مش عارف ليه بعد ما خلصت قرايه حسيت كانى عامل دماغ:pإده إده.... أنا أول مره أعرف إن اللوح المعدنيه مصنوعه من الحديد... طول عمري أعرف إنها مصنوعه من الصاج المقوى ... ولا انا غلطان
والله يا أستاذ hashem1999 فكرتك كويسه وقابله للتنفيذ
أنا مش عارف ليه الناس مش متخيله الموقف... أنا متهيألي إن الموقف ممكن يحصل كالأتي وده من وجهة نظري:
* نزلت تركب عربيتك لقيت اللوحات مش موجوده أو البيه البواب طلعلك البيت على الساعه 6 كده أو 7 وخبط على الباب وإنت لسه يدوبك بتفوق وبيقولك ( يا بيييه يا بييه إلحج إلللححج .. ده أنيه وأنا بطوج العربيه مالاجيتشي اليفط البيضه اللي مكتوب عليها أرقام سودا ده.. هو سعادتك خلعتهم ولا إيه ولا مؤأخذه )
طبعا إنت مش فايق وهاتفتكر إن البواب بيخرف وبيشتغلك على الصبح.. ساعتها ممكن تفوق من الخضه وتنزل جري للعربيه تتطمن.. وساعتها هاتكتشف الكارثه
* أول حاجه هاتيجي على بالك إن لازم تبلغ بسرعه القسم قبل ماتحصل جريمه وتدبس إنت فيها
* تيجي حضرتك تروح القسم علشان تبلغ .. تلاقي يجي تلاتين واحد ذي حلاتك بيبلغوا على نفس المشكله .. ويبدأ الفار يجيب العيله كلها ويقولهم تعلوا نلعب في المراجيح اللي في عب الراجل اللي إتسرق منه اليفط البيضه :D
* طبعا حضرتك هاتعمل محضر ويدوك رقم المحضر علشان تطلع على المرور وهما هناك يتصرفولك في لوح تانيه
* المشكله تبدأ من هنا بقى.. لإما ربنا يكرمك وتلاقي لوح جديده تاخدها وتخلع أو حتى لوح نص لبه .. برده تخدها وتخلع.. لإما ربنا يكرمك برده ويقولولك هناك عدي كمان إسبوع علشان ماعنديناش لوح دلوقتي.. خلصت:(.. وتفضل ماشي بالوصل اللي ممكن يضيع أصلا
* طبعا.. الإسبوع بالتوقيت العالمي معناه شهر بالتوقيت المصري
* فجأه وبقدرة قادر .. واحد عسكري بيخبط على بابك برده الصبحيه ومعاه البواب ( اللي إنت خلاص كرهته أصلا ) والعسكري بيقولك البيه المأمور عايزك بكره في سرايا النيابه.. ياريت تيجي الساعه 6 في التو واللحظه علشان البيه المامور مابيحبيش التأخير
* تروح هناك وتفاجأ إن حضرتك لبست في قضية قتل ولا مخدرات ولا أي مصيبه من المصايب ده وإنت أصلا كنت قاعد في بيتك ومعاملتيش حاجه.. وتلاقي البيه المأمور يقولك أصل لوح عريبتك ديه كانت في مسرح الجريمه الشعبي أو كانت على عربيه شايله نص كيلو بدرة تلج :D وإنت مش مصدق نفسك
* تيجي إنت تحلفلوا إن اللوح بتاعة العربيه ده مسروقه منك وبلغت . ويجي هو يدور ومايلاقيش حاجه .. لييييه ... علشان البهوات اللي في المرور نسيوا رقم من الأرقام الأصليه بتاعة اللوحات بتاعتك أو نسيوا حرف من إسمك أو حاصل أي خطأ بشري في إدخال البيانات أدي إلى هذه الكارثه
* هايطلع عينك بقى لغاية ماتجيب حقك وتثبت إن اللوح بتاعتك مسروقه .. وحته لو معاك ورقه من المرور بتثبت إنك عاملت محضر .. ممكن ساعة الجد مافيش حد ياخد باله من اي حاجه والمهم مين اللي قتل المجني عليه
* طبعا المشكله ده هاتبقى كبيره اوي وصعبه لو حصلت السرقه بعيدا عن مكان إقامتك زي الأسكندريه او أي محافظه تانيه
فالمشكله ده أنا شايف إنها من أصعب المشاكل اللي ممكن تقابل أي واحد معاه عربيه .. لأنها تشبه حالة كائن بشري له جسد كامل النمو وليس له ذاكره
من الأفكار اللي كنت بفكر فيها علشان الواحد يخلي باله من لوحه.. هي وضع لاصق من النوع المحبب أو المخشوشن ده ( انا مش عارف إسمه أيه بالظبط) بس ده النوع اللي بيستخدم دائما في أحذية الأطفال الصغيره.
لو جبت اللاصق ده ممكن ساعتها تفك اللوحه الأصليه بتاعة العربيه بسهوله في كل مره تسيبها. وممكن برده تضربلك لوح أي كلام بأي أرقام وتحطها مكان اللوح الأصليه علشان البيه اللي هايجي يسرقهم... يسرق المضروبين
ياريت لو أي حد من الأعضاء هنا مر بالتجربه ده .. يحكلنا عمل آيه بالظبط...
المفضلات