الموضوع: تعالوا نعرف ازاي نغير زيت الموتور و فلتر الزيت

بسم الله الرحمن الرحيم
السلام عليكم و رحمة الله و بركاته

و لسه بنكمل سلسلة تعالوا نعرف
و ضميري اللي راشق في السلسلة من اولها لأخرها لما زهقكم
( مين ده ياض ...اتلم )
مش بقولكم

انهاردة بقي هنتكلم ع حاجة اسهل من كل اللي قات ( تقريبا يعني هههه )

انهاردة هنتكلم عن ازاي نغير زيت الموتور و فلتر الزيت
ياااه اكيد حاجة صعبة و محتاجة واحد حريف و فاهم في العربية كويس
لأ يا ريس بالعكس ده ممكن عيل عمره 10 يعملها
للدرجة ديه
اه للدرجة ديه

كل الادوات اللي هتحتاجها هي

1-مفتاح غطا الخزان بتاع زيت الموتور


2- طبق بلاستيك بتاع الغسيل تنزل فيها الزيت القديم ( و يا تري الزيت هياخد فومين .... بس يلا بدل ما اخدك انا فومين )


3- لو مش هتعرف تحط الزيت من العلبة مباشرة ممكن تستخدم قمع معدن او بلاستيك و تنزل بيه في الموتور
و عن نفسي قبل كده اتزنقت ملقتش قمع جبت حتة كرتونة و لفتها قرطاس و بقت قمع كرتوني هههههه ( و في الاخر قعدت تدور ع حنفية تغسل ايدك و لما لقيت المية كانت قاطعة .. مهو طول ما انت فيها بفقرك عمر ما حاجة هتكمل )
و يفضل انك تستخدم القمع مش عشان مبتعرفش تصب لكن عشان مفيش زيت ينزل خارج الموتور


4- طبعا مننساش علامة الجودة المصرية حتة الكرتونة اللي ننزل بيها تحت العربية


5- لو حد هيواجه صعوبة انه ينزل تحتها ممكن يستخدم الكوريك و يرفع العربية شوية بس ده لو عربيته نازلة ع الارض اوي


6-و اخيرا و ليس اخرا
الزيت اللي هتستخدمه و فلتر الزيت
لو هتغير فلتر الزيت و يفضل انك دايما تغيره
( يا عم مش عايز اغيره انا حر ... ياكش تولع انت و الموتور هو موتوري و لا موتورك .. صحيح هو موتوري فعلا :( )


معلش بقي الرسم ع برنامج بينت هههه
( طول عمرك فاشل في الرسم حتي ع الكومبيوتر .. اه بامارة الشهادات و 19-20 بتوع الرسم )

الخطوات كالآتي

1-هناخد حتة الكرتونة بتاعتنا و ننزل تحت العربية و نحطالطبق البلاستيك تحت الفتحة بتاعت خزان الزيت هتلاقوها تحت الموتور مباشرة
و بعدين نفك المفتاح الغطا و نخلي بالنا ان الزيت هينزل يتدفق زي الشلال في الطبق يعني تفتح و تشيل ايديك بسرعة و تسيبه لحد ما ينزل كل الزيت و يتصفي خاااااالص
2-لو هتغير فلتر الزيت
هتلاقيه ع يمين او شمال الخزان ع حسب الجهة اللي انت جي منها
تفكه عكس عقارب الساعة ( ملحوظة اوعي تفكه قبل ما الزيت يتصفي خالص لأن المرة ديه هتلاقي شلالات النياجرا نازلة عليك زيت )
3- بعد ما الزيت اتصفي و فكيت فلتر الزيت القديم نقفل الغطا بتاع الخزان من تحت تاني اوعي تنسي الخطوة ديه و الا هتشوف الزيت اللي انت جبته بيسقي عطش الاسفلت
المهم بعد ما قفلت الغطا
تجيب الفلتر و تشرب اطرافه حبة زيت و تركبه مكان القديم و تلفه مع عقارب الساعة و لو معاك اي حتة قماشة امسح الزيت حوالين الخزان و الفلتر لو نزل
4-خلصنا من تحت نقوم بقي من تحت العربية مش هنبات يعني
تفتح غطا الموتور من فوق و تجيب القمع و تصب في الموتور
بس اوعي تصب كله مهواش جردل مية في بلاعة
( ايه يا عم السباك انت .. بس يا ابو جهل... ماشي يا عكرمة ... اخرس ياض )
لو مش عارف الموتور بياخد اد ايه
صب حبة حبة و كل شوية قيس المقياس اللي جنب الموتور
المقياس ده اللي هو عبار عن سيخ بيقيس اد ايه زيت في الموتور لو الزيت وصل لحد العلامة اللي هو خرم في السيخ يبقي كده الموتور اتملي زيت تمام
بعد خلصت صب
تبص ع علبة الزيت من الجنب هتلاقي حتة شفافة و مكتوب عليها زي الترمومتر كده و تشوف الزيت نقص اد ايه
تبقي انت كده عرفت الموتور بيتملي اد ايه كل مرة تغير
و تقفل الغطا بتاع الموتور

و مبروك انك غيرت زيت الموتور



طبعا في ناس تقولك يا عم ليه كل ده و مش كل ده هي جت ع 3-5 جنيه و ايه البخل ده
الموضوع مش موضوع بخل و لا كرم
الموضوع ان انا مثلا بحب اعمل كل حاجة بنفسي و اي حاجة اقدر عليها اعملها غسيل العربية تغيير زيت فلتر ..الخ ..الخ
يعني مش من النوعية اللي بتحب تكبر دماغها و اجيب اي حد يعملي اي حاجة بالفلوسو الحاجة اللي مفهمش فيها اروح اه لحد يعملها و اتعلمها كمان شعان لو حصلت تاني اعملها بنفسي
و في ناس كتيير كده حوار تكبيير الدماغ لدرجة ان بشوف شباب يعني يا ريت رجالة لأ شباب و مش عارف يغير العجلة لما تنام يا حلاوة يا ولاد

و حتي هخسر ايه لو اتعلمت افرض مثلا انت اتزنقت و عايز تغير الزيت و لقيت ان مفيش حد يغير هتفضل مستني ان حد يجي يغيرهولك

طبعا نظرا لأن مفيش صور لأن لسه مغيرتش بطارية الكاميرا من يوم قصتي مع حملة الشرطة في روكسي و مازالت لم اجد الفلاتة الخاصة بالموبيل
و طبعا انتوا شوفتوا عينة الرسم ع بينت

فجبت فيديو فيه برده الكلام ده عشان يبقي عملي قدامكم

[youtube]http://www.youtube.com/watch?v=roLjxRIXOts[/youtube]

طبعا الغطا بتاع الخزان مش شرط يبقي في النص بالظبط ممكن يكون مترحل يمين او شمال ع حسب العربية

و محدش ياخد في باله صوت الجرار اللي اشتغلت لما الواد دور العربية هههه
( زي عربيتك كده ... عربيتي انا برده جرار ياض طب مش هركبك فيها تاني انت تطول اساسا تركب التو و مش اي التو ديه 800 سي سي يعني وحش الاسفلت اوعي وشك هههههه.. و يلا جهز نفسك عشان العلقة بتاعت كل موضوع هتاخدها هتاخدها)


و اتمني ان الموضوع يعجبكم

و انتظروا باقي السلسلة

و بالتوفيق للجميع ان شاء الله