الواحد يبقى شهم و طيب ولا يتقتل و لا يتسرق مش عارف ! حتعملوا ايه في الموقف ده ؟

**CryptonX** · 05-06-2011 02:20 PM

السلام عليكم ,

موضوع بسيط بس اتخانقت بسببه خناقة كبيرة جدا !
طبعا اانتم عارفين الوقت والجو الي احنا فيه و بطلجية و حرامية .. والبوليس لسة بيدور على نفسه !
فمبقاش في حد واثق في حد وكله بيحاخد حرص زيادة شوية ضد اي حاجة ...

من كام يوم كنت في العربية انا و المدام, ماشيين في شارع جانبي متفرع من مكرم عبيد بس مظلم شوية .. الشارع ده في اخره جامع معروف يعني نسبيا, المهم .. كنت واقف على جنب بتكلم في التليفون .. لقيت واحدة ست كبيرة في السن ( 65 فما فوق ) و شكلها مش شحاتة يعني .. بتخبطلي على القزاز .

المدام بتترعب من اي حاجة و قالتلي مفتتحش القزاز و امشي !
بصراحة فضولي غلب عليا و فتحته ..
نعم يا حاجة في حاجة ؟
- والنبي يابني انا رايحة الجامع الي في اخر الشارع و رجلي مش قادرة تشيلني و ابني حيجيلي كمان شوية هناك, ممكن بس تاخدني معاك لاخر الشارع ؟

طبعا المدام فعصت ايدي و بتهمسلي بصوت واطي "لأ لأ لأ لأ لأ لأ لأ لأ لأ لأ "
معرفش ... حسيت ان الست بشوشة يعني و عجوزة حتعملي ايه ...

-اركبي ياحاجة ... ركبت و قعدت تدعيلي لحد ماوصلنا (مسافة قصيرة جدا ) و نزلت من العربية و شكرتني تاني و شكرت مراتي

هي نزلت من هنا و المدام انفجرت فيا ! انا مقدر قصدها ايه .. بس برده مش عارف حاسس ان حكمي على الناس حيعفيني من مواقف ممكن لاقدر الله تبقى في شكل اخر ...

المهم, بعدها بالصدفة بكلم واحد صاحبي قالي ان اخوه حصله نفس الموقف و واحدة ست عجوزة برده .. بس قالتله على حتة كدة يخش فيها و طلع عليه ناس و قلبوه و سابوه في العربية بعد علقة حلوة و الست مشيت معاهم..

طبعا محكتش القصة دي للمدام علشان ممكن مباتش في بيتنا انهاردة :)

ياترى المفروض الواحد يعمل ايه في موقف زي ده ؟
اقولها لأ معلش مستعجل .... مش عارف ارفض ازاي حاجة زي كدة ...

كل مافتكر اليوم ده ..

افتكر اليوم الي كنت عندي سيتي سنتر في مكرم عبيد برده ... و راجل موظف او حاجة كدة ( لابس البدلة بتاعة موظفين الحكومة ) قاعد على النافورة الي برة و عمال "يحسبن" و يدعلي لله بالانفراج .. بس مكانش بيشحت يعني و سبحان الله لقيت قطة صغيرة واقفه جانبه عمالة تصوت عايزة تطلع تشرب تقريبا ولا ايه ..

والله الراجل قام قلع الحذاء بتاعه . و حد في ماء من النافورة ... و قربه للقطة و شربت منه !!

يعني راجل شكله عند كرب او كارثة الله يعينه لما شاف قطة محتاجة شربها ... وان الي الحمد الله راكب عربية و مستورة الحمد الله شفت واحدة قد والدتي محتاجة حاجة بسيطة جدا ... انفضلها ؟؟

ولا الوقت ده مش بتاع شهامة و جدعنة .. مش عارف بصراحة .

ايه رايكم ؟؟؟

**ahmedfd** · 05-06-2011 02:35 PM

سؤال في غاية الصعوبة في الظروف اللي إحنا فيها دي.
اللي حصل حصل و متتعبش نفسك في التفكيركتير، إنت ربنا هداك في ساعتها لقرار و طالما نيتك خير ربنا مخذلكش و كمان خدت ثواب كبير و دعوة حلوة من الست الكبيرة.
لو الموقف إتكرر تاني مش عارف أقولك إيه بصراحة بس لو راجل أو شاب بالتأكيد ملهاش معنى أو لازمة إنك تقفله و كمان لو لوحدك في العربية غير لو حد معاك.
على كل أنا متابع معاك ردود الزملاء.

**Mahmode** · 05-06-2011 02:35 PM

أنا أضم صوتي للمدام. خليك في السليم أحسن بالذات في الفترة الصعبة اللي إحنا فيها

**AshTurbo** · 05-06-2011 02:37 PM

مع تقديري لموقفك النبيل لكن أعتقد المدام عندها حق وبغض النظر عن الموقف اللي حصل أنت تجاهلتها وتجاهلت توسلاتها ليك مع أنها ست وضعيفة وقلبها مش زي قلبك فأكيد بتصرفك دة حطيتها في موقف صعب .

**ahmed_su** · 05-06-2011 02:42 PM

كان نفسى اجوبك - بس انا فى نفس حيرتك

**elfashn** · 05-06-2011 03:12 PM

المشكله ان البلطجيه خلاص هيخلونا نتخلى عن طبعنا ...الشهامه. طبعنا كمصريين..احنا كده نحب نساعد حتى لوكان حد غريب.بس مينفعش خالص اليومين دووول علشان الشهم بيبقى جزاءوه السرقه والبهدله.معلش المدام كان عندها حق اوى وياريت كلنا ناخد حذرنا وربنا يعدى الايام دى على خير

**Imhotep** · 05-06-2011 03:28 PM

طيب ما نحلل الموضوع و نفكر بطريقة مختلفة شوية....
1- احنا للاسف فى وقت صعب و بالتالى يغلب فيه منطق الحرص على السلامة الشخصية على الرغبة فى مساعدة الاخرين.
2- الست زى ما انت بتقول مش شحاتة، لكنها فى نفس الوقت كانت عايزة توصيلة ببلاش.
3- الحل الوسط هو ان انت- و زى ما انت بتقول- كنت بتتكلم فى التليفون و بالتالى غالبا راكن فى مكانك شوية و بالتالى كان ممكن تقولها كده- و تعرض عليها انها تستنى جنبك لغاية متوقف لها تاكسى. و بكده تكون عرضت تساعدها لكن بغير الطريقة المباشرة اللى هى كانت عايزاها.... و بكده هتحصل عدة احتمالات:
أ. تكون هى نصابة و عايزين يعملوا معاك زى ما حصل فى القصة التانية... و بعرضك موضوع التاكسى تكون فوتت عليهم الفرصة لسرقتك....
ب. تكون هى فعلا ست محترمة و تقدر تدفع اجرة التاكسى و بالتالى هتشكرك و تمشى و تقولك انا هوقف تاكسى.
ج. تكون هى ست محترمة برضه لكنها متقدرش على اجرة التاكسى و بالتالى اما هتتكسف و تقرر تكمل مشى- و ساعتها انت هتكون عملت اللى عليك و حاولت تساعده- و اما هتقبل عرضك و ساعتها هتكون ساعدتها- بس مش بالطريقة المباشرة اللى هى كانت عايزاها و اللى ممكن تسبب لك انت و مراتك قلق او خناق فيما بعد

**bmya** · 05-06-2011 03:30 PM

لا طبعا حضرتك غلطان انا بقول كده وللاسف
والمفروض تسمع كلام مراتك لو حضرتك مش خايف على نفسك يبقى علشان خاطر مراتك كفايه انها اكيد كانت مرعوبه وخايفه

لكن لو حضرتك لوحدك بقه او معاك واحد صحبيك راجل يعني ساعتها ممكن تتصرف زي متصرفت
بس نصيحه لوجه الله بلاش تعمل كده تاني وانت معاك المدام
وربنا يعدي الفتره دي على خيييييييييير يارب

-

-

الموضوع: الواحد يبقى شهم و طيب ولا يتقتل و لا يتسرق مش عارف ! حتعملوا ايه في الموقف ده ؟

LinkBack

أدوات الموضوع

عرض

-

-

-

المواضيع المتشابهه

يعنى لازم الواحد يبقى قليل الادب وبلطجى !!

الواحد مش عارف يعمل اة

الواحد مش عارف يعمل ايهههههههههههههههه

بالمناسبه!!! هو الواحد المفروض مرتبه يبقى كام عشان يتجوز؟؟؟؟؟؟؟؟؟؟؟؟؟؟؟؟؟؟

الواحد مش عارف يعمل ايه

الكلمات الدلالية لهذا الموضوع

المفضلات

المفضلات

ضوابط المشاركة