الموضوع: الثبات ما ليه مثيل فى نفس الفئه

المشاركة الأصلية كتبت بواسطة amado318

الانوس على طريق العين السخنه 190 والملفات 170 وزى الفل عفشه سليمه وجنوط 14 طير بالانوس والصحراوى اسكندريه 185 والدائرى كارفور 190 اصل الطريق نازل وناعم شويه وعلى فكرة الرابع بيوصل معايا 185 والتالت 130 والتانى 85 والاول 50 وعادى جدااااااامش بتقول لا والحمد لله لسه راجع مع لوجان صحراوى والله بهدلته معايا وكان بيهدى فى الملفات وانا ولا الهوا

سلام عليكم , بصراحة يا باشا انا قد اكون غلطان بس حاسس ان الارقام اللي بتقولها فيها سنة مبالغة

المشاركة الأصلية كتبت بواسطة m_sallam

يا عام حرام عليك احنا عمالين نعيد و نزيد و نقول اتكلموا بعقل شوية و انت تقولى بتجيب على الرابع 185 حرام عليك و كمان بتقول انك بهدلت عربية لوجان و الراجل كان بيهدى فى الملفات و انت ولا الهواء انا عارف انك قصدك تقول العكس عمر ما الانوس تقدر تبهدل اللوجان
انت مش بتتكلم مع شوية عيال انت بتتكلم مع ناس كبار و فهمين و انا بكل امانة ركبت الانوس و التالت فيها اخره 70 و الرابع بيجيب 90 بالعافية و الخامس حاول متزودش عن 120 لأنك هتندم
اخر حاجة احب اقولهالك اننا بنتكلم ببراهين لو صورتلى العداد و انت جايب 190 و بتحرق على الأول 50 و التانى 85 و التالت 130 و الرابع 185 هديلك عربيتى هدية بجد والله لو الانوس بتعمل كدة يبقى العداد مخرف جامد ....

عذرا يا باشا حضرتك بتبالغ جدا جدا جدا , و ما ينفعش عشان نحلي حاجتنا نبخس غيرها
تالت ايه اللي في اللانوس اخره 70 ؟
70 دي بيبقى ال rpm على 3500 , يبقى اخره ازاي ؟
و الرابع على 90 بيبقى على 3000 و شوية برده , اخره ازاي بقى ؟
انا اقصى رقم جبته بتالت اللانوس كان حوالي 120 , و غيرت , ما اعرفش بقى بتفصل على كام بس مش هاتفصل بعدها بكتير
وا جايب بالرابع اقصى رقم كان 160 و بعدها نقلت , و برده مش عارف هايوصل 165 او 170 قبل ما يفصل ولا لأ

و للعلم عربيتي موديل 99 يعني موتورها مش اللي هو اوي يعني , و ستوك مافيهاش اي اضافة

المشاركة الأصلية كتبت بواسطة m_sallam

يا جماعة بالله عليكم نتكلم بموضوعية شوية و انا شايف ان اللوجان افضل من الانوس بمليون مرة ... أفضل بس مش مليون
1- اللوجان فرنساوى تقفيل مغربى انما الانوس كورى تقفيل كورى يعنى اللوجان تقفيلها احسن -- على فكرة اللانوس كوري تقفيل مصري
2- اللوجان اوسع و شنطتها اكبر و ينام فيها فيل 510 لتر ما شاء الله انما الانوس 310 لتر يعنى اللوجان شنطتها اكبر --- تمام جدا دي
3- تكيف اللوجان ثلاجة و اقوى من تكيف الانوس --- ما اعتقدش
4- اللوجان فيها اير باج و حاصلة على 3 نجوم من 5 نجوم فى اختبار السلامة الأوروبى مستوى الأمان فى اللوجان افضل --- تمام جدا دي
5- صالون اللوجان يتميز بالبساطة مع مواد محترمة عكس الانوس --- صالون فقير مع مواد ............اللوجان افضل من حيث خامات الصالون --- لو الكلام على الشيفروليه لانوس فمش هافتي , لكن على الدايو , فخامات التابلوه احسن من خامات تابلوه اللوجان اللي بجد اسوأ ما فيها
6- من حيث الأبشنز اللوجان تكسب لأن فيها اير باج و كمبيوتر رحلات اضافة الى الكمليات الأخرى --- دي تمام
7- اللوجان مصفحة انما الانوس مش مصفحة --- لو تقصد من تحت صح , لو من الاجناب فاللانوس فيها قضبان حماية
8- اللوجان اعلى خصوصا فى شوارع مصر اللى مليانة نقر و مطبات فى كل حتة و هذا العلو مش مأثر على ثبات العربية انا بغرز بيها على 140 و مبتقولش لأ ----- ما اعرفش ايه نظام غرز اللوجان , بس اعلى عن الأرض طبعا
9- من حيث التسارع اللوجان تكسب من صفر - 100 خلال 11.5 ثانية
لو الرقم ده صحيح يبقى تسارع اللوجان افضل , بس انا أشك بصراحة لأن بالرقم ده كانت تسحب قصاد السيراتو مثلا و ده مش بيحصل

و انا بأكد ان فى ناس كتير جدااااا جابت باللوجان 180 و الصورة موجودة و 190 و كمان الفيديو موجدود
اللانوس كمان بتجيب الأرقام دي, على فكرة فرق الموتور 4 حصان بس :)

انما الأستاذ الفاضل اللى بيقول انه بهدل اللوجان فى الملفات و جاب 185 على الرابع انا معرفش جاب الكلام دة منين شكلو كدة ............ اقسم بالله العلى العظيم الانوس على 140 و انت طالع بتدبدب و بتعوم و بتبقى حالتها ............*

ممكن ابقى معاك في موضوع بتعوم لأني سمعت ان مساعدين الشيفروليه لانوس سيئين جدا, و ان كانت بطقم مساعدين مونرو ب700 جنيه الثبات بيبقى حاجة تانية خالص , انا كنت بابقى ماشي على 160 على مصر اسكندرية و زوجتي مش حاسسة بحاجة خالص, مش عارف كمان ايه موضوع الدبدبة ده

10- فرامل اللوجان اقوى من فرامل الانوس- تمام صح , مع العلم ان في حال تعديل فرامل اللانوس المذكور في قسم دايو هنا (بيكلف حوالي ألف جنيه اغلبهم طنابير و تيل جديد) + جنوط 14 بيبقى فرامل اللانوس احسن
11- صاج اللوجان اقوى من صاج الانوس و قفلة الأبواب محترمة عن الانوس ------ دي ما اعرفهاش فمش هافتي فيها
12- اسم رينو افضل من اسم دايو او شفرليه يعنى يكفينى فخرا و شرفا انى راكب رينو ..--------- اسم رينو ولا اسم داتشيا ؟؟؟ :))))))))), على فكرة لو هاتقارن اسم داتشيا باسم دايو هاتلاقي دايو افضل (الأوبترا و الكروز عربيات دايو اصلا, داتشيا عملت ايه في الفئة دي ؟ ) , ولو هاتقارن اسم رينو باسم شيفروليه هاتلاقي شيفروليه افضل برده (قارن الميجان3 مثلا بعربية شيفروليه امريكي , و شوف :) ) , فسيبك من موضوع الاسم ده خااااااااااااالص :)
13- اللوجان معتمدة اكثر--- لو تقصد اعتمادية اكتر فدي لسه ما بانتش , و عموما اللانوس كعربية اثبتت اعتماديتها من زماااااااااااااااااااااان
14- توكيل اللوجان افضل من توكيل الانوس و يعد توكيل رينو افضل توكيل فى مصر ------ كلام سليم , لكن طبعا على حساب انه حراااااااااااااااااق
15- عفشة اللوجان انعم من عافشة الانوس ----------- تعاملها مع المطبات افضل , مش عارف يعني ايه انعم في تعريفك بصراحة
16- موتور اللوجان اقوى من موتور الانوس --------- هي مش دي نمرة 9 ؟؟؟؟؟
17- اللوجان اكثر ثبات من الانوس و اسأل عم بيومى بتاع البطاطة هيقولك نفس الكلام --------- برده نمرة 9 , و عقبت عليها هناك , لماذا تكرر نفسك يا رجل ؟

و الدليل على انها سيارة ناجحة انها انتشرت و اكتسحت السوق خلال سنتين فقط و كمان خلصت من السوق و الدفعة الأتحاد اوروبى خلصت بمجرد الأعلان عنها و بعدين توكيل رينو و وكلاء eim مش هينزلوا عربية غير و هما واثقين انها هتحقق نجاح و مش هتبوظ سمعتهم و بالفعل العربية حققت نجاح و الكل اجمع عل انها سيارة محترمة سواء اللى معاه لوجان و اللى مش معاه لوجان ..


جمييييييييييل , هو ده بقى بيت القصيد , عشان تبقى عربية ناجحة لا يلزمها انها تبقى ممتازة و الباقي زبالة, يلزمها انها يبقى فيها عناصر جذب تميزها عن الباقيين , و اللوجان معاها العناصر دي , منها الاتساع الداخلي اللي نسيت تذكره :)))))) و منها اسم رينو ( بالمناسبة اللانوس لو بتنزل في مصر بإسم شيفروليه من الأول ما كانش حد قال دي دايو خاااااااالص :)) ) و منها فئاتها الكتير , و منها ان منصور عمليا بيبالغ في سعر اللانوس و غبور بيبالغ في سعر الفيرنا , و منها انها عربية مصممة حديثا حتى لو كانت مبنية على تكنولوجيا قديمة , بعكس اللانوس اللي متصممة في اواخر التسعينات , و الفيرنا اللي في منتصف الالفينات, لكن برده نقول تاني , مش لازم يبقوا زبالة عشان هي تنجح لأنهم واقعيا عربيتين ناجحين رغم عيوبهم و الا كان زمانهم اندثروا الاتنين , او على الأقل سقطوا تماما في مواجهة المد الصيني مثلا

بالمناسبة انا عايزك تفكر لو مقارنة اللوجان دي مع النوبيرا مثلا , بفرض ان النوبيرا بتنتج لحد دلوقت و كان هايبقى سعرها نفس سعر اللوجان فول اوبشن , كنت هاتلاقي الوضع اختلف جدا , ده مجرد مثال عشان بس يثبت لك ان الموضوع مش موضوع اسم

قطع الغيار غالية فى التوكيل علشان فرنساوى اصلى و من قلب التوكيل نفسه و عليها ضمان لمدة عام يعنى انت لو قارنت بين قطع غيار اللوجان الفرنساوى الأصلى و من قلب التوكيل و قطع غيار الانوس الكورى الأصلى و من قلب التوكيل هتلاقيها متقاربة مع ان قطع غيار اللوجان فرنساوى و قطع غيار الانوس كورى يعنى قطع غيار اللوجان معمرة اكثر ..
دي تمام , بس برده قطع غيار اللوجان مبالغ فيها اوي في بعض القطع للأسف

و بعدين العربية نزلها قطع غيار و اعضاء اللوجان المحترمين قالوا على اسماء المحلات فى مختلف المحافظات و قالوا على ارقام تليفونات هذه المحلات و العربية نزلها قطع غيار استعمال خارج فى السويس و كل يوم اعضاء اللوجان بيكتشفوا اماكن جديدة و بعدين احنا مكبرين دماغنا خلال فترة الضمان ( 3 سنوات او 100 الف كيلو ) و بعد كدة هنلاقى قطع الغيار مرطرطة و ربنا يهدى لوجى و ميجعلناش نحتاج لقطع غيار ..

فى النهاية اسف على الأطالة و مش عاوز حد يزعل منى لأن دى وجهة نظرى و دة رأيى و بكل صراحة و بدون انحياز و ربنا يعلم و لو اتفقت الأراء لبارت السلع و اختلاف الراى لايفسد للود قضية و اسف على الأنفعال الزائد بس العضو الفاضل amado318 استفزنى و محسسنى انه بيتكلم مع شوية عيال و انا عارف انى مليش حق انى احكم على وجهة نظره بس لما واحد يقولك انا جبت 50 على الأول و 85 على التانى و 130 على التالت و 185 على الرابع و ميسكتش على كدة و اللى خلانى اكتب الكلام دة انه بيحلف بالله هو ميعرفش ان حلفان ربنا بيتهزلوا سبع سموات .....

هههههههههههههههه هو انت محموق شويتين , بس انا عن نفسي باجيب 50 بالأولاني و 80 بالتاني و 120 بالتالت و 160 بالرابع و ما جربتش ازود عن كده و عربيتي موديل 99 , و اللوجان بالتأكيد تجيب ارقام زي كده او اكتر حاجة بسيطة

المشاركة الأصلية كتبت بواسطة ahmed_mido1889

قابلني وتعالي جرب العربيه وجهز عقد عربيتك

مع ان الرشاشات بتسيل الاول 40/45

التاني 80/90

التالت 120/130

الرابع 160

الخامس معاك لحد اخره

والعداد سليم

وشوف هتقيس السرعه ازاي علشان متقولش العداد بيخرف


الرد في الاقتباس وده بيعبر عن وجه نظري مع احترام رايك


+11111

استاذ ورئيس قسم

ههههههههههههههههههههههههه ههههههههههههههههههههههههه هههه
راشق انت يا مان , بالنص بقى, انا ارقامي زيك تقريبا

المشاركة الأصلية كتبت بواسطة mmamdouh

ما اشبة اليوم بالبارحة....

نفس الحوار بيتكرر كل 3 اسابيع او شهر...

حد يتكلم عن عربية من العربيات ذات الجماهيرية و يجيب سيرة عربية تانية من نفس الفئة...

واحد من ملاك العربية التانية يقوم بالرد و "الدفاع" عن عربيتة لصد "الهجوم"

يقوم باقى محبى العربية الاولى بالتجمع "لسحق" العضو الدخيل اللى بيجيب سيرة العربية الاولى...

و بعد العديد من الصفحات تضطر الادارة الى غلق الموضوع و ايقاف نص الاعضاء اللى مشلركة فى الموضوع لان الموضوع بقى ساحة شتيمة و شخصنة...

يا جدعان الحاجات اللى بتتكلموا فيها دى قتلت بحثا قبل كدة... سواء فى قسم الدايو او قسم اللوجان او قسم المقارنات

كل عربية من الاتنين ليها مميزات واضحة و صريحة ولا يمكن الجدل فيها... و كل عربية ليها عيوب واضحة و صريحة ولا يمكن الجدل فيها

فى النهاية كل واحد بيختار العربية الانسب ليه بناء على قائمة الميزات و العيوب لكل عربية

الظريف فى الموضوع دة بجد هو ان نفس الحاجات بتكرر من موضوع للتانى... يعنى اول ما تجيب سيرة اللوجان تلاقى مباشرتا ظهر موضوع "الاوروبى" و لوجو "رينو"... فى المقابل تلاقى ظهر "الاوبل استرا" و "جنرال موتورز" عند الدايو

و لما تيجى سيرة الثبات فى اللوجان تلاقى قطع الغيار ظهرت فى الدايو... و لما تيجى سيرة الوسع فى اللوجان تلاقى سعر اعادة البيع فى اللانوس...

تحس فى الاخر انها معركة و كل فريق بيطلع السلاح القوى بتاعة و الفريق التانى بيرد علية بالسلاح القوى اللى عندة... طيب فى الاخر حنوصل الى ايه؟؟؟... لا بتوع اللوجان حيبيعوا عربياتهم و يركبوا لانوس... و لا بتوع اللانوس حيبيعوا اللانوس و يجيبوا لوجان.... مع العلم ان دة لو حصل مفيش اى حد من الناس اللى بتقطع فى بعض حيستفيد حاجة... و لا حيخسر حاجة

كل اللى حيحصل ان الناس حتزعل من بعض و تشيل من بعض و تتشحن من بعض... و مع احترامى كل دة بيحصل لاسباب "هايفة"... العرية فى الاخر حتة حديد و بكرة تتباع و يجى غيرها... لكن الناس هى اللى حتفضل مع بعض

mmamdouh