السلام عليكم يا رجالة الهوندا... أولاً لازم تباركولي وتقبلوني عضو معاكوا في النقابة الهونداوية لأني والحمد لله لسه شاري سيفيك 92 الاسبوع اللي فات وكنت بظبط فيها شوية حاجات والحمد لله خلصت منها وقولت أعمل كارنيه العضوية علي أحلي منتدي في الدنيا (نايل موتورز)
وبالمناسبة دي لازم أعمل موضوع مهم جدا جدا جدا وهايفيد كل اخواتنا علي المنتدي والموضوع هايكون عن (العرس) محدش يفهمني غلط أنا أقصد (العرسة) اللي هيا شبه الفار بس طويلة شوية ربنا ما يكتب علي حد والعرسة تعرف طريق عربيته... المهم لما كنت اركب العربية الصبح ألاقي ريحة وحشة جدا ومش عارف الريحة جاية منين غسلت العربية وجبت أقوي أنواع المعطرات مفيش فايدة...لغاية ما مرة ركنت العربية لمدة يومين وجيت أركبها لقيت عيش وعضم فراخ علي الكرسي اللي جنبي وريحة كأنها كلب ميتفتحت الشنطة لقيت فطير وعيش وعضم وحاجات تانية كتير كأن كلب بياكل جوه العربية.. عرفت ساعتها ان العربية كان فيها حفلة خميس وجمعة والعرس بتستغلها أسوأ استغلال عملت كل حاجة عشان أطردها وكل المحاولات باءت بالفشل لدرجة اني فكرت أشتري قطة وأبيتها في العربية لقيت المشكلة هاتبقي أكبر... في الآخر سلمت للأمر الواقع وقررت اني أصاحب العرسة.. وبحاول دلوقتي أعلمها ما تعملش حاجة جوه الصالون لما تكون واكلة أكلة تقيلة وتعملها في الشنطة بس...