الموضوع: معلومات هامة .. عن زرار الزجاج الكهرباء الاتوماتيك للسائق فقط

كان عندى مشكلة فى عربيتى عويصة فى حاجة فى الماتور , وروحت عشان يعملوها
المهم فكوا حاجات فى العربية كتير عشان يوصلوا لحل المشكلةاللى عندى والصوت اللى مجننى , وقريب حبقا اقولكم على المشكلة دى وتفاصيلها

المهم

كان من ضمن الحاجات اللى فكوها عندى فى العربية فرش الباب

بعد لما فكوا فرش الباب جيت وانا مروح انزل الزجاج الكهرباء بتاع السائق .. لقيته نزل اتوماتيك عادى لوحده ومشيت

ولما جيت اركن مفروض الزجاج الكهرباء اللى جنبى لما برفعه اتوماتيك بنظام تاكتين , بيرفع على طول لوحده
وده سيستم التيدا , وتقريبا الصنى كمان على ما اعتقد

ما اشتغلش .. اخ .. مشكلة .. اعمل ايه طيب .. اتصلت بالمهندس .. قالى بسيطة .. لما تكون فى العربية فى مرة ابقا كلمنى واعملهولك بالتليفون لان دى برمجة .. وكنت روحت ومكنتش جنب العربية

وطبعا ولا اتنرفزت ولا حاجة .. وحتى من قبل ما اكلمه .. وكلمته بهدوء .. لانى عندى يقين انى فى الضمان .. وان التوكيل مسئول عن اى خطا بيحدث فى العربية من عندهم .. وكل حاجة بتتحل بالعقل .. وبعرف اخد حقى بالذوق وبالعقل بدون اى تداخلات ومعارف والله ,, بخلى المعارف فى الاخر ولو فى نرفزة بخليها فى الاخر بردوا

المهم كلمته تانى وكنت فى العربية

واليكم الحل .. عشان الكل يستفيد

قالى :

- افتح الكونتكت بتاع العربية ونزل الزجاج .. وعملت كدا
- قالى ارفع الزجاج تانى للاخر وافضل دايس حوالى 3 ثوانى بالظبط .. يعنى تكون دايس على الزرار بصوباعك ومثبت صوباعك زى ما قولت حوالى 3 ثوانى

وقالى جرب :

وفعلا بجرب لقيته بيشتغل وكله تمام سواء صعود اتوماتيك او نزول

معلومة زيادة للعلم ايضا

احيانا لما الزرار الكهرباء بتاع السائق الاتوماتيك لنزول الزجاج او صعوده , بتسمعوا صوت تكتين عند نزوله او طلوعه .. ده طبيعى .. لان الزرار ده اتوماتيك .. انت بتدوس عليه فبياخد الامر وبيتعامل .. ولما بينفذ المطلوب منه وينزل الزجاج او يطلعه بيفصل .. فده صوت الفصل بتاعه

بس كدا

فحبيت انقلكم تجربتى عشان تستفادوا من الملعومة البسيطة دى .. عشان لو واجهت اى عضو فى اى يوم من الايام يعرف يتصرف معاها وميقلقش

تحياتى للجميع

المشاركة الأصلية كتبت بواسطة ahmed_su

تمام يا باشا الله ينور

مشكور جهدك لافادة الجميع

على فكرة عندى كده فى السيراتو - ومرة واحدة لقيت الزجاج مش

عاوز يشتغل اتوماتيك يعنى لازم ادوس حتى تمام صعود او نزول الزجاج

دورت على حل ولقيتها فى منتدى اجنبى

تسلم تقديرك يا بوحميد ومنورنا دايما

منتدى نايل موتورز فيه كل الخير كله

المشاركة الأصلية كتبت بواسطة yoko

تمام لكن في الفيات مختلف أنا عندي برفع وهو يفصل ارفع تاني هو يفصل حوالي ٤ مرات لحد ما الإزاز يقفل للأخر وخلاص يرجع يشتغل أوتو

الفيات مختلفة دايما يا بوحميد .. وربنا يباركلك فيها ويكفيك شرها

المشاركة الأصلية كتبت بواسطة ahmed_hanafi

يا باشا انت دايما مدلعنا كدة
يا رب منتحرمش منك وتكون دايما بخير
ومتنساش ترد عليا في موضوع المقابلة علشان اعرف اجي ولا لا

ياباشا تحت امركم .. احنا لينا بركة غيركم

ممكن حضرتك تكلمنى عشان احكى لحضرتك على موضوع المقابلة

المشاركة الأصلية كتبت بواسطة أحمد علاء

معلومات قيمة وتجربه ممتازة
ربنا يبارك فيك يا أبو حميد ودائما تأتي بالجديد المفيد

الله يبارك فيك يا بوحميد , وتسلم على تقديرك الغالى , وعايزين نشوفك قريب باذن الله , ومتغبش علينا فى قسم نيسان

المشاركة الأصلية كتبت بواسطة م/محمد

ياريت تطمنا يا احمد علي المشكله الرئيسيه اللي عندك
ومتشكرين علي المعلومه
وانا متاكد ان بعد كام يوم هتلاقي واحد عامل موضوع بيسال يعمل ايه علشان الاتوماتيك بتاع الازاز مش شغال
ياريت تحطها مع المواضيع المثبته لسهوله الرجوع اليها

حنعمل ايه قدرنا نستحمل الاعضاء اللى مش بتقرا ومش بتدور فى القسم
والله يا محمد حقيقى انا استفدت من القسم وموضوعاته بطريقة رهيبة
واتمنى الاعضاء تستفاد من الموضوعات الممتازة اللى عندنا اللى كش موجودة فى اى مكان تانى
وحبعت للمشرف باذن الله عشان يضيفه فى الموضوعات المثبتة

المشاركة الأصلية كتبت بواسطة samsong

اولا كالعاده شكرا علي المعلومه الجميله
ثانيا وهي الاهم اخبار العربيه ايه ان شاء الله يكون اتحلت زي ماانت عايز وخصوصا انك انتظرت مده كبيره .
شكرا دائما

الله يخليك لينا يا كباتن سامى .. وتحت امرك وامر الاعضاء .. موضوع وتجربة مفيدة حبيت انقلها للناس عشان يستفادوا منها
ومشكلة عربيتى اتحلت وحبقا اعمل بيها موضوع منفصل

المشاركة الأصلية كتبت بواسطة bassamhafez

الله ينور بس مش ده المهم

المهم ايه لافلام اللي حصلت في عربيتك دي طمنا

فكو ايه وعملوا ايه وليه ده كله

ولا افلام ولا حاجة هى قصة طويلة , واستفدت فيها خبرة تمام , وكمان استفدت من وراها فى حاجات فى عربيتى
والمشكلة كانت لازم تطول , بس اتحلت الحمد لله واتعرف العيب منين

وقريب حعملكم موضوع بيها

المشاركة الأصلية كتبت بواسطة sedyrohy

الله ينور عليك بجد حاجه جميله قوي

شكرا على الافاده الجميله و الغنيه

و ده اكيد سيستم كل العربيات و الله اعلم

انا عندي بقى زرار لوك الازجاج اتكستر منه الزرجينه الي يخليه اما تضغط عليه ما يرجعش تاني

دلوقتي تيجي تضغط عليه بينطر تاني ايه العمل

مش عارف يا محمد ,, لما تروح تعمل الصيانة ابقا قولهم عليها .. وان شاء الله تتحل على خير
وابقى طمنا عملت ايه