الموضوع: ماهو رايك فى خطبه الجمعه فى منطقتك

من اهم الحاجات اللي نفسي فيها هي أن تكون الخطبة مؤثرة
فيه كتاب على فكره لديل كارنيجي وهو عالم إجتماع واسم الكتاب على ما أتذكر ( الخطبة المؤثرة )

أنا أتذكر واحد مهندس زراعي بس واخد معهد دعاه كان بيخطب في الناس بأسلوب بسيييييييييييط جدا
وكان دايما يخطب في الشئ اللي ما حدش يتوقعه
ومن حلاوة كلامه سواء في السيرة أو الأخلاق أو غيره لغاية دلوقتي من عشرين سنة وانا حافظ كلماته وكأنها بترن في أذني حتى اليوم

لازلت أذكر تشبيهاته وحركاته وهو يشرح كيف اختفى سيدنا عبد الله ابن اليمان كاتم سر رسول الله صلوات الله وسلامه عليه
وهو يشرح كيف تخفى وسط الظلمة ووصل إلى جوار عمرو بن العاص ومعاوية بن أبي سفيان واشتد الظلام فنادى أبو سفيان في الناس أن يتفقد كل صاحبه حتى لا يكون بينهم أحد من المسلمين فأسرع ابن اليمان وبكل نباهة وذكاء فسأل عمرو بن العاص : من أنت فقال له عمرو بن العاص
ثم تلفت للجانب الآخر وقال له : ومن أنت
فأجابه معاوية بن أبي سفيان
فاستطاع بسرعة تفكيره أن يتغلب على داهيتين من دواهي العرب - ولم يخالف امر الرسول الكريم عندما أمره أن ياتيه بنبأ القوم ولا يحدث


فضل هذا الخطيب تقريبا سنة ونصف يخطب في حديث واحد فقط وهو الحديث المشهور عندما جاء سيدنا جبريل وسط الصحابة في صورة رجل وهو حديث مروي عن سيدنا عبد الله بن عمر
فضل يشرح ما هو الإسلام أركانه وفرائضه وسننه ونواهيه
وما هو الإيمان

وآخر خطبة شرح فيها الإحسان
والله لا أنسى هذه الخطبة أبدا
كنت طول عمري أسمع قول الرسول الكريم ( الإحسان أن تعبد الله كأنك تراه فإن لم تكن تراه فإنه يراك ) وما أعرفش إيه معنى الكلام ده بالتحديد

جه الشيخ محمود ربنا يكرمه وقال ( يا جماعة عارفين معنى الكلام ده إيه - يعني تعبد ربنا وكأنك تراه أمامك - تستشعر إنك شايفه وتراقبه في كل أعمالك - طب لو مش قادر تحس الشعور ده يبقى على الأقل تستشعر إنه هو يراك - لازم تعرف إن ربنا سبحانه وتعالى شايفك ومطلع عليك وعارف إنت بتعمل إيه - ربنا يعلم السر وأخفى - يعلم ما يلج في البحر وما ينزل من السماء وما يعرج فيها - ربنا عارف انت بتفكر في إيه وبتبص على إيه لأنه سبحانه وتعالى يعلم خائنة الأعين وما تخفي الصدور ،
عارفين يا جماعة الدين كله كوم وإحسان الدين كوم تاني
عارفين الناس ممكن تكره الدين - وتكره الشريعة وتكره الأحكام وتكره الصلاة وتكره ربنا لو ما كانش فيه إحسان
إحسان الدين يعني إنك تقدم الدين على اجمل وأحسن صورة
وبعدين ضرب مثال وهو دائما ما يضرب أمثلة من حياتنا
واحد زعلان مع مراته
وعمل معاها خناقة راح مد إيده عليها
لو ناقشته يقولك يا عم الشيخ ما هي بتعصيني وربنا أحللي إني أضربها مش هو الدين كده - هأقوله إيه - هأسكت وأقوله كده يا ابني
هي تسيب البيت وتقعد في بيت أبوها ونروح نرجعها تقولنا انت يرضيك إنه يمد إيده علي - هو مش شرع ربنا إن الواحد يعامل مراته كويس - هو اللي عمله ده يرضي ربنا - اقولها يا بنتي انتي معاكي حق لأن دين ربنا ما أمرش بكده
هو يروح يرفع عليها قضية يطالبها فيها ببيت الطاعة - حقي ولا مش حقي - طبعا حقك - دين ربنا ولا أنا غلطان - أقوله يا ابني ده شرع ربنا وانت من حقك تطلبها لبيتك
هي ترفع عليه قضية وتطالبه بالقايمة - حقها ولا مش حقها - حقها - مش ده شرع ربنا - أيوه شرع ربنا
هو يتهمها بالنشوز وعدم الطاعة - حقه
هي تطالبه بالنفقة - حقها
هو ييطلب ضم العيال - حقه
هي ترفع عليه قضية تبديد عفش البيت وتطالبه بسكن مناسب - حقها

ونفضل نلف في المحاكم بين حقه وحقها وكل واحد فاكر إن دين ربنا بيؤيده وأكيد هيجيب نصوص من الدين ومن القانون كمان تؤيد كلامه
ولو ناقشت أي واحد فيهم هيقولك ده حقي وده شرع ربنا ودين ربنا والقانون كمان في صفي

والناس تكره الدين وتكره الشرع
لأننا مش بنتعامل مع الشريعة والدين بالإحسان

طب تعالوا نشوف بقى ربنا بيقول إيه : بسم الله الرحمن الرحيم :-
( فَإِمْسَاكٌ بِمَعْرُوفٍ أَوْ تَسْرِيحٌ بِإِحْسَانٍ ) [البقرة229]
( وَلِلْمُطَلَّقَاتِ مَتَاعٌ بِالْمَعْرُوفِ حَقًّا عَلَى الْمُتَّقِينَ ) البقرة/241
( وَمَتِّعُوهُنَّ عَلَى الْمُوسِعِ قَدَرُهُ وَعَلَى الْمُقْتِرِ قَدَرُهُ مَتَاعاً بِالْمَعْرُوفِ حَقّاً عَلَى الْمُحْسِنِينَ ) البقرة/236 .
{ولهن مثل الذي عليهن بالمعروف} [البقرة: 228]
{وعاشروهن بالمعروف } [النساء: 19] .
{وأسكنوهن من حيث سكنتم من وجدكم ولا تضاروهن لتضيقوا عليهن} [الطلاق: 6].
{لينفق ذو سعة من سعته ومن قدر عليه رزقه فلينفق مما آتاه الله لا يكلف الله نفسًا إلا ما أتاها} [الطلاق:7]
وفضل الخطيب يعدد الآيات وبعدين قال
يا جماعة كل العلاقات بين الرجل وزوجته ربنا لم يضع لها حد فاصل وعيب لما نوصلها للقضاء وبعدين كل واحد يقول أنا معايا الحق
لا - ربنا قال المعروف والإحسان
ولو اتعاملنا بالإحسان الناس هتحب بعضيها وتحب دين ربنا وتسامح بعض
وتبان عظمة الإسلام وعظمة المسلمين
لكن لو ضاع الإحسان ضاعت حلاوة الدين


انا الصراحة لم أجد خطيبا أرتاح له كما أرتاح للدكتور القرضاوي أطال الله عمره وبارك له في صحته وأحسن نيته وتقبل عمله وتجاوز عن سيئاته

والشئ التاني اللي نفسي فيه هو أن يكون الخطاب موجه للفرد مش للجماعة

أنا باحس كده إن فيه خطباء بيخطبوا خطبة مذهلة ومجلجلة ومبهرة حقا لكن كل خطابهم موجه للأمه ويجب على الأمة والمفروض على المسلمين ولابد أن المسلمين وواجب المسلمين
وكل واحد طالع من المسجد فاكر إن الكلام ده موجه للمسلمين لكن مش له هو شخصيا
زي ما بيكون فاكر إن الموضوع فرض كفاية وفي المسلمين ما يكفي للقيام به بدونه

وأفضل ملاحظة في حوارات عمرو خالد - سواء اتفقنا معه أم لم نتفق - أنه دائما يوجه حديثه للفرد
المفروض عليك إنت
يجب أن تفعل أنت كذا
لابد أن تهتم أنت بكذا

وكل واحد بيسمعله بيحس إن الكلام موجه له شخصيا دونا عن الجميع

المهم إن الفكرة اللي طولت عليكم فيها - أصل أنا قاعد لوحدي وعيالي مسافرين للأسف - الفكرة هي أن تكون الخطبة مؤثررررررررررة
واللي يسمعها ما ينبسطش منها قد ما يستفيد منها
وتسيب فيه أثر ما يتمسحش بأي وسيله

وتقبلوا تحياتي