حضرتك شخص محترم جداا و دا واضح من طريقة كلام حضرتك المهذبة يا بشمهندس و انا سعيد انى بتكلم مع شخص ذوق كدا
أنا احب اوضح لحضرتك كام نقطة , انا مش بطالب ان اعضاء الحزب الوطنى يتحاكموا , انا بطالب بس بحبس اعضاء مجلس الشعب عن الحزب الوطنى اللى كانوا بيجددوا الطوارىء و كانوا بيمرروا القوانين اللى خربت البلد و وافقوا على اتفقيات او حاجات ضرت الاقتصاد من الاخر اعضاء مجلس الموافقون - موافقة بتوع الحزب بس.
موضوع التصالح المجلس اعلن نيته للتصالح علشان الاقتصاد و حال البلد يمشى بس قال انه عايز يشكل لجنة تبقى مختصة بالمصالحة و معندوش اليه معينة او فكرة معينة للتطبيق و الكلام دا بعد ما مشروع قانون فى مجلس الوزراء اترفض شعبيا تماما و شافوا الرفض بيعنهم فى برامج زى العاشرة مساء و بعدين دا قانون خطير بيحط مبدا خطير اسرق و لو اتمسكت رجع شوية بسيطة من الفلوس متعللا ان القبض عليك هيخرب مجموعة شركاتك اللى شغال فيها الوف و هيضر بالاقتصاد , يعنى اللى يسرق يسرق جمل من الاخر بلاش شغل حرامية الغسيل دا.
القوانين ممكن بسهولة ياخدوا راى الناس اللى على الساحة و يتخذوا القرار المناسب المرضى للاغلبية يعنى مثلا موضوع الاستفتاء عمرو موسى رفضه و البرادعى رفضه و عبد المنعم ابو الفتوح بس مش متاكد اوى رفضه اللى فاكره 2 من قادة الاخوان رفضوه و دول مرشحين الرئاسة كان ممكن الاستفتاء يتعدل , الشعب وافق على المواد اللى فيه صحيح بس هو غير كافى لما 22% من الشعب يرفضوا تعديلات بديهى ان الكل يوافق عليها معناها كان ممكن المواد تزيد زى الغاء ال50% و مجلس الشورى كان ممكن النسبة الموافقة تبقى 90% و يبقوا رضوا الناس كلها , يعنى الناس هتقبل باللى هتدهولها مش معنى ان 77 وافقوا ان الشعب فعلا عايز كدا , فى ناس كتير وافقت علشان عايزة اسرع استقرار ممكن و دول اغلبية , و فى ناس وافقت و دول ملايين علشان خافوا ليعملوا دستور جديد و يلغوا المادة التانية فدول كدا كدا هيوافقوا , انا مع راى الاغلبية و لازم احترمه بس المجلس عمل اعلان دستورى من 60 مادة و استفتى الناس على 4 مواد بس , كان ممكن يخليهم 7-8 مواد تضرى كل الناس و يستفتى الشعب و يعمل التعلان ب 60 مادة برده و كل الناس راضية.
الحالة الاقصادية مش كويسة اكيد و فى ركود فى كل حاجة بس البلد مش بتفلس اساسا و فى تضخيم شديد للامور و تخويف كمان و الحالة مش سيئة للغاية يعنى , كلنا شوفنا 2008 اخرها كان عامل ازاى و الازمة عدت فى سنة.
صدقنى حضرتك لو عايزين راى الناس هيعرفوا يشوفوا الاراء على الساحة و ياخدوا المعتدل منها و راى الاغلبية بس القرارات بتيجى فوقية
ثانيا انا لا اثق فيه مش بس مختلف معاه بس مش هقدر اكتب الاسباب هنا و هى اسباب كتير جدا عامة و طبعا حضرتك تقدر تخمن شوية منها , بس مش لدرجة الاحساس بالخيانة طبعا , انا عندى عدم ثقة زى واحد معرفوش ليه حاجات كويسة تطمنى منه و ليه حاجات كتير تخوفنى منه مثال واحد معرفوش قالى ادينى كل فلوسك و انا هستثمرهالك , معنديش مكان تانى احط الفلوس الا عنده او حتت تانية غير مضمونة حتى لو اديته الفلوس برده لا يمنع ان معنديش ثقة لانه معملش اى حاجة تثبتلى انه محل ثقة, وقوفه مع الثورة دى حاجة كويسة بس برده انا شايف انها مش حاجة اختيارى او بالاصح شايفها احسن الاختيارات بالنسباله احسن من الوقوف مع شخص كدا كدا منتهى و خصوصا ان الجيش نفسه مش هيقبل ضرب الناس نهائيا او حاجة , انا مش بقول ان المجلس عمل كدا لا او حتى فكر كدا ,لأ بقول ان دا احتمال وارد و ان اختياره الوقوف مع الثورة دى كانت احسن الحلول و اضمنها ليه فمش معتبرها نقطة تخلينى اثق فيه , هى حاجة كويسة اوى بس احتمال تكون مش من نفسه , كمثال واحد شايفك قريب مديره فهو بيخدمك جامد , ممكن يكون بيخدمك علشان هو شخص خدوم و ممكن علشان شايف ان تقربه منك لو مكسبش مش هيخسر على عكس لو خسرك.
بس مبارك متقبضش عليه علشان مفيش حد فوق القانون مثلا و الا كان اتقبض عليه و اتحاكم مع حبيب العادلى و خصوصا انهم نفس القضية اساسا و دى حاجة غريبة جدا ان كل واحد يتحاكم لوحده , زى طلعت مصطفى و السكرى قضية واحدة = محاكمة واحدة , هو اتقبض عليه بعد جمعة التطهير و دا اللى مزعلنى بعدها بشهرين يتقبض عليه بعد مظاهرات
انا اساسا مقتنع اننا نصبر 6 اشهر و نشوف و لاننا كدا كدا معندناش بديل تانى و انا رافض المجلس الرئاسى علشان اساسا كله هيختلف نجيب مين بس انا مؤمن بضرورة المظاهرات يوم الجمعة كل مدة علشان مينيموناش(مش بتكلم على المجلس , بتكلم عموما على اللى ماسكين مناصب) و نلاقى فعلا مهرجان البرائة للجميع اشتغل , يعنى لا ننام و نسلم كله للمجلس و لا فى نفس الوقت نخون و نشكك فى كل خطوة ياخودها بس لازم نتفق على مطالب اساسية و نراقب بتتحقق و لا لأ زى محاكمة مبارك و رموزه و رجال اعماله و المسئولين فى الهيئات اللى عملوا ملايين من السرقات و الفساد و كدا.
صدقنى حضرتك الناس بتشتغل عادى , اللى مبيشتغلش اللى ليه مطالب فئوية وكدا كدا مكانش بيشتغل اساسا و هو اللى متخوف ان بعد كدا الهوجة تروح و و لا حاجة تتحقق , اذا كنا فى عز الثورة و كل حاجة زى ما هى و الفسدة فى كل مكان و التطهير و المحاكمات و الاقالات بطيئة جداااا جداااا و العدالة بطيئة او غير موجودة بعد سنة هيكون الحال ايه , انا هرفع القبعة للمجلس فعلا لما احس ان فى عدل فى البلد و ان مفيش حد اطلاقا فوق القانون بسبب علاقات و لا قوة و لا فلوس و لا نفوذ و لا اى حاجة , عايز اشوف "لو فاطمة بنت محمد سرقت لقطع محمد يدها" ماشيين عليه فعليا , عايز اشوف عدل ربنا بيطبق مش علشان دا عنده شركات مشغل 100 الف و لا مليون عامل طب خلاص قفل على الملفات (مش بتكلم على المجلس نفسه , بتكلم على اى جهة تقفل مفروض المجلس يحاسبها) , فين الظباط اللى عذبوا و قتلوا و عملوا ملايين و مليارات فى امت الدولة ؟؟ ازاى ميتقبضش عليهم ؟
اخر نقطتين , 1- المجلس العسكرى بالنسبالى زى رئيس الجمهورية بالظبط و مفروض لما يشوف حاجة غلط مش هو اللى عملها بس هو مسئول و شايفها مفروض يتدخل علطول يعنى مش لازم مظاهرات و المطالب تتنفذ يوم الخميس قبل المظارهة بيوم.
2- انا مع محاكمة البلطجية محاكمة عسكرة بس المتظاهرين اللى مش ماسكين اسلحة لأ و لا الناس العادية تتاخد محاكمة عسكرية الا لو الموضوع كان فى سلاح ابيض على الاقل و يكون متحرز غير كدا مينفعش نحاكم مدنى فى محاطمة عسكرية.
المفضلات