الموضوع: """ رجـــــــــــــــــــــــ ـــــــاء """"

السلام عليكم ورحمة اللّه وبركاتة
طبعاً الموضوع ال اخونا عاطف بيحكية ، بيعتبر نتيجة سوء رقابة الجودة فى المصنع وقلة الضمير من الدرجة الاولى.
علشان كدة الاسبيرنزا عربية أول ماتشتريها نتيجة المشاكل البتظهر فى بعض العربيات مع اول استخدام بتكرها وبتفكر ترجعها او تبيعها او تولع فيها.
ولاكن بعد ظبط الحاجات الرخمة والبتعكنن وبعد فترة قصيرة بتحبها وبترطبت بيها، لان الحاجات البتظهر مع العربية مع اول استخدام فى الغالب بتكون تافة وبسيطة بس طبعاً مع عربية زيرو بتكون كارثة.
وياريت يا استاذ/ عاطف تطمن صاحب حضرتك ، و تقنعة ان الحاجات الحصلت فى العربية بسيطة جداً وهتتحل وبعد كدة العربية هتكون ان شاء اللّه زى الفل، وهيتبسط بيها جداً - ومفيش داعى يعكنن على نفسة.
انا اول ما استلمت التيجو من معرض المعادى وبعد ما رخصت العربية ولميت العيال وامهم علشان افسحهم بالعربية وفى اول طلعة وعلى الكونيش خرطوم البنزين فك من تحت الشاسية لان المصنع مركبش الكلبس كويس لغاية ما يسمع صوت التكة، والبنزين كلة لانى كنت مفول التانك نزل على الارض.
ووقفت العربية وانهرت نفسياً غير الاحراج لغاية ما اخويا نزل تحت العربية وزق الكلبس بتاع الخرطوم لغاية ما اتقفل عدل.
وبعدها باسبوع العربية سخنت وكلمت الصيانة لقيت الكولية بتاع كوعة الرادياتير موش راكب والمية اتسربت.
وطبعاً لعنت ابو العربية وابو المصنع وابو الفتوح وحلفت لابيع العربية على الرغم ان معداش عليها معايا عشرة ايام ، وفعلاً كتبت الاعلان ونزلت علشان انزلة فى الوسيط . وانا فى الطريق استعبط نفسى ورجعت فى كلامى ورجعت بالعربية و اتفقت مع نفسى اديها فرصة تانية ، وفعلاً العربية بقالها معايا دلوقتى حوالى سنتين ونصف وموش فاكر انى رحت مركز الخدمة خلال الفترة دى (حوالى 30 الف كيلو) اكتر من اربع مرات لاجراء الصيانة العادية وكمان موش بانتظام.
طمن صديقك يا استاذ عاطف وخلية ميعكننش على نفسة ، ويا سيدى لما يحس بحاجة فى العربية موش مضبوطة يعمل نفسة موش واخد بالة.