المشاركة الأصلية كتبت بواسطة sharafconsult
أشكرك لردك المهذب
أنا تعاملى دايما قبل الثوره وبعد الثوره كمهندس أستشارى وليس بصفتى مقدم فى الجيش
لأن رتبتى داخل نطاق القوات المسلحه فقط
وكل كلامى فى المنتدى بدون تحيز نهائى للجيش ألا فى حالتين فقط:
الأولى لو حد بيقول معلومه وأنا عارف الصح فيها فبصححها
الثانيه لما حد بيغلط وبيشتم فى الجيش وده برد عليه بعنف لأنه بيغلط فيا وفى ناس ما تستاهلش كده
بالنسبه لموضوع السلاح مشكلته أن مينفعش كل الناس تمشى بسلاح لأن كده هنكون فى غابه وأسمحلى أوضحلك وجهة نظرى
على سبيل المثال أحنا أستلمنا سلاح فى بداية الثوره وبعد كده حصل قتره لمدة أسبوعين تقريبا سلمنا السلاح ورجعنا أستلمناه تانى , فى الفتره دى مرضيتش أشيل سلاح مع أنى لو شيلت دبابه فى شنطة العربيه محدش هيقولى لأ . و بنفس المنطق اللى قولتهولك , مينفعش ألاقى واحد ماشى بسلاح وأقوله ده غلط وأنا شايل سلاح بالغلط.
طبعا هتقولى بس أحنا مضطرين ( وأنا موافقك فى قلقلك ) بس لازم السلاح يتلم تانى ونقلل الناس اللى شايله سلاح , أنت ممكن تطلع سلاح ( أى كان نوعه ) لما حد يحاول يقتلك لكن غيرك ممكن يطلعه لو واحد زنق عليه بالعربيه , هنحكمها أزاى دى.
وردودى على بعض موضوعات الأنفراد بالقرار للمجلس الأعلى مثلا فلأنى عارف القرارات ماشيه أزاى وبمناقشه وموافقه عصام شرف ووزير العدل وعارف أن محدش هيصدقنى لكن أنا بقول الحقيقه وخلاص
موضوع أن المجلس العسكرى قراراته مقدسه أو تأليه أفراده فده طبعا غير موجود ( على الأقل عندى أنا ) لأن دول بشر
ممكن يغلطوا عادى جدا وكلنا ننتقد أجراءات معينه برضه عادى جدا
يعنى فيه قرارات أنا عارف أتعملت ليه مع أن فيه ناس مش موافقه عليها بس أنا موافق عليها لأنى عارف خلفياتها
فيه مشاركات بقول فيها طب ليه الناس مش بتحاسب عصام شرف ووزير العدل وهل هما متواطئين مع المجلس ولا لأ , بقول كده لأن عصام شرف عارف سبب القرارات دى زى ما أنا عارفها ( طبعا هو على مستوى أعلى ) وموافق عليها وعصام راجل ممتاز جدا مش مجرد خيال مأته موافق وخلاص بس مش كل حاجه ينفع تتقال
فيه زميل لينا فى المنتدى كتب مشكله له مع ضابط جيش , أنا ما دافعتش عن ضابط الجيش بالعكس متابع المحضر بتاعه ووصيت عليه أنه يخلص بسرعه ( لأن القواضى كتير قوى فى النيابه العسكريه ) لأن ده واحد أساء للبدله اللى هو لابسها وللمؤسسه اللى بينتمى ليها لما أستغل سلطاته .
صدقنى كل كلامى مالوش علاقه خالص بكونى ضابط فى الجيش , أنا بتناقش بعقلى وتفكيرى أنا , مش تحيز للجيش
مفيش حد كامل وممكن بعد شويه نلاقى أن فيه قرار كان غلط ساعتها مش هقول لا برضه المجلس العسكرى على حق , دى تعتبر قبليه نهانا عنها الرسول الكريم صلى الله عليه وسلم
أرجو أن أكون وضحت وجهة نظرى ونفيت عن نفسى أنحيازى للمجلس العسكرى لمجرد الأنتماء وخلاص
تقبل تحياتى وسعادتى بالمناقشه معك