القسط بالتوازي

البنك الوطني للتنمية على فكرة هو تبع مصرف ابو ظبي الاسلامي يعني مية في المية حلال

والله حضرتك انا زوجي قالي كده النهارده لان المستعمل للاسف ميخلاش من العيوب المشكله اني متبهدله في التكسيات رايح جاي لما اعصابي تعبت بقيت بحمل هم المشوار قبلها بيوم الله المستعان

انا كل اللي معايا 24 الف مش عارفه لو دفعتهم مقدم هيكون القسط كام لو عاوزه قسط مباشر وبلاش بنوك خالص لاني اليومين دول واخده اجازة من الشغل وعايزة اعرف تقريبا القسط هيكون كام ؟؟

انا ابن عم زوجي شغال هناك في ابو ظبي الاسلامي وقاله ان كلها اسماء بس كلهم زي بعض انا حتى هناك حاطه فلوسي حساب جاري مش دفتر توفير علشان الفوائد بردوا

جزاكم الله خيرا تعبتكم معايا ربنا يجعله في ميزان حسناتكم

المشاركة الأصلية كتبت بواسطة heshamzaky

بصى يا استاذة .
العربية رشة بالداخل دى ليها معنين
لو العربية موديل قديم شوية بيحصل أن البارومة بتاكل فى الصاج حلو فبتودى العربية للسمكرى يقص الجزء المتأكل من الصدأ و يحط مكانة زى رقعة صاج اخرى و يلحمها و بعدين العربية تتمعجن و تترش و دة طبيعى فى العربيات الموديلات القديمة نسبيا خصوصا فى بعض موديلات الفيات مثل ال 127 مثلا
و ممكن عربية تكون حصل لها حادثة و علشان تتعدل و تترد الخبطة دى لازم السمكرى يرد العربية بس باستعدال الصاج و عمل حاجة أسمها ((( حاموات ))) يعنى يشتغل فى العربية بلمبة اللحام الى بتطلع نار دة و دة لانة مش حا يقدر يرد الانبعاج الى فى الصاج من غير تسخين يعنى مش عارف يرد الصاج على البارد
ممكن اى عربية تعمل حادثة و علشان صاحبها ما يردش الخبطة و يعمل لحام ب النار يقوم رادد الخبطة على البارد و النتيجة مش حا يبقى الصاج مظبوط تماما فبيقوم مصلح الخبطة صح و يعدل السمكرى الخبطة بحاجة اسمها زرجينة و يرد باقى الصاج المعوج بلمبة اللحام و بالتالى لازم تترش العربية مكان الحرق بتاع لمبة اللحام.
أنا شخصيا عندى وجهت نظر ممكن ما تعجبش بعض الناس و ما تفضلهاش للا و هى
مش علشان اقول أن العربية فابريكا برة و جوة كل ما تتخبط اروح اردها على البارد و يبقى التصليح مش مظبوط تماما و السبب الخوف عند عملية أعادة البيع ان اناس حا تقولك اصل العربية راشة من الداخل . طب معلش هو أنا أمشى بالعربية متلصمة علشان اقول فابريكا جوة و برة لآ طبعا
الخوف فقط من موضوع الراش الداخلى أن الخبطة تكون كانت جامدة و سمعت فى شاسية العربية جامد و دة يقلل سعر البيع شوية فعلا
الافضل سمكرى كويس يبص على العربية و يقولك الخبطة دى مسمعة فى الشاسية و لا لا لو لا يبقى مش مشكلة قوى و ممكن التغاضى عن الموضوع دة
و على فكرة الماروتى عربية صغيرة جدا شوية يعنى فى اعتقادى أى خبطة حا تسمع فى صدر العربية من الداخل بمنتهى السهولة و ساعتها حا تترش و ممكن أجيب ماروتى زيرو و تتخبط و أنا خارج من المعرض مش حا اصلحها و ارشها
الخلاصة خلى سمكرى يبص على العربية و يقولك الخبطة ماثرة فى حاجة و لا لا
دة رأيى الشخصى و يحمل الصواب أو الخطأ

كلام موزون . وبالذات "هو أنا أمشى بالعربية متلصمة علشان اقول فابريكا جوة و برة لآ طبعا"