تجربتي مع سلخة من كاوتش نقل

**vjack** · 15-05-2011 12:07 PM

شباب الهوندا
أولا أنا سعدت بعد تجمعنا يوم الخميس اللي فات وإن شاء الله المرة الجاية تبقى ألذ والذ كمان

أحب أحكي تجربتي امبارح على الطريق السريع عشان لاقدر الله لو حصل مع حد منكم يعرف يتصرف,

اللي حصل إن وانا ماشي على الطريق شفت أدامي سلخة من كاوتش نقل مفرودة ونايمة على الأرض بعيدة بحوالي 50 متر أو أكتر, المهم جه برنس أدامي وكل السلخة ده طيرها في الهوا وانا ماكانش عندي مساحة للتفكير هديت شوية واستنيت لما تنزل, وسبحان الله نزلت واقفة 90 درجة وسايبالي نص حارة يعني لو جيت افاديها هانزل فالرمل والله أعلم بقى ساعتها إيه ممكن يحصل. مكنش عندي إلا إني امسك الدركسيون جامد واكلهـا أنا كمان والحمدلله العربية معومتش ولا أي حاجة بس الخسارة كانت الاكصدام الأداماني اتكسر 3 حتت. بس أعتقد لو كنت حاولت افاديها كنت خسرت أكتر من كده.
ربنا يحفظكم ويحفظنا جميعا.

**sanhory** · 15-05-2011 12:26 PM

الف سلامه عليك يابو حميد , قدر الله و ماشاء فعل

يلا اللي يجي فالريش بقشيش , و ربنا يحفظنا جميعا

**egyptmaro** · 15-05-2011 12:32 PM

قدر ولطف
حمدلله على سلامتك

**khaledfox** · 15-05-2011 12:33 PM

الحمد لله انها جات لحد كده
وانت اهم حاجه بفضل الله سليم
واى حاجه تانيه تتعوض ان شاء الله

**haythamkmal** · 15-05-2011 12:37 PM

الف سلامة يا ابو حميد ، تقريبا نفس الموقف حصل معايا زمان بال si كنت ماشى 160 ومعايا الاسرة على طريف اسكندرية وبعدى من مقطورة وفوجئت بحتة كاوتش صغيرة نايمة على الطريق طبعا مكنش قدام غير انى ادوس عليها ، الجنطين اليمين اتنو والكاوتشين اتقطعو ، بس ساعتها عرفت يعنى ايه هوندا لان والله ولا حسيت بتعويمة ولا اى حاجة ، بس وقفت بعدها على اليمين واعذبت طبعا عشان العجلتين باظو ، اكتر من اربع ساعات فى الصحراء بدور على داخلى وعلى بتاع كاوتش .