الموضوع: تجربت شراء كاوتش من سمير بيومى اللى فى الدقى

الكاوتش عندى حالته كانت تعبت اوى بدأت ادور على كاوتش فى ظل الاسعار المرتفعة و لاقيت سمير بيومى اللى فى شارع التحرير بالدقى جمب جاد ارخص من السوق ب 50 جنيه الفرده طبعا معرفش المفاجأة فى توفيرى للمبلغ ده

فرحت و اشتريت منه 4 فرد كاوتش هانكوك كورى مقاس r13 155/65 و يادوب بعد يومين على الطريق السريع فردة منهم فرقعت روحت لاتنين بتوع كاوتش متخصصين علشان ماظلمش الراجل قلت يمكن مسمار او حاجة قالولى ده عيب صناعة و حرام نصلح فيها حاجة و رجعها احسن للبائع و قالولى ده ضعف من جمب الكاوتش و شرخ من الجمب

روحت و كان معايا الحاج و الحاجة ماحترمش اى حد و ان فيه ناس كبيره معايا و قعد يزعأ الأول و بعدين بدأ الناس تتلم عليا و هما قرايب فى بعض و لاقيت الايدين بدأت تطول و عاوزين يضربونى لولا ولاد الحلال بدأوا يخلصونى من ايديهم

و قالى مش حارجع الفرده و مش عاجبك روح للتوكيل بتاعها قولتله طيب ادينى فاتورة بيع او بيان قالى لأ علشان انا مش بطلع اى حاجة من المحل علشان الضرايب قولتله طيب اروح للتوكيل بأى صفة و انا مش معايا فاتورة بيع من المكان اللى اشتريت منه و تاريخ الشراء لها قالى هوة كده اذا كان عاجبك

مشيت و قولت :b4_611: حسبى الله و نعم الوكيل بس حابيت احكى الموضوع علشان باقى الاعضاء يستفيد منه و خصوصا احنا فى فترة كتير منا بيدور على الكاوتش الأرخص و المناسب للامكانيات

و شكرا

المهندس أحمد الحماحمى