السلام عليكم
دى أول مشاركة ليا يا جماعة و أنا ناوى أشترى عربية قريب إن شاءالله و محتاج رايكم و ياريت تقولولى سبب الاختيار من حيث مميزات وعيوب كل عربية :
1- رينو ميجان
2- لانسر الشكل الجديد
عرض للطباعة
السلام عليكم
دى أول مشاركة ليا يا جماعة و أنا ناوى أشترى عربية قريب إن شاءالله و محتاج رايكم و ياريت تقولولى سبب الاختيار من حيث مميزات وعيوب كل عربية :
1- رينو ميجان
2- لانسر الشكل الجديد
رينو ميجان
برستيج عالى
ثبات ممتاز
محرك اقوى
فخامة داخلية ممتازة
اوسع من الداخل
5 نجوم فى الأمان
كماليات عالية
لو تقدر تجيب البانوراما يبقى 100 100
شكرا على ردك المحترم أستاذ فهد
عمرك اطول من عمرى
انا كنت لسه بفكر فى المقارنه دى
انا عاجبنى اوى الشكلين و لكن شكل الانسر ارجحه لانه لسه جديد غير الميجان اللى غالبا هايتغير السنه الجايه
و طبعا برضه موتور اللانسر 1500 سىسى انا شايف نه عيب برضه و دى نقطه للميجان
قطع غيار اللانسر فى اى حته الميجان لا و دى نقطه للانسر
و طبعا سعر البيع للانسر اعلى بكتييييييير
انما انا مش عارف اللمكانيات و الاوبشن بتاعت الاتنين ياريت حد يقولنا لك الاوبشن بتاعت الاتنين
والله أنا محتار بس بميل اكتر للميجان كأستيل و برستيج
انا معاك فى الاستيل بس انما لما تيجى تبيعها ب 85 الف و لا حاجه صعبه برده
بصراحة ممكن يكون سعر اعادة البيع للانسر أعلى بس انا مش ناوى أبيع فى المدى القريب.. يا ريت حد عنده فكرة يقولنا فرق الأوبشن و أى التابلوهين أحلى
موضوع الشكل بالنسبه للميجان 2 هايتغير 2009 ولا لأ لسه لغاية دلوقتي مش محسوم اعتقد وبالتالي صعب يكون تقييمنا للجزء ده دقيق كفايه لكن من باب الاحتياط ممكن ناخد بيه طبعا.
قطع غيار الميجان دلوقتي مش نادره ابدا موجوده في التوكيل وموجوده في محلات قطع الغيار بدون اي ندره او مشاكل ......السؤال هيكون طيب افرض محتاجين نجيب قطع الغيار من خارج التوكيل ونصلح بره هانقول ان الوكيل عن تجربة ملاكي الميجان كلهم او معظمهم هو اكثر مكان مسؤول ويقدر يعمل صيانه للعربيه بحرفيه مع العلم ان اسعاره غير مبالغ فيها بالمره وده عن تجربيتي كا أحد ملاك الميجان 2 الحمد لله .اقتباس:
قطع غيار اللانسر فى اى حته الميجان لا و دى نقطه للانسر
الكماليات بالنسبه لي اللانسر مش عارفها الحقيقه لكن بالنسبه للميجان هاتكون كالآتي ان شاء الله
* باور ستيرنج كهربائى.
* تكييف عادى
* سنترلوك و تقوم السيارة بغلق نفسها فى حالة تركها مفتوحها لمدة 10 ثوان و فى حالة زيادة سرعة السيارة عن 20 كم .
* زجاج كهربائى لـ4 أبواب يفتح و يغلق بالمسة واحدة.
* كارت لتشغيل وفتح السيارة بدلا من الكارت.
* 6 وساءد هوائية.
* ABS و EBD
* ناقل حركة مانيوال و أتوماتيك (سيتبترونيك)
* مرايا كهرباء ضم.
* سينسور مساحات زجاج .
* سيينسور نور .
* ستائر جانبية و خلفية.
* جنوط عادية 15"
*فرش عادى.
* أماكن تخزين كثيرة.
* التحكم فى الـCD من عجلة القيادة
* التحكم فى أرتفاع لمض الكشاف الامامى
* شاشة معلومات توضح (درجة الحرارة - الـ CD و الراديو )
* كميبوتر معلومات يوضح الأتى:
* متوسط إستهلاك البنزين.
* إجمالى إستهلاك البنزين.
* متوسط السرعة .
* عداد رحلات .
* أعطال السيارة.
* ميعاد الصيانة.
* توضيح فى الشاشة حالة فتح الأبواب أو الشنطة مع الصوت.
دي تقريباً كماليات الميجان 2 مع بعض الاختلافات البسيطه لئنهم مقسمين لي 3 مستويات الكماليات اللي كاتبها لحضراتكم دي المستوى الأول منها والباقي بيكون فتحة السقف او البانوراما والفرش الجلد ومشغل MP3 وحاجات كده .
نقطه أخيره طبعا هي سعر اعادة البيع هاتكون عامل مشكله وهي فعلاً في الميجان قليل شويه وده مش عيب في العربيه ابداً لكن لكثير من الأسباب وأرجو من حضراتكم مراجعة اللينك ده فيه مشكله اعادة البيع للميجان 2 بالتفصيل المناسب ان شاء الله .
http://www.nilemotors.net/Nile/showthread.php?t=18617
ارجوا ان كلامي يكون فيه افاده لحضراتكم وشكراً.
ً
استاذ رامى طنطاوى شكرا على ردك و فعلا أوبشن الميجان ممتاز ربنا يباركلك فيها
العفو يا فندم على ايه بس ......... ربنا يبارك في حضرتك وانا تحت امرك في اي استفسار ان شاء الله.
دى مواصفات اللانسر EX
Lancer EX MIVEC 1500 M/T , A/T GLX
تكيف هواء مانيوال - باور - سنتر لوك بالريموت - ايمويلزر (مسوجرة الدريكسون ) - زجاج كهربة - مريات كهربة - تعليق رياضى - ABS+ EBD - كاوتش مقاس 16 - اكياس هوائية للسائق - كاسيت وراديو +4سماعات+اريال سقف
Lancer EX MIVEC 1500 M/T , A/T GLS
تكيف هواء اوتوماتيك - باور - سنتر لوك بالريموت - ايمويلزر (مسوجرة الدريكسون ) - زجاج كهربة - مريات كهربة - تعليق رياضى - ABS+ EBD - كاوتش مقاس 16 - اكياس هوائية للسائق - كاسيت وراديو +4سماعات+اريال سقف - غطاء للمحرك - نظام لعزل الصوت داخل السيارة - جهاز انذار
Lancer EX MIVEC 1500 A/T GLS Sports Package
تكيف هواء اوتوماتيك - باور - سنتر لوك بالريموت - ايمويلزر (مسوجرة الدريكسون ) - زجاج كهربة - مريات كهربة - تعليق رياضى - ABS+ EBD - كاوتش مقاس 16 - 2اكياس هوائية للسائق و الراكب الامامى - كاسيت وراديو+CD+ سماعات6+اريال سقف - غطاء للمحرك - نظام لعزل الصوت داخل السيارة - جهاز انذار - اسبويلر - فوانيس شبورة -زجاج غامق مضاد للحرارة والاشعة الضارة - فرش جلد - فتحة سقف -تشغبل السيارة بدون المفتاح
شكراً شاركى باشا وياريت تقولنا رأيك ايهما أفضل ؟ ورأيك فى تابلوة الأثنين ؟
دى صور تابلوه الميجان
http://www3.0zz0.com/2008/04/27/18/484287054.jpg
دى صور تابلوه اللانسر
http://www3.0zz0.com/2008/04/27/18/186363880.jpg
بالنسبة لرأى تابلوه الميجان احلى
لكن بالنسبة لرأى فى اللانسر EX بصراحة ماقدرش أحكم عليها لإنى ماسوقتهاش لكن بالنسبة للميجان عربية ممتازة و فيها كل إللى إنت عيزه بمبلغ غير مبالغ فيه + توكيل ممتاز و بيفهم كويس فى العربية ممكن تراجع المواضيع الموجودة فى ساحة رينو
اداء=لانسر>ميجان
عفشة =لانسر>ميجان
ثبات =ميجان> لانسر
قوة تحمل=لانسر>ميجان
وسع داخلى=ميجان> لانسر
اعطال=لانسر>ميجان
قطع غيار=لانسر>ميجان
خدمة=ميجان> لانسر
سعر إعادة بيع=لانسر>ميجان
شكل عصرى=لانسر>ميجان
شكل متميز=ميجان> لانسر
خامات وتجهيزات=ميجان> لانسر
م/ عمرو ، تحياتى... انا متابع أرائك ومعجب بتحليلاتك. لو لك الأختيار أيهما تختار ؟
driving dynamics + reliability = لانسر.
luxury + better quality materials = ميجان.
بص يا msala7
فى العربيات و خصوصاً اللى فى الفئة السعرية دى ..مفيش حاجة اسمها عربية احسن من التانية
إنما هى معادلة بين احتياجاتك وإلتزاماتك ناحية العربية و بين العربية اللى بتختارها
انا هاقولك بصراحة
لو انا عايز برستيج و مشاويرى دايماً فى سفريات و من النوع اللى بلتزم بمواعيد صيانة و براعى العربية ومش فى دماغى بيع على الاقل خمس سنين ومعايا ناس بيحبوا يركبوا مستريحين و مش من النوع اللى بقرص على العربية و بعملها إجهادات من غير معنى .... هختار طبعاً الميجان
لو انا من النوع الرياضى اللى بحب امشى براحتى بالعربية و مش ملتزم مع حد معين فى صيانتها ويمكن ازهق منها فى اى وقت لو زغللت عينى عربية نزلت جديد انى ابيعها ..... هختار اللانسر
عمرو باشا,
انا بحترم اراء حضرتك جدا
لكن انا بختلف معاك فى نقطة
1- العفشة: عفشة الميجان لا يعلى عليها, ناعمة جدا, انا سقت موديلين من العربية دى, مو 2005 و 2007, اما اللانسر ال ex, قعدت فيها فترة صغيرة بتاعت ربع ساعة, لكن الفرق لصالح عفشة الميجان
2- قطع الغيار: الوضع الطبيعى اننا بنسمع ان قطع غيار الميجان غالية, لكن التزكيل ان نزل مؤخرا قائمة ببعض قطع الغيار فى الجرنال, و كانت قريبة جدا للاسعار العادية, اما اللانسر ال ex فانا عرفت بعض اسعار قطع غيارها من الوكيل و كانت مش رخيصة, قريبة و فى حاجات اغلى من الميجان
معاك حق طبعاً يا معاذ فى نعومة العفشة للميجان
بس انا لما بكتب كلمة (عفشة ) بس لازم احط التقييم العام لكل مايخصها من نقاط
يعنى( قدرة مناورة-تحمل مطبات-تكاليف تشغيل-مناسبتها لوزن العربية -اداء المساعدين فى الاجهادات-....)
برضو معاك حق طبعاًاقتباس:
2- قطع الغيار: الوضع الطبيعى اننا بنسمع ان قطع غيار الميجان غالية, لكن التزكيل ان نزل مؤخرا قائمة ببعض قطع الغيار فى الجرنال, و كانت قريبة جدا للاسعار العادية, اما اللانسر ال ex فانا عرفت بعض اسعار قطع غيارها من الوكيل و كانت مش رخيصة, قريبة و فى حاجات اغلى من الميجان
لكن شوف مدى تعرضك لعملية كبيرة قريب هنا ... و نفس العملية الكبيرة ممكن تتعرضلها هناك ولا لأ
عاوز اعرفكم ان تكييف اللانسر احسن بكتير جدا من تكييف الميجان و حكايه ان الرفارف الفيبر فى الميجان اكيد لو لسه محلوش المشكله دة فى الميجان فهتبقى ميزة قويه لللانسر واكيد استهلاك البنزين فى صالح اللانسر وفى التابلوة فى اللانسرالشاشه lcd يتقولك البنزين اللى فيها يمشيك اد ايه وميعاد الصيانه ومتوسط استهلاك البنزين فى الرحله زى الميجان مش اقل منها فى النقطة وكمان باور اللانسر كهرباء زى الميجان و فيها تابلوة ابانوس مش موجود فى الميجان انا حبيت اوضح
رامى باشا
1- رفارف الفيبر فى الميجان ميزة مش عيب و مش عارف على أساس إيه حضرتك بتقول عليها عيب
2- حضرتك الميجان بتزيد بوجود كمبيوتر أعطال و دا مش موجود فى اللانسر .
3-الأبنوس إللى بينزل فى اللانسر موجود مثيله فى الميجان و أحلى إللى هو الكروم الفضى
الرفارف الفيبر ممكن تبقى ميزة برة مصر انما هنا عاوزين لو العربيه اتخبطت يروحوا للسمكرى و يمعجنوا وكدة انما الفيبر مش هياكل مع المصريين وهما مستحملين الاكصدامات الفيبر بالعافية و بالنسبه للابانوس انا ركبت عربيتين ميجان واحدة اوتو 2005 والتانيه مانيوال 2007 مكنش فيهم ابانوس
بالنسبة للرفارف دى رأى حضرتك و أنا أحترمه لكن هو معروف إنه أأمن و أفضل من الصاج
بالنسبة للأبانوس الميجان فيها كروم فضى مش أبانوسو دا بيبقى أشيك من الأبانوس
هى اللانسر احسن فى حاجات زى :
التكييف احسن
التقفيل دة يابانى بالكامل انما الميجان تقفيل تركى
مصاريف التشغيل احسن اللانسر
اللانسر رياضيه تنفع للشباب خصوصا سبورت
________________________________________
الميجان احسن فى حاجات زى:
الفخامة
الثبات
الوسع
كماليات اكتر منها مثبت السرعة
افضل فى الفئة العمرية فوق 40
لانسر افضل بمراحل اذا كنت بتدور حضرتك علي راحة البال
الميجان شكل وبرستيج فقط لاغير دا من وجهة نظي والشكل هيتغير قريب وقلق رهيب كفاية الكلام الي عليها
ناس قرابيبي جايبين ميجان 2005 بقالها 3سنين ونص من يوم ما جت بيشتكوا من العفشة لان طريق
البلد بتاعنا كله مطبات ومن احسن ما يكون فانا شايف ان الميجان سيارة تنفع لاشياء معينه
مثلا رايح حضرتك اجتماع مهم كمنظر فقط
لكن الكماليات دي اشياء اخري انا بكلم هنا عن الاداء فقط طبعا العربية فيها كماليات رائعة
وطبعا اخنلاف الراي دا مفيد وانا عارف ان اصحاب الميجان هيزعلوا بس انا بقول دي وجهات نظر
والي انا شايفة وعشته مع الميجان اما اللانسر الشكل الجديد انا سمعت من واحد قريبنا فاتح محل
قطع غيار لانسر ان فيها مشاكل بس مشاكل اية مش عارف
شكرا
لو بتدور علي حاجة تريح بيها دماغك و شكلها ثوري جدا و اداءها حلو و سعر اعادة البيع عالي و عربية ليها شعبية كبيرة و قطع غيارها سعرها معقول و اعتماديتها عالية الكلام ده كله=lancer
لو عايز بقي فخامة-تميز-ثبات اعلي بكتييييييييييييييير-عفشة اشد-مصفحة-قدراتك المالية تأهلك انك تستحمل غلاء قطع الغيار (صاحبي قالي ان رفرف الميجان ب 1500 جنيه )-موتور الاعتمادية بتاعته اعلي من لانسر-تتحمل احتمال تغيير الشكل قريب و يبقي اسمك معاك موديل قديم و هم بالفعل غيروا في شكلها شوية-تتحمل اعادة البيع الخسرانة بكل المقاييس=megane بالفعل الميجان ممتازة و لانسر ممتازة برضه بس في فروق انت تختارها بنفسك حسب امكانياتك و قدرتك علي تحملها زي اعادة البيع و القطع و اسعارها و برضه حسب المجهود و الشغل اللي العربية بتعمله معاك و ربنا يوفقك............
Ibiiiiiiiiiiiiiiiiiiiiiiiiiiiiizzzzzzzzzzzzzzzzzzz zzzzzzaaaaaaaaaaaaaaa For Ever
كلام يعبر عن وجهة نظرك فقط
و هو غير واقعى و لا يعبر عن حقيقة الميجان و عكس تماما ما يقال من عن الميجان من ملاكها فى المنتدى
الكلام دا على اللانسر القديمة لكن الجديدة مازالت فى بدايات إستعمالها و حتى لان مش عارفين سعر إعادة البيع بعد الإستعمال لفترة حيبقى عامل إزاى أو اسعار قطع الغيار إيه أو حتكون إعتمادية زى الموديل السابق أم لا ؟
سعر رفرف الميجان الامامى بـ 850.00 جم فقط
برجاء مراجعة أسعار قطع غيار الميجان فى اللينك دا
http://www.nilemotors.net/Nile/showthread.php?t=2758
حاسس بيك يا شاركي
انا زعلت من الهجوم (المسموع) على العربية
يا جماعة بلاش والنبي حكاية واحد قاللي و جماعة حكولى لأن ده هوا اللي خلى العربية سعر اعادة بيعها يقل و هو ده عيبها الأكبر
العربية زي الفل (و عن تجربة شخصية)
و الانسر برضه زي الفل
يا ريت المقارنة تكون أكثر موضوعية
ماشى يا احمد باشا .. هانخالهلك موضوعية اكتر ... بس خلى بالك المقارنة هاتتعقد اكتر :D
خد واحدة بقى منى مع انى ضد الميجان .. بس شهادة الحق و المعلومة الصح لازم تتقال
مؤشر سوق المستعمل بيقول ان فى تحسن ملحوظ فى اسعار الميجان المستعمل فى السوق
وتحليلى لدة عدة اسباب
-شغل التوكيل فى الفترة الاخيرة
-نمط مشترين السيارة بعد الشكل الاخير لها
-جودة العربيات اللى بتيجى هنا عن زمان
فا لو سعر اعادة البيع مؤثر فى المقارنة دى على المدى القصير
يبقى سعر إعادة البيع بيتحسن
شكرا يا أحمد باشا
فعلا إنت قلت ياريت المقارنة تكون موضوعيه و بلاش عينة أصلوا قالى و انا سمعت
إللى عايز يعرف حقيقة الميجان و الإشاعات إللى طلعت عليها بجد
عندك هنا فى المنتدى و الحمدلله ما يقلش عن 15 واحد من ملاكها ممكن يسألهم
انا يا شاركي قلت ان السعر ده ايييييييييييه؟؟؟؟؟؟؟؟؟؟؟؟ ؟ صاحبي قالهولي هو جابوا كده اتنصب عليه بقي انا مليش دعوة انما انا بقول اللي اتقالي بس و قلت صاحبي قالي جابوا ب1500 مش انا جبتو ب 1500 جنيه بوضح بس عشان الواحد ميتفهمش غلط
Ibiiiiiiiiiiiiiiiiiiiiiiiiiiiiiizzzzzzzzzzzzzzzzzz zzzzzaaaaaaaaaaaaaaaaaa For Ever
محمد إنت موضحتش فى مداخلتك إن صاحبك جاب الرفرف و كمان معاه ميجان
إنت قلت
(صاحبي قالي ان رفرف الميجان ب 1500 جنيه )
ايوا ا شاركي يعني هو الرفرف هيجيبوا يعمل بيه ايه الا لو كان عندو ميجان و عملت حادثة و تحديدا هي الميجان بتاعه والده و مجابش الرفرف من التوكيل لانه مش متابع مع التوكيل
Ibiiiiiiiiiiiiiiiiiiiiiiiiiiiiiiiiizzzzzzzzzzzzzzz zzzzzzaaaaaaaaaaaaaaa For Ever
يا محمد ما أنا قلتلك إنت مقلتش إنه جابه أصلا
بصراحة الرينو طبعاَ أحلى بكتير دة غير إن في موقف حدث مع أخونا في المنتدى Ahmed A.Maksoud ود اللينك بتاع الموضوع بعد إذنه طبعاَ
الموضوع
و الموقف دة بإختصار إن عربيته في الكومبيوتر حذره من إرتفاع درجة حرارة زيت الجيربوكس فاتصل برقم الخدمة السريعة و عرفوا العيب فين و قالوا له كمان اسبب و دة أكبر دليل على نجاح السيارة و الوكيل طبعاَ و اسمع الكلام من ملاك العربيات لأن هما اللي أحسن ناس يدلوك على مميزاتها و عيوبها و الكلام اللي أنا ذكرته دة لا يقلل من الميتسوبيشي و لكن بيضع الأفضلية للميجان .. دة رأيي ..
:):)
بصراحة يا جماعة الأختيار محير... كل عربية فيها مميزات مختلفة. بس فعلا لازم الواحد يحدد الأول هو محتاج ايه.