الموضوع: الفقراء أولاً ياولاد ال....

سلام عليكم يا ريت حضرتك تسمح لي ببعض التعقيبات

المشاركة الأصلية كتبت بواسطة devilishtigers

انا عايز اقول حاجة ومتأسف لو كلامي هيضايق حد
انا لغاية دلوقتي مش مقتنع بالثورة
من حقك

لاسباب كثيرة منها
1- لما الناس تغير نفسها الاول تروح تعمل ثورة (كنا الاول بنقول وبنشتكي من سواقين الميكروباص انهم بيمشوا عكس وبيوقفوا في اي مكان و.... و...... تعالى دلوقتي شوف الملاكي بيعمل ايه
راكن صف 3 وبيمشي عكس - كام زاحد ملاكي راح فيم - كام واحد غير النمر واللي لزق بتاعة 25 )
اقسم بالله العظيم انا ولا فيمت ولا زينون ولا ستاير وكنت باستعمل حزام الامان ايام الحظر وقبل التنحي رغم ان ما حدش ليه عندي حاجة كان نفسي اشوف الكلام دا بعد الثورة ولكن.......
طب جميل , انا وحضرتك و استاذ وائل هانغير من نفسنا , هل ده هايمنع استاذ وليد(اي حد ) من انه يعمل اللي بتقول عليه ده ؟ لأ مش هايمنعه بس يمكن يشوفنا يقتدي بينا , شافنا و ما اقتداش بينا, طب ندي له كلمتين في عضمه يمكن يخلي عنده دم , ما عندوش دم (عادي تلاقي فئة من الناس كده ما احنا مش في الجنة), خلاص نضربه بقى عشان يلتزم, لا ما ينفعش لأن ده مش من حقنا , خلاص يبقى بتاع المرور ده هايدي له غرامة حلوة هاتردعه, ظبطه بعشرة جنيه و ماخدش لا مخالفة ولا غرامة, طب نعمل نفس الخطوات السابقة مع بتاع المرور , نفس الكلام , احنا مش في الجنة , طب نشتكيه, ياما ناس اشتكت و مافيش فايدة, طب نعمل نفس الخطوات السابقة مع اللي هانشتكي له , مافيش فايدة , هانفضل نطلع لحد ما نوصل للوزير , ثم للرئيس , للأسف نتيجة التطهير من اسفل محدودة جدا , و غالبا في نظام زي نظام مبارك ما كناش هانلحق نوصل لفوق اوي عشان اصلا كنا هانتقص بدري بدري و الحالات اللي من دي كتير جدا ... اذن اسقاط النظام ليس اصلاح للشعب , لكنه ما يجعل اصلاح الفاسدين من الشعب ممكنا ....


2- مفيش حاجة لغاية دلوقتي اتغيرت عن الاول وبقت احسن
تاني , اسقاط النظام ليس اصلاح للشعب , لكنه ما يجعل اصلاح الفاسدين من الشعب ممكنا , و للأسف اللي مسك الحكم بعد سقوط مبارك ما عندوش رغبة في الاصلاح و ده سر المشكلة الحالية

3- انا ما كنتش عايز حسني يمشي دلوقتي ويكما لنهاية الفترة لسبب واحد بس (ان لو حاجة زي دي حصلت بالمظاهرات كل حاجة بعد كدا هتبقى بالمظاهرات زي ما حصل مظاهرات فئوية واعتصامات عند ماسبيرو وهو دا بقى حل كل واحد عايز حاجة)
اعتراضك على اسلوب معين يوجب عليك ايجاد البديل , اللهم الا الصبر لحد ما الطاغية يجي له عزرائيل و نكمل الصبر مع ابنه

4- لو لقدر الله حد مننا والدته او اخته او اخوه او ابنه حصله حاجة وهو ماشي بسبب الغياب الامني ياتر ساعتها هنقول يلا كله يهون علشان خاطر الثورة ومفيش ثورة ملهاش عواقب.
طالما بتتكلم في كده يبقى حط نفسك و ابنك و زوجتك كمان مكان اي حد اتعذب في قسم .... ايه النظام ؟

5- كفاية ان كل واحد بقي يخون اللي قدامه ومحدش بقى عنده ثقة في حد
بصراحة , حوش الثقة اللي كانت مالية الدنيا , حضرتك محسسني انك جيت مصر لأول مرة بعد الثورة

6- انا ضد اي تطاول على الشرطة رغم اللي عملته قبل كدا لسبب واحد تخيل الشخص اللي المفروض يحميك مش عارف يحمي نفسه!!!!!!!
في اوربا و الدول المتقدمة المسئول عن الحماية بيحمي الناس و بيحمي نفسه, و مش بيعمل كده بسلطة البلطجة و الرعب و السلطة المطلقة و شريعة الغاب و لكن بسلطة تطبيق القانون

ولغاية دلوقتي الرشوة شغالة والامناء بردو عايشين حياتهم وبيلموا والغلط مش عليهم الغلط على اللي عايز يقف في الممنوع وينزل يجيب حاجة وبدل ما ياخد مخالفة يروح بدب لأمين الشرطة 10 جنيه علشان يقف وما يتاخدش مخالفة.
وفي كذا حاجة تاني.
لا يا باشا الغلط على ده و ده , لو اللي بيدفع مش موجود الأمين مش هايلاقي اللي يدفع له , و لو الامين اللي بيقبل مش موجود اللي بيدفع مش هايلاقي اللي يدفع له , ده handshake من طرفين
و هارجع بيك لنقطة 1 و هاسألك لما انا و حضرتك و استاذ وائل هانصلح نفسنا الاتنين دول هايتصلحوا ازاي ؟

انما لو الناس غيرت نفسها في الاول وبعدين عملوا الثورة انا كنت هشارك فيها واقتنع بيها علشان في اية بتقول ( إن الله لا يغير ما بقوم حتى يغيروا ما بأنفسهم )

تغيير النفس له حدود كمية , و عشان كده فيه اختراع اسمه قواعد و قوانين وعقوبات رادعة و الا كانت الدنيا اتسابت بقى بلا قواعد لحد ما كل الناس تصلح نفسها, و حتى دعوات الاصلاح دي كانت بتتحارب في عصر مبارك بعنف و بشدة , فكان لازم اسقاط النظام , اللي لسه ما سقطش بالمناسبة رغم ان مبارك سقط, اسقاط النظام ليه ؟ عشان يبقى التصليح ممكن , انما التصليح مش هايبقى تلقائي من نفسه

وانا اسف لو كلامي ضايق حد او اختلف معاه في رأيه ولكن هذا رائي ولا افرضه على احد

شكرا للرأي الهادي