الموضوع: أعتراض طريق المارة

المشكلة لسة عندنا احنا
فينا احنا
في ناس بتتخيل انه كدة بيزكي عن ماله
وناس تانية بتديلوا من باب انه سائل (بسم الله الرحمن الرحيم واما السائل فلا تنهر)
وفي ناس متصورة انه صادق في كلامه
وانا عندي اكتر من حجه علي عدم صدقه
زي مثلا لو حد فينا من مرتادي المقاهي ، انا من سكان فيصل واخره تحديدا يوميا الوجوه واحدة وشارع فيصل شارع طويل مليان محطات لو انا مثلا في نصه بقضي مشوار بقابل نفس الناس الي بتعدي عليا علي المقهي مع أني مش مواظب علي المقهي يعني كل اسبوعين مرة
والروشتة الي من تاريخ سنتين فاتو وبيغلفها عشان ماتدوبش
والي يوقع طبق بيض ولا كيس لبن ويقعد جمبه يعيط ساعتين ويلم حقه 3 او 4 مرات
والي يعدي عليك وقولك عايز اجيب اكل انا جعان واحد صاحبي خده قاله اجيبلك سندويتش قاله لا شكرا وسابه اعتقد انه شحات وبيشحت من غير كسوف تتخيل الكرامة والنخوة هتاخده وتحرقه لو انت جيبتله ساندويتش!!!!!
ياباشا الناس دي منظمة وليهم قائد واعتقد شوفنا الكلام دة في الافلام بيخطفوا العيال دي ويسرحوهم واعتقد الشرطة بتبقي عارفة اوكارهم ومناطقهم واحنا بنساعدهم زي شوفت كدة فيلم الحرافيش طول ما محدش قادر عليا ولا بيقف قصادي انا الفتوة وهاخد اتاوة لكن لو حد وقفلي او منعني زي سليمان الناجي اسم الله عليه هريح علي جمب في الصالون
اعتقد الحل فينا احنا ياما نبقي ايد واحدة لمحاربة هذه الظاهرة المتفشية في مجتمع حنين وقلبه ضعيف زي مجتمعنا ياما نقعد ساكتين وماتزعلش علي فلوسك الي بتتاخد منك قهرا
انا معاك ان في قلة قلة قلة مؤدبة وبجد نازلة تاكل عيش مش تشحت وربنا قال عليهم
بسم الله الرحمن الرحيم
لِلْفُقَرَاْءِ الَّذِيْنَ أُحْصِرُوْا فِيْ سَبِيْلِ اللهِ لاَ يَسْتَطِيْعُوْنَ ضَرْباً فِيْ الأَرْضِ يَحْسَبُهُمُ الْجَاْهِلُ أَغْنِيَاْءَ مِنَ الْتَّعَفُّفِ تَعْرِفُهُمْ بِسِيْمَاْهُمْ لاَ يَسْأَلُوْنَ النَّاْسَ إِلْحَاْفاً وَمَاْ تُنْفِقُوْا مِنْ خَيْرٍ فَإِنَّ اللهَ بِهِ عَلِيْمْ
زي مثلا واحدة ست بجد باين عليها غلبانة (مش فقيرة ولا شحاتة) بتبيع مناديل ومش عايزة صدقة يعني لو قابلت واحدة زي كدة وحبيت تديها الي فيه النصيب من غير ما تاخد منها مناديل هتلاقيها رفضت ولازم تبيعلك او خد فلوسك تاني
هي دي الي ينطبق عليها الاية الكريمة
واعتقد هي دي احق الناس بنصيبها في مالي زي بردو ما ربنا قال
وللصدقة فوائد كثيرة حضراتكم اعلم مني بيها
لكن احنا دلوقتي عايزين حلول لنتصدي مشكلة اعتراض طريق المارة وخصوصا راكبي السيارات في الاشارات او في اماكن الانتظار ببجاحة وسوء ادب وخصوصا مع الذين لا يجيدون التعامل مع هؤلاء الصنف من الناس زي اختي واختك وزوجتي وزوجتك وبنتي وبنتك وااحنا ايضا انا وانت مش بلطجية ولا عندنا انا اسف قلة ادب عشان نوقفهم عند حدهم
والله المستعان
،
،